പേരൂര്‍ക്കടയില്‍ അലങ്കാര വില്പന കടയില്‍ പട്ടാപ്പകല്‍ യുവതിയെ കൊലപ്പെടുത്തിയ സംഭവത്തിലെ പ്രതി ഉള്ളൂരിലെത്തിയശേഷം രക്ഷപ്പെട്ടതായി പൊലീസ് സ്ഥിരീകരിച്ചു. സംഭവ ദിവസം കൃത്യസ്ഥലത്ത് നിന്ന് ഓട്ടോറിക്ഷയില്‍ രക്ഷപ്പെട്ട് മുട്ടട ആലപ്പുറം കുളത്തിന് സമീപത്തെ സ്ഥലത്തെത്തി രക്തക്കറ പുരണ്ട വസ്ത്രങ്ങള്‍ മാറ്റിയശേഷം ടീഷര്‍ട്ടും ട്രാക്ക് സ്യൂട്ടിന് സമാനമായ പാന്റും ധരിച്ച പ്രതി വഴിയാത്രക്കാരനായ യുവാവിനൊപ്പം സ്‌കൂട്ടറില്‍ പോകുന്ന ദൃശ്യങ്ങള്‍ പൊലീസ് കണ്ടെത്തിയിരുന്നു.

ഈ ദൃശ്യങ്ങള്‍ കേന്ദ്രീകരിച്ചുള്ള അന്വേഷണത്തില്‍ സ്‌കൂട്ടര്‍ ഓടിച്ചിരുന്ന പാങ്ങപ്പാറ സ്വദേശിയായ യുവാവിനെ പൊലീസ് സംഘം കണ്ടെത്തി. ഉള്ളൂര്‍ വരെ സ്‌കൂട്ടറിലെത്തിയ പ്രതി ഉള്ളൂര്‍ ജംഗ്ഷനിലിറങ്ങി നടന്നുപോയതായാണ് സ്‌കൂട്ടര്‍ ഓടിച്ചിരുന്ന യുവാവ് പൊലീസിന് മൊഴി നല്‍കിയിരിക്കുന്നത്.

ഇതിന്റെ അടിസ്ഥാനത്തില്‍ ഉള്ളൂര്‍ ജംഗ്ഷനില്‍ നിന്ന് ആക്കുളം, കേശവദാസപുരം, മെഡിക്കല്‍ കോളേജ്, ശ്രീകാര്യം ഭാഗങ്ങളിലേക്കുള്ള മെയിന്‍ റോഡുകളും പോക്കറ്റ് റോഡുകളുമുള്‍പ്പെടെ എല്ലാറോഡുകളിലെയും സിസി ടിവി കാമറകള്‍ പൊലീസ് പരിശോധിച്ച് തുടങ്ങിയിട്ടുണ്ട്.