തിരുവനന്തപുരത്തെ ഹോട്ടലുകളില്‍ പകല്‍ കൊള്ള. അന്യ സംസ്ഥാനക്കാര്‍ നടത്തുന്ന ഹോട്ടലുകളിലാണ് ഏറ്റവും കൂടുതല്‍ കൊള്ള നടക്കുന്നത്. തലസ്ഥാന ജില്ലയായ തീരുവനന്തപുരത്താണ് ഏറ്റവും കൂടുതല്‍ ടുറിസ്റ്റുകളും തീര്‍ത്ഥാടകരും എത്തുന്നത്. സെക്രട്ടറിയേറ്റ്, വിവിധ സര്‍ക്കാര്‍ ഓഫീസുകള്‍, ആശുപത്രികള്‍, മ്യൂസിയം, ശ്രീപത്മനാഭസ്വാമീ ക്ഷേത്രം തുടങ്ങിയ സ്ഥലങ്ങളില്‍ കാണാനും വിവിധ ആവശ്യങ്ങള്‍ക്ക് തലസ്ഥാനത്ത് എത്തുന്നവരും ഇവിടെത്തെ ഹോട്ടലിലെ വിലകണ്ട് ഞെട്ടും. പെട്ടികടയില്‍ പോലും ആഹാരസാധനങ്ങള്‍ക്ക് തീവിലയാണ് ഈടാക്കുന്നത്. വെജ്‌റ്റേറിയന്‍ ഹോട്ടലുകളാണ് ഏറ്റവും കൂടുതല്‍ കൊള്ളനടത്തുന്നത്. തിരുവന്തപുരത്ത് വഴുതക്കാട് പ്രവര്‍ത്തിക്കുന്ന വെജ്‌റ്റേറിയന്‍ ഹോട്ടലില്‍ ഒരു ഇഡലിക്ക് 11രൂപയാണ് വില. അപ്പത്തിന് 16, സാദാ ദോശയ്ക്ക് 30, മസാല ദോശയ്ക്ക് 45, ഊണിന്‌ 75 എന്നിങ്ങനെ വന്‍ കൊള്ളയാണ് തലസ്ഥാനത്തെ ഹോട്ടലുകളില്‍ നടക്കുന്നത്.

ഹോട്ടലുകളുടെ വില ഏകീകരിക്കണമെന്ന ആവശ്യം ഉയര്‍ന്നെങ്കിലും അത് അട്ടിമറിക്കപ്പെട്ടു. ഹോട്ടലുടമകള്‍ സര്‍ക്കാരില്‍ സ്വാധീനം ചെലുത്തി തീരുമാനം അട്ടിമറിച്ചു. പല ഹോട്ടലുകളിലും ഇത് തന്നെയാണ് സ്ഥിതി. വൃത്തി ഹീനമായ അന്തരീക്ഷത്തിലാണ് പലഹോട്ടലുകളും പ്രവര്‍ത്തിക്കുന്നത്. മുമ്പ് ഹോട്ടലുകളില്‍ പരിശോധന നടത്തിയിരുന്ന ഭക്ഷ്യസുരക്ഷാ വകുപ്പ് ഇപ്പോള്‍ പരിശോധനകള്‍ നിലച്ച മട്ടാണ്. ജനങ്ങളെ പിഴിഞ്ഞ് ജീവിക്കുന്ന ഇത്തരം ഹോട്ടലുകളെ നിലയ്ക്ക് നിര്‍ത്താന്‍ അധികൃതര്‍ തയ്യാറാവണം. ഹോട്ടലുകള്‍ക്ക് എ ക്ലാസ്,ബി ക്ലാസ്, സി ക്ലാസ് തുടങ്ങിയ പദവികള്‍ കൊടുത്ത് വിലകള്‍ ഏകീകരിച്ചാല്‍ ഒരു പരിധിവരെ ഹോട്ടലുകളുടെ ഇത്തരം തട്ടിപ്പുകള്‍ തടയാനാകും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha