പെണ്‍കുട്ടികള്‍ക്ക് വിവാഹമല്ല വിദ്യാഭ്യാസമാണ് അത്യാവശ്യമെന്ന് ചൂണ്ടികാട്ടിയിരിക്കുകയാണ് ജയ ജയ്റ്റ്‌ലി അധ്യക്ഷയായ സമിതി. പെണ്‍കുട്ടികളുടെ വിവാഹപ്രായം സമ്പന്ധിച്ച് റിപ്പോര്‍ട്ട് തയ്യാറാക്കാനാണ് സമിതിയെ ഏര്‍പ്പെടുത്തിയിരുന്നത്. എന്നാല്‍ പെണ്‍കുട്ടികളുടെ ഉന്നതവിദ്യാഭ്യാസത്തിന് 5,000 രൂപയുടെ സ്‌കോളര്‍ഷിപ്പും സൗജന്യ യാത്രയും ഉറപ്പാക്കണമെന്നു സ്ത്രീകളുടെ വിവാഹപ്രായ പരിഷ്‌കരണം പഠിക്കാന്‍ കേന്ദ്രം നിയോഗിച്ച ജയ ജയ്റ്റ്‌ലി അധ്യക്ഷയായ സമിതി ശുപാര്‍ശ ചെയ്തു.

സമിതിയുടെ റിപ്പോര്‍ട്ട് വനിതകളുടെ വിവാഹപ്രായം 21 ആക്കി ഉയര്‍ത്താനുളള ബില്‍ പഠിക്കാനുള്ള പാര്‍ലമെന്ററി സമിതിയുടെ പരിഗണനയ്ക്കു വിട്ടു. ഉഡാന്‍, പ്രഗതി പദ്ധതികളിലെ സ്‌കോളര്‍ഷിപ് 10,000 രൂപയാക്കി വര്‍ധിപ്പിക്കണമെന്നും 18 വയസ്സുവരെയുള്ള പെണ്‍കുട്ടികള്‍ക്ക് ലഭിക്കുന്ന ആനുകൂല്യങ്ങള്‍ 21 വയസ്സുവരെയാക്കണമെന്നും ശുപാര്‍ശയുണ്ട്.

വനിതകളുടെ വിവാഹപ്രായം 21 ആക്കുന്നത് വിജ്ഞാപനം ചെയ്ത് 2 വര്‍ഷത്തിനകം പ്രാബല്യത്തില്‍ വരുത്തുകയോ ഓരോ വര്‍ഷവും പ്രായം വര്‍ധിപ്പിച്ച് 3 വര്‍ഷത്തിനുള്ളില്‍ 21 ആക്കുകയോ ചെയ്യാമെന്നാണ് നിര്‍ദേശം. ഓരോ വര്‍ഷവും പ്രായം കൂട്ടിയാല്‍ ആശയക്കുഴപ്പം മൂലം പാവപ്പെട്ടവര്‍ ശിക്ഷാനടപടികള്‍ക്കു വിധേയരാകാന്‍ ഇടയുണ്ടെന്ന് സമിതി ചൂണ്ടിക്കാട്ടി.

ആളുകള്‍ക്ക് മാനസികമായി തയാറെടുക്കാന്‍ വിജ്ഞാപനത്തിനു ശേഷം 2 വര്‍ഷം കൊടുക്കുന്ന രീതിയില്‍ ആശയക്കുഴപ്പമുണ്ടാകില്ലെങ്കിലും ഒറ്റയടിക്ക് 3 വര്‍ഷം വര്‍ധിപ്പിക്കുന്നതു പ്രശ്‌നമുണ്ടാക്കിയേക്കാമെന്നും സമിതി പറഞ്ഞു.

പെണ്‍കുട്ടികള്‍ക്ക് ടാബ്‌ലറ്റും ലാപ്‌ടോപ്പും നല്‍കുക, പ്രഫഷനല്‍ കോഴ്‌സുകളില്‍ വനിത ക്വോട്ട അനുവദിക്കുക തുടങ്ങിയ ശുപാര്‍ശകളും നല്‍കിയിട്ടുണ്ട്. പെണ്‍കുട്ടികളുടെ ഉന്നത വിദ്യാഭ്യാസത്തിന് മുന്‍തൂക്കം നല്‍കിയുള്ള റിപ്പോര്‍ട്ടാണ് ജയ ജയ്റ്റ്‌ലി അധ്യക്ഷയായ സമിതി നല്‍കിയിരിക്കുന്നത്.