കഴിഞ്ഞ് കുറച്ച് ദിവസങ്ങളായി ലുലു മാളിന്റേതെന്ന പേരിൽ വാട്സ്ആപ്പ്‌ വഴി വ്യാജ സന്ദേശങ്ങൾ പരക്കുന്നതായി റിപ്പോർട്ടുകൾ ചൂണ്ടിക്കാണിക്കുകയാണ്. റമദാൻ ഗിഫ്റ്റ് എന്ന പേരിൽ പറഞ്ഞ് ആളുകളെ ലിങ്കുകളിലേക്ക് ആകർഷിപ്പിച്ചു ഐ ഫോണും മറ്റും വാഗ്ദാനം ചെയ്യുകയാണ് ഈ വെബ്സൈറ്റ് പൊതുവെ ചെയ്യുന്നത്. ഇതുവഴി ആളുകളുടെ കോൺടാക്ട് നമ്പറും മറ്റു വിവരങ്ങളും ശേഖരിക്കുകയാണ് വ്യാജ ഗ്രൂപ്പിന്റെ ലക്ഷ്യമെന്നാണ് പോലീസിന്റെ പ്രാഥമിക വിലയിരുത്തൽ.

അതോടൊപ്പം തന്നെ ഇത്തരത്തിൽ ഒരു പ്രോഗ്രാം ലുലു മാൾ നടത്തുന്നില്ലെന്ന് സംഭവത്തിൽ അധികൃതർ അറിയിച്ചിരിക്കുകയാണ്. എന്നാൽ സംസ്ഥാനത്തിന്റെ പലയിടങ്ങളിലും ഈ വ്യാജ സന്ദേശം എത്തിയിരിക്കുകയാണ്. ലുലു ഹൈപ്പർ മാർക്കറ്റിന്റെ ചിഹ്നവും മറ്റും കൊടുത്താണ് ഈ വെബ്സൈറ്റ് നിർമ്മിക്കപ്പെട്ടിരിക്കുന്നത്. ആരും തന്നെ ആദ്യ കാഴ്ചയിൽ തന്നെ വീണുപോകുന്ന തരത്തിലുള്ള നിർമ്മിതിയാണ് ഇതിനുള്ളത്.

കൂടാതെ വാട്സ്ആപ്പ്‌ വഴി പ്രചരിക്കുന്ന ലിങ്കിൽ നമ്മളോട് ലോഗിൻ ചെയ്യാനും, തുടർന്ന് ആ ലിങ്ക് നമ്മുടെ തന്നെ 20 സുഹൃത്തുക്കൾക്കോ അല്ലെങ്കിൽ 5 ഗ്രൂപ്പുകൾക്കോ അയച്ച് നൽകണമെന്നാണ് നിർദ്ദേശം നൽകിയിരിക്കുന്നത്. ഇതേതുടർന്ന്, നിങ്ങൾക്ക് മുൻപിൽ തന്നെ ഒരു പട്ടിക തെളിയും അതിൽ ഐ ഫോൺ മുതൽ സൈക്കിൽ വരെ നല്കിയിട്ടുണ്ടാകും. മൂന്ന് ചാൻസിൽ മൂന്നാമത്തേതിൽ നിങ്ങൾക്ക് ഉറപ്പായും ഒരു സമ്മാനം ലഭിക്കുന്നതാണ്. തുടർന്നാണ് ഏറ്റവും വലിയ തട്ടിപ്പ് അരങ്ങേറാൻ പോകുന്നത് തന്നെ.

അതേസമയം അവർ നിങ്ങളോട് ഒരു അപ്ലിക്കേഷൻ ഡൌൺലോഡ് ചെയ്യാൻ ആവശ്യപ്പെടും. ഇത് അവസാനത്തെ സ്റ്റെപ് ആണ് എന്നതാണ്. അങ്ങനെ ഈ അപ്ലിക്കേഷൻ വഴിയാണ് വ്യാജ വെബ്സൈറ്റ് നമ്മളെ വലയിലാക്കാൻ പോകുന്നത്. അതുകൊണ്ട് സൂക്ഷിക്കുക. വ്യാജ പ്രചാരണങ്ങളിൽ ബോധവാന്മാരായിരിക്കുക എന്ന നിർദ്ദേശമാണ് അധികൃതർ അറിയിച്ചിരിക്കുന്നത്.