കെഎസ്ഇബി സമരം നമ്മള്‍ കണ്ടതാണ്. ഒരു വനിത ജീവനക്കാരി അനധികൃതമായി ജോലിയില്‍ ഹാജരാകാത്തതിനാല്‍ ഉണ്ടായ സസ്‌പെന്‍ഷനെ തുടര്‍ന്നാണ് സിഐടിയു അനുകൂല യൂണിയന്‍ സമരം നടത്തിയത്. അതാവട്ടെ നേതാവിന്റെ സസ്‌പെന്‍ഷനിലും അവസാനം സ്ഥലംമാറ്റത്തിലും അവസാനിച്ചു. ഇപ്പോഴിതാ സിഐടിയു രംഗത്തെത്തിയിരിക്കുന്നത് കെഎസ്ആര്‍ടിസിയ്‌ക്കെതിരെയാണ്.

പ്രക്ഷോഭം ശക്തമാക്കാനാണ് ഒരുങ്ങുന്നത്. ശമ്പളം വിതരണം ചെയ്യാത്തതില്‍ രൂക്ഷ വിമര്‍ശനവുമായി ഗതാഗത മന്ത്രി ആന്റണി രാജുവിനും കെഎസ്ആര്‍ടിസി എംഡി ബിജു പ്രഭാകറിനുമെതിരെ സിപിഎം അനുകൂല സംഘടനയായ കെഎസ്ആര്‍ടിഇഎ രംഗത്ത്. ആനപ്പുറത്ത് കയറിയാല്‍ പട്ടിയെ പേടിക്കണ്ട എന്ന നിലയിലാണ് മന്ത്രിയുടെ പ്രവര്‍ത്തനമെന്നും തങ്ങള്‍ കൂടി പ്രവര്‍ത്തിച്ചിട്ടാണ് ആന്റണി രാജു മന്ത്രിയായതെന്നും അധികാരം കിട്ടിയപ്പോള്‍ മന്ത്രി ജീവനക്കാര്‍ക്ക് എതിരെ രംഗത്തു വരികയാണെന്നും സംസ്ഥാന സെക്രട്ടറി വി.ശാന്തകുമാര്‍ തുറന്നടിച്ചു.

ആന്റണി രാജുവിനു കുറച്ചു കാലത്തേക്കെങ്കിലും കിട്ടിയ മന്ത്രിപ്പണിയാണെന്ന കാര്യം ഓര്‍മ വേണം. ആനപ്പുറത്ത് കയറിയാല്‍ പിന്നെ പട്ടിയെ പേടിക്കേണ്ട എന്ന പോലെ മന്ത്രിപ്പണി കിട്ടിയാല്‍ ഇത് ആജീവനാന്തമാണെന്നുള്ള വ്യാമോഹത്തോടും അഹങ്കാരത്തോടും തൊഴിലാളികളുടെ നെഞ്ചത്ത് കയറാന്‍ വന്നാല്‍ അതു വകവച്ചു കൊടുക്കില്ല. ശമ്പളവിതരണം ഉറപ്പാക്കേണ്ട ഉത്തരവാദിത്തം മന്ത്രിക്കാണ്.

ഒരു മാസത്തെ ശമ്പളം ആഘോഷവേളയില്‍ പോലും നല്‍കിയിട്ടില്ല. ശമ്പളം വൈകുന്നതിനു പിന്നില്‍ മന്ത്രിയുടെ കെടുകാര്യസ്ഥതയാണ്. ശമ്പളം നല്‍കാന്‍ കഴിവില്ലെങ്കില്‍ കെഎസ്ആര്‍ടിസി എംഡി രാജിവയ്ക്കണമെന്നും ശാന്തകുമാര്‍ പറഞ്ഞു.



കെഎസ്ആര്‍ടിസി കുത്തുപാളയെടുക്കുമ്പോള്‍ പുതുതായി തുടങ്ങിയ കെഎസ്ആര്‍ടിസിയുടെ സ്വിഫ്റ്റ് വാര്‍ത്തകളില്‍ നിറയുകയാണ്. കൃത്യമായ അജന്‍ഡയോടെ നല്‍കിയ തെറ്റായ വാര്‍ത്തകളും തരംതാഴ്ത്തലും കെഎസ്ആര്‍ടിസിയുടെ സ്വിഫ്റ്റ് സര്‍വീസിനു പ്രചാരണം ലഭിക്കാന്‍ സഹായിച്ചതായി കെഎസ്ആര്‍ടിസി.

സര്‍വീസ് ആരംഭിച്ചതിനു പിന്നാലെ സ്വിഫ്റ്റ് ബസുകള്‍ തുടര്‍ച്ചയായി അപകടത്തില്‍പ്പെടുന്നതായ റിപ്പോര്‍ട്ടുകള്‍ സമൂഹമാധ്യമങ്ങളില്‍ സജീവമായതിനു പിന്നാലെയാണ് ഫെയ്‌സ് ബുക് പേജിലൂടെ വിശദീകരണവുമായി കെഎസ്ആര്‍ടിസി എത്തിയത്.

ഏറ്റവും പുതിയ വാഹനങ്ങള്‍ക്കും പഴയ വാഹനങ്ങള്‍ക്കും അപകടം സംഭവിക്കാം. അപകടം എങ്ങനെ സംഭവിക്കുന്നു എന്നതാണ് പ്രധാനമെന്നും ഫെയ്‌സ് ബുക് പോസ്റ്റില്‍ ചൂണ്ടിക്കാട്ടി.

സ്വിഫ്റ്റ് ബസുകള്‍ ഓടിത്തുടങ്ങിയതോടെ സ്വകാര്യ ബസുകള്‍ നിരക്ക് കുറച്ചുവെന്ന അവകാശവാദവും കെഎസ്ആര്‍ടിസി ഉന്നയിച്ചു. സ്വകാര്യ ബസുകള്‍ അമിത നിരക്ക് ഈടാക്കുകയാണെന്നു ആരോപിച്ച് വ്യാഴാഴ്ച കെഎസ്ആര്‍ടിസി കുറിപ്പിട്ടിരുന്നു. ഇതിനു പിന്നാലെ സ്വകാര്യ ബസുകള്‍ നിരക്കു കുറച്ചുവെന്നാണ് കെഎസ്ആര്‍ടിസിയുടെ അവകാശവാദം.

അതിനിടെ മാവൂര്‍ റോഡ് കെഎസ്ആര്‍ടിസി ടെര്‍മിനലില്‍ സ്വിഫ്റ്റ് ബസുകള്‍ കൂട്ടിയിടിച്ച് ചില്ലുകള്‍ തകര്‍ന്നു. ബെംഗളൂരുവിലേക്ക് പോവാന്‍ നിര്‍ത്തിയിട്ട ബസില്‍, ബത്തേരിയില്‍നിന്ന് വന്ന ബസ് ഇടിക്കുകയായിരുന്നു.
കെഎസ്ആര്‍ടിസി സ്വിഫ്റ്റ് ബസുകള്‍ സര്‍വീസ് ആരംഭിച്ച അന്നു തന്നെ അപകടത്തില്‍പെട്ടിരുന്നു. ഏപ്രില്‍ 11ന് തിരുവനന്തപുരം ഡിപ്പോ, കല്ലമ്പലം എന്നിവിടങ്ങളും ഏപ്രില്‍ 12ന് മലപ്പുറം ജില്ലയിലെ കോട്ടയ്ക്കല്‍ വച്ചും അപകടം ഉണ്ടായി.

ഏപ്രില്‍ 14ന്, തൃശൂര്‍ കുന്നംകുളം മലായ ജംക്ഷനു മുന്നില്‍ വാനിടിച്ചു വീണ തമിഴ്‌നാട് സ്വദേശി പരസ്വാമി (55) യുടെ കാലില്‍ കൂടി സ്വിഫ്റ്റ് ബസ് കയറിയിറങ്ങിയിരുന്നു. പരസ്വാമിയെ ആശുപത്രിയിലെത്തിച്ചെങ്കിലും രക്ഷിക്കാനായില്ല.