ഇ. ശ്രീധരന് പറയുന്നതിന് സര്ക്കാരിന് മൗനം; ഈ നിലയ്ക്കു പോയാല് രണ്ടുകൊല്ലമാകാതെ ലൈറ്റ് മെട്രോ അനങ്ങില്ല
കോഴിക്കോട്, തിരുവനന്തപുരം ലൈറ്റ് മെട്രോ പദ്ധതി രൂപരേഖ ലഭിച്ച് ഏകദേശം ഒരു കൊല്ലത്തിനു ശേഷം മന്ത്രിസഭായോഗം ഭരണാനുമതി നല്കിയെങ്കിലും പദ്ധതിയുടെ നിര്മാണം ഈ സര്ക്കാരിന്റെ കാലത്തുതന്നെ തുടങ്ങണമെങ്കില് ഇനിയും കടമ്പകള് ഒട്ടേറെ. ഇ. ശ്രീധരന്റെ മാര്ഗനിര്ദേശപ്രകാരം കേന്ദ്രസര്ക്കാരിനു പുതിയ കത്ത് കൊടുക്കാന് തീരുമാനിച്ചെങ്കിലും കേന്ദ്രാനുമതിക്ക് ഇനിയും കാത്തിരിക്കേണ്ടിവരും. നിര്മാണത്തിനു മുന്നോടിയായുള്ള സ്ഥലമേറ്റെടുപ്പ് ഉള്പ്പെടെയുള്ള പ്രവൃത്തികള് ഇപ്പോള് തുടങ്ങിയാല് മാത്രമേ കേന്ദ്രാനുമതി ലഭിച്ചാലുടന് നിര്മാണം തുടങ്ങാനാകൂ. ഇക്കാര്യത്തില് മന്ത്രിസഭ തീരുമാനമെടുക്കണമെന്നു കെആര്ടിസിഎല് ആവശ്യപ്പെട്ടിരുന്നെങ്കിലും അന്തിമതീരുമാനമായിട്ടില്ല.
കേന്ദ്രത്തിന്റെ അന്തിമാനുമതിക്കായി കാത്തിരുന്നാല് പദ്ധതി തുടങ്ങാന് രണ്ടു വര്ഷമെങ്കിലും കഴിയും. ഈ കാലതാമസം മറികടക്കാനാണ് അന്തിമാനുമതിക്കു മുന്പ് തത്വത്തിലുള്ള അനുമതി തേടാന് ശ്രീധരന് ആവശ്യപ്പെട്ടിരുന്നത്. പദ്ധതിയില് കേന്ദ്ര സംസ്ഥാന സര്ക്കാരുടെ സാമ്പത്തിക ഭാരം കുറയ്ക്കാന് 85 ശതമാനം തുകയും ജൈക്ക വായ്പയായി എടുക്കാമെന്ന നിര്ദേശവും അദ്ദേഹം മുന്നോട്ടുവച്ചിരുന്നു.
കേന്ദ്രാനുമതി എളുപ്പത്തിലാക്കാനാണ് ആ ആശയം അദ്ദേഹം അവതരിപ്പിച്ചത്. 20 ശതമാനം വീതം കേന്ദ്ര-സംസ്ഥാന സര്ക്കാരുകളും 60 ശതമാനം വായ്പയുമെന്നാണു കഴിഞ്ഞ 12-ന് അയച്ച കത്തില് കേരളം കേന്ദ്രത്തെ അറിയിച്ചത്. പകരം കേന്ദ്ര സംസ്ഥാന സര്ക്കാരുകളുടെ വിഹിതം ഏഴര ശതമാനം വീതം മാത്രമാക്കി പുതിയ കത്ത് അയയ്ക്കാനാണ് ശ്രീധരന് നിര്ദേശിച്ചത്.
എന്നാല്, ഇക്കാര്യത്തില് ഇപ്പോഴും സര്ക്കാര് അന്തിമതീരുമാനമെടുത്തിട്ടില്ല. ജൈക്ക വായ്പയുടെ നിബന്ധനകളെക്കുറിച്ചു ധനവകുപ്പ് നേരത്തെ തന്നെ സംശയങ്ങളുന്നയിച്ചിരുന്നു. കേരളത്തിനു വേണ്ടി പ്രത്യേക ഇളവുകള് അനുവദിക്കാമെന്നു ജൈക്ക അധികൃതര് അറിയിച്ചിരുന്നെങ്കിലും രേഖാമൂലം ഉറപ്പുനല്കിയിട്ടില്ല. ഇതുകൂടി പരിഗണിച്ച ശേഷം മാത്രമേ വായ്പയുടെ കാര്യത്തില് അന്തിമതീരുമാനമെടുക്കൂ. തിരുവനന്തപുരത്തു മാത്രം നാലുമേല്പ്പാലങ്ങള് നിര്മിക്കണം. ഇതിനുള്ള സ്ഥലമേറ്റെടുപ്പ് ഉള്പ്പെടെയുള്ളവ കഴിയാവുന്നത്ര നേരത്തെ ആരംഭിക്കണം.
ലൈറ്റ് മെട്രോ വരുമ്പോഴുള്ള സമഗ്ര ഗതാഗത പദ്ധതിയെക്കുറിച്ചുള്ള പഠന റിപ്പോര്ട്ടിന്റെ പുരോഗതിയും ആദ്യകത്തില് കേരളം ഉള്പ്പെടുത്തിയിട്ടില്ല. നടപടികള്ക്കു വേഗം വര്ധിപ്പിക്കാന് കെആര്ടിസിഎല്ലിനു മുഴുവന് സമയ എംഡിയെ നിയമിക്കണമെന്ന ശ്രീധരന്റെ ആവശ്യത്തിന്മേലും തീരുമാനമായിട്ടില്ല.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivarthahttps://www.facebook.com/Malayalivartha