അപ്രതീക്ഷിതമായ ചില കാര്യങ്ങളാണ് നമ്മുടെ ദൈനംദിന ജീവിതത്തില്‍ ഓരോ ദിവസവും നടന്നുകൊണ്ടിരിക്കുന്നത്. അത്തരത്തില്‍ ഒരു അപ്രതീക്ഷിത സംഭവമാണ് തൊടുപുഴ ഉണ്ടായത്. മാല മോഷണക്കേസില്‍ 33 വര്‍ഷങ്ങള്‍ക്ക് മുമ്പ് തൊണ്ടി മുതലെന്ന് പറഞ്ഞ് പോലീസ് കൊണ്ടുപോയ സ്വര്‍ണം ഉടമക്ക് തിരിച്ചുകിട്ടി.

സംഗതി പത്ത് ഗ്രാമേ ഉള്ളൂ എങ്കിലും അതിന്റെ വില പറഞ്ഞറിയിക്കാന്‍ കഴിയില്ലെന്നാണ് ഉടമ പറയുന്നത്. തൊടുപുഴ സ്വദേശി മാത്യുവിനാണ് 33വര്‍ഷം മുമ്പ് പോലീസ് കൊണ്ടുപോയ 10 ഗ്രാം സ്വര്‍ണം തിരികെ കിട്ടിയത്. കേസ് തെളിയിക്കാന്‍ പൊലീസ് പരാജയപ്പെട്ടതോടെ സ്വര്‍ണം എടുത്തയിടത്ത് തിരികെ എത്തിക്കാന്‍ കോടതി വിധി വിധിച്ചതിനെ തുടര്‍ന്നാണ് ഈ ഭാഗ്യം മാത്യുവിന് ലഭിച്ചത്.

അതേസമയം ഈ സ്വര്‍ണം തന്റെ കൈയ്യില്‍ ഇനി വെയ്ക്കില്ലെന്നും അത് വിറ്റ് ആ പണം ഡയാലിസിസ് രോഗികളെ സഹായിക്കാന്‍ വേണ്ടി നല്‍കുമെന്നുമാണ് അദ്ദേഹം പറഞ്ഞത്. തൊടുപുഴയില്‍ കണ്ടിരിക്കല്‍ എന്ന ജ്വല്ലറിയുടെ ഉടമയാണ് മാത്യു.

ഈ സംഭവം നടന്നത് 1989 ഒക്ടോബറിലാണ്. അന്ന് മുട്ടത്ത് ഒരു സ്ത്രീയുടെ മാല മോഷണം പോവുകയും ഈ കേസില്‍ അറസ്റ്റിലായ പ്രതിയുമായി കാഞ്ഞാര്‍ പൊലീസ് ജ്വല്ലറിയിലെത്തുകയും ചെയ്തു. എന്നാല്‍ അറസ്റ്റിലായ പ്രിതി മോഷ്ടിച്ച 10 ഗ്രാമിന്റെ മാല മാത്യുവിന് വിറ്റെന്ന് മൊഴി നല്‍കിയിരുന്നു. ഒന്നുകില്‍ സ്വര്‍ണം നല്‍കുക അല്ലെങ്കില്‍ പ്രതിക്കൊപ്പം സ്റ്റേഷനിലേക്ക് പോകുക എന്നതു മാത്രമായിരുന്നു പൊലീസ് നിര്‍ദേശം. ജ്വല്ലറിയില്‍ ഇരുന്ന പുതിയ ഒരു മാലയെടുത്ത് ഉരുക്കി കട്ടിയാക്കി പൊലീസിനു നല്‍കിയെങ്കിലും സ്വര്‍ണം തന്റേതാണെന്നു രേഖകള്‍ സഹിതം മാത്യു പിറ്റേന്നു തന്നെ പരാതി നല്‍കി.

എന്നാല്‍ കേസ് തെളിയിക്കാന്‍ പൊലീസ് പരാജയപ്പെട്ടതോടെ കാര്യങ്ങളെല്ലാം തലകീഴായി മറിഞ്ഞു. ആറുമാസം മുമ്പ് കാഞ്ഞാര്‍ സ്റ്റേഷനില്‍ നിന്ന് മാത്യുവിന് ഒരു വിളി വന്നു. സ്വര്‍ണം ഏറ്റെടുക്കാന്‍ തൊടുപുഴ ഒന്നാം ക്ലാസ് മജിസ്‌ട്രേറ്റ് കോടതിയില്‍ എത്തിച്ചേരാനായിരുന്നു ആവശ്യം. ഒടുവിന്‍ മാത്യു സ്വര്‍ണം കൈപ്പറ്റി.