നടിയെ ആക്രമിച്ച കേസില്‍ ദിലീപിനെതിരെ നടക്കുന്ന തുടരന്വേഷണം സ്വാഹയാവാന്‍ സാധ്യത. ദിലീപിനെ തൂക്കി അകത്തിടുമെന്ന് പറഞ്ഞവര്‍ ദിലീപിന് അനുകൂലമായി കാര്യങ്ങള്‍ താമസിപ്പിച്ചത് കോടതിയെ ചൊടിപ്പിച്ചതോടെയാണ് സംഗതി പാളിയത്.

നടിയെ ആക്രമിച്ച കേസിന്റെ തുടരന്വേഷണത്തില്‍ ഇതുവരെ എന്താണ് നടന്നതെന്ന് വിചാരണ കോടതി ചോദിച്ചു.

തുടരേന്വേഷണം പൂര്‍ത്തിയാക്കാന്‍ മൂന്ന് മാസം കൂടി അനുവദിക്കണമെന്ന ക്രൈംബ്രാഞ്ചിന്റെ അപേക്ഷ പരിഗണിക്കുമ്പോഴായിരുന്നു പ്രത്യേക കോടതിയുടെ ചോദ്യം.

ഇത് വരെ നടത്തിയ അന്വേഷണത്തിന്റെ മുഴുവന്‍ വിവരങ്ങളും നല്‍കാന്‍ കോടതി ക്രൈംബ്രാഞ്ചിനോട് ആവശ്യപ്പെട്ടു. ചെയ്യാന്‍ പോകുന്ന കാര്യങ്ങള്‍ മാത്രമേ അന്വേഷണ പുരോഗതി റിപ്പോര്‍ട്ടില്‍ ഉള്ളുവെന്ന് ജഡ്ജി ചൂണ്ടിക്കാട്ടി. തുടര്‍ന്ന് കേസ് അടുത്ത മൂന്നിലേക്ക് പരിഗണിക്കാന്‍ മാറ്റി. തുടരന്വേഷണം എന്ന് കേള്‍ക്കുമ്പോള്‍ തന്നെ കോടതി ചൂടാവുന്ന സ്ഥിതിയിലേക്ക് വളര്‍ന്നിരിക്കുകയാണ് കാര്യങ്ങള്‍.

സംവിധായകന്‍ ബാലചന്ദ്രകുമാറിന്റെ വെളിപ്പെടുത്തലുകളുടെ അടിസ്ഥാനത്തിലാണ് നടിയെ ആക്രമിച്ച കേസില്‍ ക്രൈംബ്രാഞ്ച് തുടരന്വേഷണം നടത്തുന്നത്. അന്വേഷണം രണ്ട് മാസം പിന്നിട്ടു. മാര്‍ച്ച് ഒന്നിന് അന്വേഷണ റിപ്പോര്‍ട്ട് ഹാജരാക്കാന്‍ വിചാരണ കോടതി ആവശ്യപ്പെട്ടിരുന്നു.

തുടര്‍ന്നാണ് അന്വേഷണ പുരോഗതി റിപ്പോര്‍ട്ടുമായി ക്രൈംബ്രാഞ്ച് സംഘം കോടതിയിലെത്തിയത്. തുടരേന്വേഷണം പൂര്‍ത്തിയാക്കാന്‍ മൂന്ന് മാസം കൂടി അനുവദിക്കണമെന്നും ക്രൈംബ്രാഞ്ച് ആവശ്യപ്പെട്ടു, ഇനിയും നിരവധി പേരെ ചോദ്യം ചെയ്യാനുണ്ട്. സിനിമാ രംഗത്ത് നിന്നുള്‍പ്പെടെയുള്ളവരെ ചോദ്യം ചെയ്യണം. അതുകൊണ്ട് കൂടുതല്‍ സമയം വേണം എന്നുമായിരുന്നു ക്രൈംബ്രാഞ്ച് വാദം. ചോദ്യം ചെയ്യേണ്ടവരുടെ പട്ടികയും അന്വേഷണ സംഘം കോടതിക്ക് കൈമാറി. ഈ ഘട്ടത്തിലായിരുന്നു കോടതിയുടെ സുപ്രധാന ചോദ്യങ്ങള്‍.

ഇതോടെ കോടതി ക്ഷുഭിതനായി. രണ്ട് മാസത്തെ അന്വേഷണത്തില്‍ ഇതുവരെ എന്താണ് നടന്നതെന്ന് ജഡ്ജി ചോദിച്ചു.

