സ്വപ്ന വാങ്ങിയ 19, 06, 730 രൂപ പിഡബ്‌ള്യു സി തിരിച്ചടക്കുമോ? തുക തിരിച്ചടച്ച് സര്‍ക്കാരുമായി രമ്യതയില്‍ നീങ്ങാനാണ് തീരുമാനം എന്നറിയുന്നു. തുക അടച്ച ശേഷം സ്വപനയില്‍ നിന്നും ഈടാക്കാന്‍ കമ്പനി നിയമപരമായ നടപടികള്‍ സ്വീകരിക്കും.

സ്‌പേസ് പാര്‍ക്കില്‍ ജൂനിയര്‍ കണ്‍സള്‍ട്ടന്റായി നിയമിച്ച സ്വപ്ന സുരേഷിനു നല്‍കിയ ശമ്പളം തിരികെ നല്‍കാന്‍ സര്‍ക്കാര്‍ പ്രൈസ് വാട്ടര്‍ കൂപ്പേഴ്‌സിനു കത്തെഴുതിയ വിവരം പുറത്തുവന്നതോടെയാണ് ഏജന്‍സിക്ക് മനം മാറ്റമുണ്ടായത്.

പിഡബ്ലുസിയാണ് നിയമനത്തിനായി സ്വപ്നയെ തിരഞ്ഞെടുത്തതെന്ന് കേരള സ്റ്റേറ്റ് ഇന്‍ഫര്‍മേഷന്‍ ടെക്‌നോളജി ഇന്‍ഫ്രാസ്ട്രക്ചര്‍ ലിമിറ്റഡ് അധികൃതര്‍ അയച്ച കത്തില്‍ ചൂണ്ടിക്കാട്ടുന്നു. തുക തിരിച്ചടയ്ക്കാതെ, കണ്‍സള്‍ട്ടന്‍സി ഫീസായി പിഡബ്ല്യുസിക്കു നല്‍കാനുള്ള ഒരു കോടിരൂപ നല്‍കേണ്ടതില്ലെന്നാണ് സര്‍ക്കാര്‍ തീരുമാനം. തുക നല്‍കി ഒരു കോടി മുതലാക്കാനാണ് തീരുമാനം. സര്‍ക്കാര്‍ ആവശ്യപ്പെട്ട തുക നല്‍കാതിരുന്നാല്‍ സര്‍ക്കാര്‍ നിയമ നടപടികളുമായി മുന്നോട്ടു പോകുമെന്ന കാര്യമായ ധാരണ പ്രൈസ് വാട്ടര്‍ കൂപേഴ്‌സിനുണ്ട്. സര്‍ക്കാര്‍ നടപടി തുടങ്ങിയാല്‍ അത് കൂപ്പര്‍ മാര്‍ക്ക് നാണക്കേടായി മാറും.

സ്‌പേസ് പാര്‍ക്കില്‍ സ്വപ്നയുടെ ശമ്പളമായി 19,06,730 രൂപയാണ് പിഡബ്ല്യുസിക്ക് അനുവദിച്ചത്. ഇതില്‍ ജിഎസ്ടി ഒഴിവാക്കിയ തുകയായ 16,15,873 രൂപ പിഡബ്ല്യുസിയില്‍നിന്ന് ഈടാക്കാന്‍ കെഎസ്‌ഐടിഐഎല്‍ എംഡി അടിയന്തരമായി നടപടി കൈക്കൊള്ളണമെന്ന് ധനകാര്യപരിശോധനാ വിഭാഗം റിപ്പോര്‍ട്ട് നല്‍കിയിരുന്നു. പിഡബ്ല്യുസിയില്‍നിന്ന് തുക ഈടാക്കാന്‍ കഴിയാതെ വന്നാല്‍ അന്നത്തെ ഐടി സെക്രട്ടറിയും കെഎസ്‌ഐടിഐഎല്‍ ചെയര്‍മാനുമായിരുന്ന ശിവശങ്കര്‍ ഐഎഎസ്, അന്നത്തെ എംഡി സി.ജയശങ്കര്‍ പ്രസാദ്, സ്‌പെഷല്‍ ഓഫിസറായിരുന്ന സന്തോഷ് കുറുപ്പ് എന്നിവരില്‍നിന്ന് തുല്യമായി തുക ഈടാക്കണമെന്നും ശുപാര്‍ശ ചെയ്തിരുന്നു. ചീഫ് സെക്രട്ടറി അധ്യക്ഷനായ സമിതിയും ഇക്കാര്യം തന്നെയാണ് ശുപാര്‍ശ ചെയ്തിരുന്നു.

