സംസ്ഥാനത്ത് അടുത്ത സാമ്ബത്തിക വര്‍ഷത്തേക്കുള്ള ബജറ്റ് അവതരിപ്പിക്കുന്നതിനായുള്ള നിയമസഭാ സമ്മേളനം ഗവര്‍ണറുടെ നയപ്രഖ്യാപനത്തോടെ ഈ മാസം 18ന് ആരംഭിക്കും.രണ്ട് ഘട്ടങ്ങളിലായി നടക്കുന്ന സമ്മേളനത്തില്‍ അടുത്ത മാസം 11ന് ധനമന്ത്രി എന്‍ കെ ബാലഗോപാല്‍ ബജറ്റ് അവതരിപ്പിക്കും. ഇതുസംബന്ധിച്ച്‌ ഇന്നലെ ചേര്‍ന്ന മന്ത്രിസഭാ യോഗം അംഗീകാരം നല്‍കിയ ശേഷം ഗവര്‍ണറുടെ അനുമതിക്കായി ശിപാര്‍ശ ചെയ്തു. ഇതോടൊപ്പം ഗവര്‍ണറുടെ നയപ്രഖ്യാപന പ്രസംഗത്തിനും മന്ത്രിസഭാ യോഗം അംഗീകാരം നല്‍കി.

18ന് ആരംഭിക്കുന്ന സമ്മേളനത്തില്‍ നയപ്രഖ്യാപനത്തിന് ശേഷം 21 അന്തരിച്ച പി ടി തോമസ് എം എല്‍ എക്ക് അന്തിമോപചാരം അര്‍പ്പിക്കും. തുടര്‍ന്ന് 22, 23, 24 തീയതികളില്‍ ഗവര്‍ണറുടെ നയപ്രഖ്യാപനത്തിനുള്ള നന്ദിപ്രമേയ ചര്‍ച്ചക്ക് ശേഷം സഭ പിരിയും. പിന്നീട് മാര്‍ച്ച്‌ രണ്ടാം വാരം ബജറ്റിനായി ചേരും. ഫെബ്രുവരി 25 മുതല്‍ മാര്‍ച്ച്‌ 10 വരെ സഭയുണ്ടാകില്ല. മാര്‍ച്ച്‌ 11 നായിരിക്കും സംസ്ഥാന ബജറ്റ്. തുടര്‍ന്ന് മാര്‍ച്ച്‌ അവസാനം വരെ സഭാ സമ്മേളനം നീളും. ബജറ്റിനു മേലുള്ള പൊതു ചര്‍ച്ചകള്‍ പൂര്‍ത്തിയാക്കി വോട്ട് ഓണ്‍ അക്കൗണ്ടും പാസാക്കിയ ശേഷം മാര്‍ച്ച്‌ 23ന് സമ്മേളനം അവസാനിക്കുന്ന തരത്തിലായിരിക്കും നിയമസഭാ സമ്മേളനം ക്രമീകരിക്കുക.

നേരത്തെ, ലോകായുക്ത നിയമ ഭേദഗതി ഓര്‍ഡിന്‍സ് ഗവര്‍ണര്‍ ഒപ്പിടാത്തതിനാല്‍ നിയമസഭാ സമ്മേളന തീയതി നിശ്ചയിക്കുന്നത് അനിശ്ചിതമായി നീണ്ടിരുന്നു. ഓര്‍ഡിനന്‍സ് ഗവര്‍ണര്‍ ഒപ്പിട്ടതോടെ പ്രതിസന്ധി ഒഴിയുകയായിരുന്നു. ഇതിന് പിന്നാലെ ചേര്‍ന്ന മന്ത്രിസഭാ യോഗമാണ് ഈ മാസം 18ന് നിയമസഭാ സമ്മേളനം വിളിച്ചു ചേര്‍ക്കാന്‍ തീരുമാനമെടുത്തത്.