അമേരിക്കന്‍ ചികിത്സ കഴിഞ്ഞ് മടങ്ങിയെത്തി മുഖ്യമന്ത്രി.... തെരഞ്ഞെടുപ്പു വേളയില്‍ തന്റെ സാന്നിധ്യം വേണമെന്ന നിലപാടില്‍ ദുബായിലെ വിശ്രമം ഒഴിവാക്കി മുഖ്യമന്ത്രി നാട്ടിലേക്ക് മടങ്ങിയെത്തി, ജോ ജോസഫിന്റെ തെരഞ്ഞെടുപ്പു കണ്‍വെന്‍ഷനില്‍ മുഖ്യമന്ത്രി പങ്കെടുത്തേക്കും

ഇന്ന് പുലര്‍ച്ചയൊണ് മുഖ്യമന്ത്രി തിരുവനന്തപുരത്ത് എത്തിയത്. ക്ലിഫ്ഹൗസില്‍ വിശ്രമിക്കുന്ന മുഖ്യമന്ത്രിയുടെ തുടര്‍ പരിപാടികള്‍ വഴിയേ മാത്രമേ അറിയാന്‍ സാധിക്കൂകയുള്ളൂ.

അദ്ദേഹത്തിന് കൂടുതല്‍ സമയം വിശ്രമം വേണ്ടിവരുമോ അതോ വീണ്ടും സജീവമാകുമോ എന്ന കാര്യത്തില്‍ വ്യക്തത വന്നിട്ടില്ല. ഈ മാസം 12ന് നടക്കുന്ന ജോ ജോസഫിന്റെ തെരഞ്ഞെടുപ്പു കണ്‍വെന്‍ഷനില്‍ മുഖ്യമന്ത്രി പങ്കെടുത്തേക്കും.


തെരഞ്ഞെടുപ്പിന്റെ പശ്ചാത്തലത്തില്‍ കെ റെയില്‍ കല്ലിടല്‍ അടക്കം നിര്‍ത്തിവെച്ചിരിക്കുകയാണ്. ഇത് വീണ്ടും പുനരാരംഭിക്കുമോ എന്നത് കണ്ടറിയാം. മുഖ്യമന്ത്രിയുടെ നിലപാടാകും ഇക്കാര്യത്തില്‍ നിര്‍ണായകമാകുക എന്നത് ഉറപ്പാണ്.

അതേസമയം പത്താം തീയതി മുഖ്യമന്ത്രി മടങ്ങിയെത്തുമെന്നായിരുന്നു സൂചനകള്‍. ഇതിനിടെ അദ്ദേഹം അമേരിക്കയില്‍ വിശ്രമിക്കുമെന്ന സൂചനകളും ഉണ്ടായിരുന്നു. എന്നാല്‍ തെരഞ്ഞെടുപ്പു വേളയില്‍ തന്റെ സാന്നിധ്യം വേണമെന്ന നിലപാടിലാണ് മുഖ്യമന്ത്രി മടങ്ങി നാട്ടിലേക്ക് എത്തിയിരിക്കുന്നത്.

ഉപതെരഞ്ഞെടുപ്പിനെ സംബന്ധിച്ച് മുഖ്യമന്ത്രി നേതാക്കള്‍ക്ക് മാര്‍ഗനിര്‍ദ്ദേശങ്ങള്‍ നല്‍കിയിരുന്നു. യുഡിഎഫിന്റെ സിറ്റിങ് സീറ്റ് എന്ന നിലയിലാകരുത് പ്രചാരണമെന്നും സീറ്റ് തിരിച്ചുപിടിക്കാന്‍ വേണ്ടിയുള്ള പ്രവര്‍ത്തനമാണ് കാഴ്ചവെക്കേണ്ടതെന്നും മുഖ്യമന്ത്രി നിര്‍ദ്ദേശിച്ചിരുന്നവെന്നും വെളിപ്പെടുത്തുകയും ചെയ്തു. തൃക്കാക്കരയില്‍ 12ന് മുഖ്യമന്ത്രി എത്തുന്നതോടെ പ്രചരണം പുതിയ തലത്തിലെത്തും.

ഡോ ജോ ജോസഫിനെ തൃക്കാക്കരയില്‍ സ്ഥാനാര്‍ത്ഥിയാക്കിയതും മുഖ്യമന്ത്രിയുടെ അമേരിക്കയില്‍ നിന്നുള്ള ഇടപെടലാണ്. സിപിഎം സംസ്ഥാന സെക്രട്ടറി കോടിയേരി ബാലകൃഷ്ണനും ചികില്‍സയ്ക്കായി അമേരിക്കയിലാണുള്ളത്. അതുകൊണ്ട് തന്നെ കോടിയേരിയും കണ്‍വെന്‍ഷനില്‍ അസാന്നിധ്യമാകും.

പ്രചരണത്തിന്റെ ആദ്യ ഘട്ടത്തില്‍ തന്നെ പിണറായി എത്തുന്നത് ഇടതു മുന്നണിക്ക് ആവേശമാകും. തൃക്കാക്കര ഉപതെരഞ്ഞെടുപ്പില്‍ യുഡിഎഫ് സ്ഥാനാര്‍ത്ഥി ഉമാ തോമസും എല്‍ഡിഎഫ് സ്ഥാനാര്‍ത്ഥി ഡോ. ജോ ജോസഫും തമ്മില്‍ പൊരിഞ്ഞ മത്സരമാണ്.