വിദ്യാഭ്യാസ യോഗ്യത സംബന്ധിച്ച പൂര്‍ണമായ അറിവോടെയാണ് മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി ശിവശങ്കര്‍ സ്‌പേസ് പാര്‍ക്കില്‍ നിയോഗിച്ചതെന്നും അതിനായി അപേക്ഷിക്കുകയോ അഭിമുഖത്തില്‍ പങ്കെടുക്കുകയോ ചെയ്തിട്ടില്ലെന്നും സ്വപ്ന വെളിപ്പെടുത്തിയിരുന്നു. ബയോഡേറ്റ തയാറാക്കി കൊടുത്തത് ശിവശങ്കറാണെന്ന ആരോപണവും സ്വപ്ന ഉന്നയിച്ചു. തന്നെ നിയമിക്കാന്‍ സുരക്ഷാ പ്രശ്‌നമുണ്ടെന്നു ചൂണ്ടിക്കാട്ടിയ കെപിഎംജി എന്ന കണ്‍സള്‍ട്ടന്‍സിയെ മാറ്റി പിഡബ്ല്യുസിയെ കൊണ്ടുവന്നാണ് ശിവശങ്കര്‍ നിയമനം നടത്തിയതെന്നും സ്വപ്ന മാധ്യമങ്ങളോട് പറഞ്ഞിരുന്നു. എന്നാല്‍ മുഖ്യമന്ത്രി ശിവശങ്കറിനൊപ്പമായതിനാല്‍ സ്വപ്നക്കെതിരെ നീങ്ങികൊണ്ടിരിക്കും.

സ്വപ്നക്കെതിരായ നീക്കങ്ങള്‍ ശക്തമായത് ശിവശങ്കറിന്റെ പുസ്തകത്തിനെതിരെ സ്വപ്ന രംഗത്തെത്തിയതോടെയാണ്. കേന്ദ്ര- സംസ്ഥാന സര്‍ക്കാരുകള്‍ക്കെതിരെ നീങ്ങില്ലെന്ന ഉറപ്പുമായാണ് സ്വപ്ന ജയില്‍ മോചിതയായത്.തിരുവനന്തപുരത്ത് മടങ്ങിയെത്തിയ ശേഷം ഇതേ നിലപാടാണ് സ്വപ്ന പിന്തുടര്‍ന്നത്. എന്നാല്‍ ശിവശങ്കറിന്റെ പുസ്തകം കാര്യങ്ങളെ കീഴ്‌മേല്‍ മറിച്ചു. സ്വപ്നക്ക് നിയന്ത്രണം വിട്ടു.

എയര്‍ ഇന്ത്യ , വ്യാജ സര്‍ട്ടിഫിക്കേറ്റ് കേസുകളാണ് സര്‍ക്കാര്‍ മുറുക്കിയത്. ഇവ രണ്ടും സൂക്ഷിച്ചില്ലെങ്കില്‍ സ്വപ്നക്ക് എതിരായി മാറും. ചിലപ്പോള്‍ ജയിലില്‍ കിടക്കേണ്ടി വരും. അത് സ്വപ്നക്കറിയാം. പി ഡബ്‌ള്യു സിക്കും അറിയാം. അതു കൊണ്ടാണ് കമ്പനി ഒതുങ്ങി മുന്നോട്ടുവന്നിരിക്കുന്നത്.