കഞ്ചാവ് വില്‍ക്കുന്ന വിവരം എക്‌സൈസ് സംഘത്തിന് നല്‍കിയെന്ന സംശയത്തില്‍ കഞ്ചാവ് കേസിലെ പ്രതി അയല്‍വാസിയെ കുത്തിപ്പരിക്കേല്‍പ്പിച്ചു... പ്രതികള്‍ ഒളിവില്‍.

കിഴക്കന്‍ മുത്തൂര്‍ നാട്ടുകടവ് എസ്എന്‍ഡിപി ഗുരുമന്ദിരത്തിന് സമീപം വച്ച് പയ്യാംപ്ലാത്ത തോമസ് ജോസഫിനാണ്(39) കുത്തേറ്റത്. ഗുരുതരമായി പരുക്കേറ്റ ഇദ്ദേഹത്തെ കോട്ടയം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.

കഴിഞ്ഞ രാത്രി ഒമ്പതരയോടെയാണ് സംഭവമുണ്ടായത്. കുറ്റപ്പുഴ കണ്ടത്തിന്‍കരയില്‍ രാഹുല്‍ രാജനാ(24)ണ് ആക്രമിച്ചതെന്ന് തോമസ് പൊലീസിന് മൊഴി നല്‍കി. തോമസിന്റെ ഇടതുകൈയുടെ തോള്‍ പലകയ്ക്കും തോളിന് പിന്നിലായി വലതു വശത്തും നെറ്റിക്കും ആഴത്തില്‍ മുറിവുണ്ട്. തോള്‍ പലകയ്ക്കു ഉണ്ടായ മുറിവ് ഗുരുതരമാണ്. മുഖത്തും നാലോളം മുറിവുകള്‍ ഉണ്ട്. കത്തി ഉപയോഗിച്ചായിരുന്നു ആക്രമണമുണ്ടായത്.

മൂന്നു മാസം മുന്‍പ് രാഹുല്‍ രാജന്റെ ബൈക്ക് കഞ്ചാവ് സഹിതം എക്‌സൈസ് പിടിച്ചെടുത്തിരുന്നു. കേസില്‍ ഇയാളെ പ്രതിയാക്കി എക്‌സൈസ് കേസെടുത്തു. തോമസിന്റെ വീടിന് മുന്നിലെ വഴിയില്‍ ഇരുന്ന ബൈക്കാണ് പിടികൂടിയത്. ഇത് തോമസ് ഒറ്റു കൊടുത്തതാണെന്നു പറഞ്ഞ് ഇന്നലെ വൈകിട്ട് രാഹുലും മറ്റൊരാളും വീടിന് മുന്നില്‍ ചെന്ന് ചീത്ത വിളിക്കുകയും വധഭീഷണി മുഴക്കുകയും ചെയ്തിരുന്നു. ഈ സമയം തോമസ് വീട്ടിലില്ലായിരുന്നു.


പിന്നീട് വീട്ടുസാധനം വാങ്ങാന്‍ സ്‌കൂട്ടറില്‍ പുറത്തേക്ക് പോയ തോമസിനെയാണ് പ്രതികള്‍ നാട്ടുകടവില്‍ വച്ച് ആക്രമിച്ചത്. തോളിന് പിന്നില്‍ കുത്തി വീഴ്ത്തുകയാണ് ചെയ്തത്. തുടര്‍ന്ന് മുഖത്ത് നിരവധി തവണ കുത്തിപ്പരുക്കേല്‍പ്പിച്ചു. തിരുവല്ല പൊലീസ് കോട്ടയം മെഡിക്കല്‍ കോളജില്‍ എത്തി മൊഴിയെടുത്തു.