രണ്ട് ദിവസം മുമ്പ് കാണാതായ നാടന്‍ പാട്ട് ഗായകന്റെ മൃതദേഹം പാറമടയില്‍ നിന്ന് കണ്ടെത്തി. ചാലക്കുടി കാഞ്ഞിരപ്പള്ളി കുഴിമഠത്തില്‍ സുബ്രന്റെ മകന്‍ കെ എസ് സുജിത്ത് എന്ന ജിത്തു (26) ആണ് മരിച്ച നിലയിൽ കണ്ടെത്തിയത്. രണ്ട് ദിവസം മുമ്പ് ഉത്സവാഘോഷത്തില്‍ പങ്കെടുത്ത് മടങ്ങിയ ജിത്തുവിനെ കാണാതായത്.

ഇയാളുടെ മൊബൈല്‍ ഫോണ്‍ വീടിനടുത്തുള്ള പാറമടയ്ക്ക് സമീപം കണ്ടെത്തിയിരുന്നു. ബുധനാഴ്ച അഗ്നിശമന സേനയും പൊലീസും നാട്ടുകാരും ചേര്‍ന്ന് തെരച്ചില്‍ ആരംഭിച്ചിരുന്നു. ഇന്ന് ഉച്ചയ്ക്ക് ഒരുമണിയോടെ മൃതദേഹം കണ്ടെത്തുകയായിരുന്നു. വെള്ളം നിറഞ്ഞ് കിടക്കുന്ന പാറമടയില്‍ നിന്നാണ് ജിത്തുവിന്റെ മൃതദേഹം കണ്ടെത്തിയത്.

ഇവിടുത്തെ മണ്ണില്‍ കാല്‍പ്പാടും വീഴുമ്പോഴുണ്ടാകുന്ന ലക്ഷണങ്ങളും കണ്ടെത്തിയിരുന്നു.സ്ഥിരമായി പാറമടയ്ക്ക് സമീപമിരുന്ന് സുജിത് ഫോണ്‍ ചെയ്യാറുണ്ടായിരുന്നെന്ന് സുഹൃത്തുക്കള്‍ സൂചന നല്‍കിയിരുന്നു. സംഭവത്തില്‍ ചാലക്കുടി പൊലീസ് അന്വേഷണം ആരംഭിച്ചു.