കൊല്ലം കല്ലുംതാഴത്ത് വധു കല്യാണ മണ്ഡപത്തിൽ നിന്ന് ഇറങ്ങിയോടി. വരൻ താലികെട്ടാൻ ഒരുങ്ങവെ വധു ഇറങ്ങിയോടി ഗ്രീൻ റൂമിൽ കയറി ഒളിച്ചിരുന്നു. ഇതോടെ വരന്റേയും വധുവിന്റേയും വീട്ടുകാർ തമ്മിൽ സംഘർഷമുണ്ടായി. മൺറോത്തുരുത്ത് സ്വദേശിയായ യുവാവും കല്ലുംതാഴം സ്വദേശിനിയായ യുവതിയും തമ്മിലാണ് വിവാഹം നിശ്ചയിച്ചിരുന്നത്.

ഞായറാഴ്ച 11 കഴിഞ്ഞുള്ള മുഹൂർത്തത്തിലായിരുന്നു താലികെട്ട് നടക്കേണ്ടിയിരുന്നത്. ചടങ്ങുകൾക്കായി വരനും വധുവും മണ്ഡപത്തിലെത്തി. ഇരുവരുടെയും ബന്ധുക്കളും വേദിയിലുണ്ടായിരുന്നു. എന്നാൽ വധു മണ്ഡപത്തിൽ നിന്ന് ഇറങ്ങി ഓടുകയായിരുന്നു.ഇതിന് പിന്നാലെയാണ് ചെക്കൻ കൂട്ടരും പെണ്ണുവീട്ടുകാരും തമ്മിലുള്ള സംഘർഷം.

കിളികൊല്ലൂർ പൊലീസ് ഇടപെട്ടാണ് സ്ഥലത്ത് എത്തിയാണ് സംഘർഷാവസ്ഥ ഒഴിവാക്കിയത്. വരന്റെ വീട്ടുകാർക്ക് വധുവിന്റെ കുടുംബം നഷ്ടപരിഹാരം നൽകാമെന്ന് പൊലീസ് സ്റ്റേഷനിൽ വെച്ച് ഉറപ്പ് നൽകി. വധുവിന് കുടുംബത്തിൽ തന്നെയുള്ള മറ്റൊരു യുവാവുമായി അടുപ്പമുണ്ടായിരുന്നു. ഇക്കാരണത്താലണ് താലികെട്ടിന് തയ്യാറാകാതെ കല്യാണ മണ്ഡപത്തിൽ നിന്ന് ഇറങ്ങിയോടി ഒളിച്ചത്.