നടിയെ ആക്രമിച്ച കേസിലെ തുടരന്വേഷണം റദ്ദാക്കണം എന്ന ദിലീപിന്റെ ഹര്‍ജി ഹൈക്കോടതി വിധി പറയാന്‍ മാററിയിരിക്കുകയാണ്. ഉദ്യോഗസ്ഥരെ കൊല്ലാന്‍ ഗൂഢാലോചന നടത്തിയെന്ന കേസ് റദ്ദാക്കണമെന്ന പ്രതികളുടെ ഹര്‍ജിയും ഹൈക്കോടതിയുടെ മുന്നിലുണ്ട്.

നേരത്തെ, നടിയെ ആക്രമിച്ച കേസില്‍ തുടരന്വേഷണം റദ്ദാക്കണമെന്നാവശ്യപ്പെട്ട് ദിലീപ് നല്‍കിയ ഹര്‍ജി ഹൈക്കോടതി വിധി പറയാന്‍ മാറ്റിയിരുന്നു. അന്വേഷണത്തിലെ പാളിച്ചകള്‍ മറച്ച് വെക്കാനാണ് ഇപ്പോഴത്തെ തുടരന്വേഷണമെന്നും പൊലീസ് തനിക്കെതിരെ വ്യാജ തെളിവുകള്‍ ഉണ്ടാക്കുകയാണെന്നുമായിരുന്നു ഫെബ്രുവരി 24 ന് ദിലീപ് കോടതിയില്‍ വാദിച്ചത്.

പോലീസിനെതിരെ ദിലീപ് പറയുന്ന കാര്യങ്ങളില്‍ സത്യമുണ്ടെന്ന് കോടതിയും വിശ്വസിച്ചു തുടങ്ങിയിരിക്കുന്നു. നിരന്തരം ആക്ഷേപം ഉന്നയിക്കുന്ന പോലീസിന്റെ നീക്കങ്ങളില്‍ കോടതിക്ക് സംശയമുണ്ടായിരുന്നു. ബാലചന്ദ്രകുമാറിന്റെ മൊഴിയെ തുടര്‍ന്നുണ്ടായ അന്വേഷണങ്ങളില്‍ കോടതിക്ക് വിശ്വാസം നഷ്ടപെട്ടിരിക്കുന്നു.

ദിലീപിനെതിരെ അന്വേഷണ സംഘം വ്യാജ തെളിവുകള്‍ ഉണ്ടാക്കുകയാണെന്ന വാദം പ്രോസിക്യൂഷന്‍ തള്ളി. തുടരന്വേഷണം പൂര്‍ത്തിയാക്കാന്‍ മൂന്ന് മാസം കൂടി സാവകാശം വേണമെന്നാണ് അന്ന് പ്രോസിക്യൂഷന്‍ ആവശ്യപ്പെട്ടത്. തുടരന്വേഷണവുമായി ബന്ധപ്പെട്ട വിവരങ്ങള്‍ മുദ്രവെച്ച കവറില്‍ കോടതിയ്ക്ക് കൈമാറുകയും ചെയ്തിരുന്നു. അന്വേഷണ ഉദ്യോഗസ്ഥന്റെ കൈവശമുള്ള ദൃശ്യങ്ങള്‍ ഡിജിറ്റലി ലോക്ക് ചെയ്തതാണെന്നും പ്രോസിക്യൂഷന്‍ അറിയിച്ചു. കേസില്‍ വിശദമായ അന്വേഷണം ആവശ്യമാണെന്നും പ്രോസിക്യൂഷന്‍ കോടതിയില്‍ പറഞ്ഞു. അതേസമയം, തുടരന്വേഷണത്തിന് ഇനി സമയം നീട്ടി നല്‍കരുതെന്നായിരുന്നു ദിലീപിന്റെ ആവശ്യം. സമയപരിധി നീട്ടുകയല്ല, അന്വേഷണം തടയുകയാണ് വേണ്ടതെന്നും ദിലീപ് കോടതിയോട് പറഞ്ഞു.

ഏതായാലും ദിലീപിന്റെ വാദം കോടതി ശരിവയ്ക്കുന്ന തലത്തിലേക്ക് വളര്‍ന്നിരിക്കുകയാണ് ഇപ്പോള്‍. പോലീസിന്റെ ഉരുണ്ടു കളിയാണ് ദിലീപിന് അനുകൂലമായി മാറുന്നത്.