തിരുവനന്തപുരത്ത് യുവാവിനെ തട്ടിക്കൊണ്ടുപോയി മര്‍ദ്ദിച്ച ശേഷം സമീപത്തെ പൊട്ടക്കിണറ്റിലിട്ടു. കടം വാങ്ങിയ പണം തിരികെ നല്‍കാത്തതിനാണ് യുവാവിനെ തട്ടിക്കൊണ്ടുപോയി മര്‍ദ്ദിച്ച ശേഷം സമീപത്തെ പൊട്ടക്കിണറ്റിലിട്ടത്. സംഭവവുമായി ബന്ധപ്പെട്ട് മൂന്നുപേരെ പോലീസ് കസ്റ്റഡിയിലെടുത്തു.

നെടുമങ്ങാട് നന്നാട്ടുകാവ് സ്വദേശി നസീമാണ് (32) ക്രൂരമര്‍ദ്ദനമേറ്റ് മെഡിക്കല്‍ കോളേജ് ആശുപത്രിയില്‍ ചികിത്സയിലുള്ളത്. പോത്തന്‍കോട് സ്വദേശിയായ ഷുക്കൂര്‍ എന്നയാളുടെ നേതൃത്വത്തിലാണ് മര്‍ദ്ദനം നടന്നതെന്നാണ് പൊലീസിന് ലഭിച്ച വിവരം.

ചൊവ്വാഴ്ച വൈകിട്ട് മൂന്നോടെ പോത്തന്‍കോട്ടാണ് സംഭവം നടന്നത്. നസീമിനെ ഷുക്കൂറും കൂട്ടാളികളും ഓട്ടോയില്‍ തട്ടിക്കൊണ്ടുപോയി വട്ടപ്പാറയ്ക്ക് സമീപത്ത് കുറ്റിയാണിയിലുള്ള ഒഴിഞ്ഞ സ്ഥലത്തെത്തിച്ച ശേഷം ക്രൂരമായി മര്‍ദ്ദിച്ചു. അവശനായപ്പോള്‍ നസീമിനെ സമീപത്തെ പൊട്ടക്കിണറ്റില്‍ ഉപേക്ഷിച്ച് സംഘം രക്ഷപ്പെടുകയായിരുന്നു.

പിന്നീട് എങ്ങനെയോ രക്ഷപ്പെട്ട നസീം ബന്ധുക്കളെ വിവരം അറിയിക്കുകയായിരുന്നു. അവശനിലയിലായ നസീമിനെ ബന്ധുക്കള്‍ മെഡിക്കല്‍ കോളേജ് ആശുപത്രിയില്‍ പ്രവേശിപ്പിക്കുകയായിരുന്നു.