കശുവണ്ടി ശേഖരിക്കാനും കേടുപാടുകൾ കൂടാതെ സൂക്ഷിക്കാനും പോലീസുകാരെ ചുമതലപ്പെടുത്തി പുതിയ ഉത്തരവ് പുറത്തിറക്കി. കണ്ണൂർ കെഎപി നാലാം ബറ്റാലിയൻ കമാണ്ടൻ്റാണ് കഴിഞ്ഞ ദിവസം ഉത്തരവിറക്കിയിരിക്കുന്നത്. കെഎപി ബറ്റാലിയൻ്റെ അധീനതയിലുള്ള സ്ഥലങ്ങളിലെ കശുവണ്ടികൾ താഴെവീണു നശിച്ചുപോകുന്ന പശ്ചാത്തലത്തിലാണ് ഇവ ശേഖരിക്കുന്നതിനായി മൂന്നു പോലീസുകാരെ ചുമതലപ്പെടുത്തി ഉത്തരവിറക്കിയിരിക്കുന്നത്.

ഉത്തരവിൽ പറയുന്നത് ഇങ്ങനെ;

കെഎപി നാലാം ബറ്റാലിയൻ്റെ അധീനതയിലുള്ള സ്ഥലങ്ങളിൽ സ്ഥിതി ചെയ്യുന്ന കശുമാവുകളിൽ നിന്നും കശുവണ്ടി ശേഖരിക്കുന്നതു സംബന്ധിച്ച് 4 തവണ ലേലം നടത്തി. എന്നാൽ കാലാവസ്ഥാ വ്യതിയാനം കാരണം ഈ വർഷം കശുവണ്ടിയുടെ ഉത്പാദനത്തിൽ കുറവുവന്നു, വിപണിയിൽ വില കുറവായി, ദേശീയപാതാ വികസനവുമായി ബന്ധപ്പെട്ട് കശുമാവുകളുടെ എണ്ണം കുറഞ്ഞു തുടങ്ങിയ കാരണങ്ങൾ കാണിച്ച് ആരും തന്നെ ലേലം കൊള്ളുന്നതിനു തയ്യാറാകുന്നില്ല.

നിലവിൽ പാകമായ കശുവണ്ടികൾ നശിച്ചുപോകുന്ന അവസ്ഥയാണുള്ളത്. ആയതിനാൽ താഴെ വീഴുന്ന കശുവണ്ടികൾ നശിച്ചുപോകുന്നതിനു മുൻപ് ശേഖരിക്കുന്നതിനും കേടുപാടുകൾ കൂടാതെ സൂക്ഷിക്കുന്നതിനും സേനാംഗങ്ങളെ ചുമതലപ്പെടുത്തി ഉത്തരവാകുന്നു.

സബ് ഇൻസ്‌പെക്ടർ റാങ്കിലുള്ള ഒരാളെയും രണ്ട് ഹവിൽദാർമാരെയും ആണ് ചുമതലപ്പെടുത്തിയിരിക്കുന്നത്. ശേഖരിക്കുന്ന കശുവണ്ടികളുടെ അളവുകൾ കൃത്യമായി രേഖപ്പെടുത്തി എല്ലാ ആഴ്ചകളിലും അസിസ്റ്റൻ്റ് കമാണ്ടൻ്റിനെ അറിയിക്കണമെന്നും ഉത്തരവിൽ പറയുന്നുണ്ട്. കശുവണ്ടി പെറുക്കാൻ പോലീസ് സേനാംഗങ്ങളെ ചുമതലപ്പെടുത്തിയുള്ള ഉത്തരവിനെ പരിഹസിച്ച് സമൂഹ മാധ്യമങ്ങളിൽ ട്രോളുകൾ പ്രത്യക്ഷപ്പെട്ടു.

അതേസമയം പോലീസ് സംഘടനയിൽ നിന്നുതന്നെ വിമർശനം ഉയർന്നതോടെ ആദ്യം ഇറക്കിയ ഉത്തരവ് പിൻവലിച്ചു പുതിയ ഉത്തരവിറക്കി. കശുവണ്ടികൾ ശേഖരിക്കുന്നതിനും കേടുപാടുകൾ കൂടാതെ സൂക്ഷിക്കുന്നതിനുമുള്ള നടപടികൾ അസിസ്റ്റൻ്റ് കമാണ്ടൻ്റ് ക്യുഎം സ്വീകരിക്കേണ്ടതാണെന്നു തിരുത്തിയാണ് പുതിയ ഉത്തരവ് ഇറക്കിയത്.