ചങ്ങനാശേരിയില്‍ നിന്ന് വേളാങ്കണ്ണിയിലേക്ക് സര്‍വീസ് നടത്തുന്ന കെ.എസ്.ആര്‍.ടി.സി സൂപ്പര്‍ എക്‌സ്പ്രസിന്റെ വാര്‍ത്തയായിരുന്നു കഴിഞ്ഞ ദിവസം മാധ്യമങ്ങളിലെല്ലാം നിറഞ്ഞുനിന്നിരുന്നത്. കെ സ്വിഫ്റ്റ് വരുന്നതോടെ ഈ ബസ് വഴിമാറിക്കൊടുക്കേണ്ടി വരും എന്നായിരുന്നു വാര്‍ത്ത.

എന്നാല്‍ വികാരഭരിതമായ നിരവധി നാടകീയതകള്‍ക്ക് ശേഷം പുതിയ ട്വിസ്റ്റ് സംഭവിച്ചിരിക്കുകയാണ്. അതായത്, യാത്രക്കാരുടേയും ജീവനക്കാരുടേയും ചങ്കായ ഈ പച്ചബസ് നിര്‍ത്തേണ്ടതില്ലെന്നും നിലവിലെ രീതിയില്‍ തുടര്‍ന്നാല്‍ മതിയെന്നുമാണ് സി.എം.ഡി ബിജു പ്രഭാകര്‍ നിര്‍ദ്ദേശം നല്‍കിയിരിക്കുന്നത്.

ബസിലെ ഡ്രൈവറായ പൊന്നുകുട്ടനും കണ്ടക്ടറായ ബിനോ മോനും ആ ബസിനെ സ്വന്തം കൂടപ്പിറപ്പിനെ പോലെയാണ് കണ്ടിരുന്നത്. ആ പരിപാലനം കണക്കിലെടുത്താണ് പുതിയ തീരുമാനം പുറത്ത് വന്നിരിക്കുന്നത്. നഷ്ടത്തിലോടുന്ന കെഎസ്ആര്‍ടിസി ബസിനെ ലാഭത്തിലാക്കാന്‍ സര്‍ക്കാര്‍ കൊണ്ടുവന്ന കെ സ്വിഫ്റ്റിന് വേണ്ടി ഇവരുടെ ആനവണ്ടിക്ക് വഴിമാറിക്കൊടുക്കേണ്ടി വന്നിരുന്നു.

എന്തിനേറെ പറയുന്നു ജീവനക്കാര്‍ക്ക് മാത്രമല്ല ഈ ബസിലെ സ്ഥിരം യാത്രക്കാര്‍ക്ക് പോലും ഈ വണ്ടിയുടെ മാറ്റം താങ്ങാവുന്നതിലും അപ്പുറമായിരുന്നു.

ഇത്രയും കാലം ഒരു കൂടപ്പിറപ്പിനെ പോലെ കൂടെ ഉണ്ടായിരുന്ന തങ്ങളുടെ പ്രിയപ്പെട്ട വാഹനത്തെ യാത്രയാക്കുമ്പോള്‍ പൊന്നുവിന്റേയും ബിനോ മോന്റേയും കണ്ണ് നിറഞ്ഞിരുന്നു. അവസാനമായി തങ്ങളുടെ വാഹനത്തില്‍ അവര്‍ മുത്തം വെക്കുന്ന ഫോട്ടോയും സമൂഹമാധ്യമങ്ങളില്‍ നിറഞ്ഞിരുന്നു. യഥാര്‍ത്ഥത്തില്‍ ഈ ചിത്രം പറയും ഈ രണ്ടു പേര്‍ക്കും ആ ബസ് എത്രമാത്രം പ്രിയങ്കരമായിരുന്നു എന്ന്.

കെ സ്വിഫ്റ്റ് വരുമ്പോള്‍ ധാരാളം കെഎസ്ആര്‍ടിസി ബസുകള്‍ ഇത്തരത്തില്‍ മാറ്റപ്പെടുന്നുണ്ടെങ്കിലും ഇന്നുവരെ മറ്റൊരു ബസിനും ഇതുപോലൊരു യാത്രായപ്പ് കിട്ടിക്കാണില്ല എന്നത് നിസ്സംശയം പറയാന്‍ കഴിയും. ആ ബസ് തന്റെ ജീവിതത്തില്‍ എത്രമാത്രം സ്വാധീനം ചെലുത്തിയിരുന്നു എന്ന് കണ്ടക്ടറായ ബിനോ മലയാളി വാര്‍ത്തയോട് പ്രതികരിച്ചത് ഇങ്ങനെയാണ്.

പാള്ളാച്ചി, പഴനി, തഞ്ചാവൂര്‍ എന്നിവിടങ്ങളിലൂടെയാണ് ബസ് വേളാങ്കണ്ണിയില്‍ എത്തുന്നത്. ഓരോ ദിവസവും അര ലക്ഷം രൂപയില്‍ അധികം വരുമാനം ഈ സര്‍വ്വീസിവല്‍ നിന്ന് കിട്ടാറുണ്ട്. മാത്രമല്ല മ്യൂസിക് സിസ്റ്റം, സൈഡ് കര്‍ട്ടന്‍, എല്‍ഇഡി ലൈറ്റ് തുടങ്ങി ന്യൂജെന്‍ സെറ്റപ്പിലാണ് വാഹനം നിരത്തിലിറങ്ങുന്നത്. അതുകൊണ്ട് തന്നെ നിരവധി ആരാധകരാണ് ഈ ബസിനുള്ളത്.

ബസ് സഞ്ചരിക്കുന്ന ദൂരം, അന്തര്‍സംസ്ഥാന സര്‍വീസ്, കാലപഴക്കം, സര്‍വീസിന്റെ പ്രാധാന്യം എന്നിവ പരിഗണിച്ചാണ് പഴയ ബസുകള്‍ക്ക് പകരം കെ.എസ്.ആര്‍.ടി.സി സ്വിഫ്ട് രംഗത്തിറക്കിയത്.