കഴിഞ്ഞ ദിവസം കേരളത്തിനെതിരെ മുഖ്യമന്ത്രി യോഗി ആദിത്യനാഥ് പറഞ്ഞ പ്രസ്താവന വലിയ ചർച്ചകൾക്കാണ് വഴിവച്ചത്. ഇതിനുപിന്നാലെ കേരളം മുഖ്യമന്ത്രി പിണറായി വിജയൻ തക്ക മറുപടിയും നൽകി രംഗത്ത് എത്തിയതോടെ കൂടുതൽ ചർച്ചകളിലേക്ക് വഴിമാറുകയാണ്. ഇപ്പോഴിതാ വിഷയത്തിൽ നിലപാട് വ്യക്തമാക്കി രംഗത്ത് എത്തിയിരിക്കുകയാണ് ഡോ. നെൽസൺ ജോസഫ്.

റോം ഒരു ദിവസം കൊണ്ട് ഉണ്ടാക്കിയതല്ല എന്നൊരു വാചകമുണ്ട്. കേരള മോഡലും ഒരു ദിവസത്തിൻ്റെ സൃഷ്ടിയല്ല. ഒറ്റ ദിവസം കൊണ്ടുണ്ടാവുന്നതല്ല ഇന്ന് നമ്മൾ കേരളമെന്ന് വിളിക്കുന്ന ഒറ്റ വാക്ക് അർത്ഥമാക്കുന്നതൊന്നും. അതിന് ചില്ലറ അധ്വാനം പോര.. അതൊരു വെറും വാക്കല്ല. ഒന്നാം നമ്പർ ഒരു തമാശയുമല്ല എന്നും അദ്ദേഹം ഫേസ്ബുക്കിൽ കുറിക്കുകയുണ്ടായി.

ഫേസ്ബുക്ക് കുറിപ്പ് ഇങ്ങനെ;

കേരളത്തെപ്പോലാവാൻ പരിശ്രമിക്കുന്നവർക്കൊരു ചൂണ്ടുപലക. രാജ്യത്തെ ഏറ്റവും മികച്ച വിദ്യാഭ്യാസം, ആരോഗ്യമേഖലയിലെ സൗകര്യങ്ങൾ, സാമൂഹ്യക്ഷേമം, ഉയർന്ന ജീവിതനിലവാരം എന്നിവയുടെയൊക്കെ ലിസ്റ്റെടുത്താൽ കേരളത്തെ കാണണമെങ്കിൽ എവിടേക്ക് നോക്കണമെന്ന് ഇവിടത്തെ കൊച്ചുകുട്ടികൾക്കുപോലുമറിയാം.

എന്നാലും പറയുമ്പൊ ചുമ്മാ ഒരു മനസുഖം ശരാശരി ആയുർ ദൈർഘ്യത്തിൽ രാജ്യത്ത് ഏറ്റവും മുന്നിൽ നവജാത ശിശു മരണനിരക്ക് ഒറ്റയക്കത്തിൽ.. അഞ്ച് വയസിൽ താഴെയുള്ള കുട്ടികളുടെ മരണത്തിൽ ഏറ്റവും കുറവ്.. 99.8% പ്രസവങ്ങളും ഇൻസ്റ്റിറ്റ്യൂഷണൽ... അങ്ങനെ ചറപറാ ഹെൽത് ഇൻഡക്സുകളിൽ മുന്നിലെത്തുന്ന സംസ്ഥാനം. ആരോഗ്യമേഖലയിൽ നീതി ആയോഗിൻ്റെ കണക്കെടുപ്പുകളിൽ നാലു തവണയാണ് കേരളം തുടർച്ചയായും മുന്നിലെത്തിയതെന്നാണോർമ..

ഹ്യൂമൻ ഡെവലപ്മെൻ്റ് ഇൻഡക്സിൽ ടോപ് ത്രീ സംസ്ഥാനങ്ങളിലൊന്ന്... വിദ്യാഭ്യാസത്തിനെക്കുറിച്ച് പറയുമ്പൊ ആദ്യം ഓർമ വരുന്നത് തൊണ്ണൂറ് വയസ് കഴിഞ്ഞ ശേഷവും പഠിക്കണമെന്ന് ആഗ്രഹിക്കുന്ന മുത്തശ്ശന്മാരുടെയും മുത്തശ്ശിമാരുടെയും വാർത്തകളാണ്. നൂറ് ശതമാനം സാക്ഷരത കൈവരിച്ച സംസ്ഥാനം ഏതാണെന്ന് പണ്ട് സ്കോളർഷിപ് ചോദ്യമായിരുന്നില്ലേ പണ്ട്?

ദാരിദ്ര്യനിർമാർജനത്തിൽ ഒന്നാം നമ്പരാണെന്ന് ഇക്കഴിഞ്ഞ മാസങ്ങളിലെ വാർത്തയായിരുന്നു. പണ്ട് പഠിച്ച കമ്യൂണിറ്റി മെഡിസിൻ ടെക്സ്റ്റ് ബുക്കിൽ കേരള മോഡലിനെക്കുറിച്ച് പറയുന്നൊരു ഭാഗമുണ്ട്. അതായത്, കുറഞ്ഞ ശരാശരി വരുമാനമുണ്ടായിട്ടും ആരോഗ്യ - വിദ്യാഭ്യാസ മേഖലകളിൽ മുന്നിലെത്തുന്ന ഒരു സംസ്ഥാനത്തിനെക്കുറിച്ച്..

റോം ഒരു ദിവസം കൊണ്ട് ഉണ്ടാക്കിയതല്ല എന്നൊരു വാചകമുണ്ട്. കേരള മോഡലും ഒരു ദിവസത്തിൻ്റെ സൃഷ്ടിയല്ല. ഒറ്റ ദിവസം കൊണ്ടുണ്ടാവുന്നതല്ല ഇന്ന് നമ്മൾ കേരളമെന്ന് വിളിക്കുന്ന ഒറ്റ വാക്ക് അർത്ഥമാക്കുന്നതൊന്നും. അതിന് ചില്ലറ അധ്വാനം പോര.. അതൊരു വെറും വാക്കല്ല. ഒന്നാം നമ്പർ ഒരു തമാശയുമല്ല.