പ്ലാന് മാറ്റി വിജയ്ബാബു... ജാമ്യം ലഭിക്കാതെ നാട്ടിലേക്കില്ലെന്ന് ഉറച്ച് വിജയ് ബാബു; വിമാനടിക്കറ്റ് ഹാജരാക്കിയത് മുന്കൂര് ജാമ്യം ലഭിക്കാനുള്ള തന്ത്രം; വിജയ് ബാബുവിനെ കണ്ടെത്താനാകാതെ കേരള പോലീസ്; ദുബായിലുണ്ടോ ജോര്ജിയയിലുണ്ടോ എന്ന കാര്യത്തിലും അവ്യക്തത; കോടതിയുടെ നിര്ണായക വിധി ഇന്ന്
പുതുമുഖ നടിയെ പീഡിപ്പിച്ച കേസില് വിദേശത്ത് ഒളിവില് കഴിയുന്ന വിജയ്ബാബു എന്ന് എത്തുമെന്ന് ഒരു ഉറപ്പുമില്ല. മുന്കൂര് ജാമ്യം ലഭിക്കാതെ നാട്ടിലെത്തുന്ന പ്രശ്നമില്ല. തത്ക്കാലം ജയിലിലേക്കില്ല. മുന്കൂര് ജാമ്യ ഹര്ജിക്കൊപ്പം പ്രതിഭാഗം ഹാജരാക്കിയ വിമാനടിക്കറ്റ് പ്രകാരം വിജയ് ബാബു ഇന്നാണു മടങ്ങിയെത്തേണ്ടത്.
എന്നാല് വിജയ് ബാബു മടങ്ങിയെത്തില്ല. മുന്കൂര് ജാമ്യം ലഭിക്കാനുള്ള തന്ത്രമാണു വിമാനടിക്കറ്റെന്നാണ് അന്വേഷണ സംഘത്തിനു ലഭിച്ച രഹസ്യ വിവരം. പാസ്പോര്ട്ട് റദ്ദാക്കപ്പെട്ടതിനു പുറമേ വിജയ്ബാബുവിനെതിരെ മജിസ്ട്രേട്ട് കോടതി പുറപ്പെടുവിച്ച അറസ്റ്റ് വാറന്റ് നിലവിലുണ്ട്. ഈ സാഹചര്യത്തില് വിജയ്ബാബുവിനെ വിമാനത്താവളത്തില് വച്ചു തന്നെ പൊലീസിന് അറസ്റ്റ് ചെയ്യാന് നിയമതടസമില്ല. ഈ സാഹചര്യത്തില് അറസ്റ്റിനു വഴങ്ങാന് തയാറല്ലെങ്കില് വിജയ്ബാബു ഇന്നു നാട്ടിലേക്കുള്ള യാത്ര ഒഴിവാക്കാനാണു സാധ്യത.
അതിനാലാണ് മുന്കൂര് ജാമ്യേപേക്ഷ കിട്ടാതെ നാട്ടിലേക്കില്ലെന്ന് തീരുമാനിച്ചത്. ലൈംഗിക പീഡനക്കേസില് ആരോപണ വിധേയനായ വിജയ് ബാബു തിങ്കളാഴ്ച വിദേശത്തുനിന്ന് എത്തിയാല് അറസ്റ്റ് ചെയ്യുമെന്ന് കൊച്ചി സിറ്റി പൊലീസ് കമ്മിണര് സി.എച്ച്.നാഗരാജു പറഞ്ഞു. ലുക്കൗട്ട് നോട്ടിസ് ഉള്ളതിനാല് അറസ്റ്റ് ചെയ്യുന്നതിന് തടസ്സമില്ല. വിജയ് ബാബുവിന് സഹായം നല്കിയവരെ ചോദ്യം ചെയ്യുമെന്നും കമ്മിഷണര് പറഞ്ഞു.
നാട്ടില് തിരിച്ചെത്തിയില്ലെങ്കില് ജാമ്യഹര്ജി തള്ളുമെന്ന നിലപാട് കോടതി കഴിഞ്ഞദിവസവും ആവര്ത്തിച്ചു. നേരത്തേ, വിജയ് ബാബുവിന്റെ ജാമ്യഹര്ജിയെ എതിര്ത്ത് അതിജീവിത കോടതിയെ സമീപിച്ചിരുന്നു. വിജയ് ബാബുവിനു മുന്കൂര് ജാമ്യം നല്കരുതെന്നും പ്രതി ജാമ്യവ്യവസ്ഥ നിശ്ചയിക്കുന്ന സാഹചര്യം ഒഴിവാക്കണമെന്നും നടി അവശ്യപ്പെട്ടു.
അതേസമയം വിജയ് ബാബുവിന്റെ കാര്യങ്ങള് മുറപോലെ നടക്കുന്നുണ്ട്. അതിനിടെ, വിജയ് ബാബുവിനു വേണ്ടി 2 ക്രെഡിറ്റ് കാര്ഡുകള് ദുബായില് എത്തിച്ചതായി അന്വേഷണ സംഘത്തിനു വിവരം ലഭിച്ചു. വിജയ് ബാബുവിന്റെ അടുത്ത സുഹൃത്താണ് ഇത് എത്തിച്ചത്. കേസില് മുന്കൂര് ജാമ്യം ലഭിക്കുംവരെ വിദേശത്തു തങ്ങാനുള്ള പണം തീര്ന്നതിനെ തുടര്ന്നാണു ക്രെഡിറ്റ് കാര്ഡുകള് എത്തിച്ചു തരാന് വിജയ് ബാബു സിനിമാരംഗത്ത് പ്രവര്ത്തിക്കുന്ന സുഹൃത്തിനോട് ആവശ്യപ്പെട്ടത്. തൃശൂര് കൊടുങ്ങല്ലൂരിലെ സിനിമാ ഷൂട്ടിങ് ലൊക്കേഷനില് നിന്നാണു സുഹൃത്ത് നെടുമ്പാശേരി വഴി ദുബായിലെത്തി ക്രെഡിറ്റ് കാര്ഡുകള് കൈമാറിയത്.
അതേസമയം വിജയ് ബാബു കേസ് റജിസ്റ്റര് ചെയ്യുന്നതിനു മുന്പ് നടിയുടെ അമ്മയെയും ഫോണില് വിളിച്ചു ഭീഷണിപ്പെടുത്തിയിരുന്നെന്നു സര്ക്കാര് ഹൈക്കോടതിയില് അറിയിച്ചു. വിജയ് ബാബുവിന്റെ മുന്കൂര് ജാമ്യാപേക്ഷ നിലനില്ക്കില്ലെന്നും സര്ക്കാര് ഹൈക്കോടതിയില് വിശദീകരിച്ചു. തുടര്ന്നു ഹൈക്കോടതി ഹര്ജി ഇന്ന് പരിഗണിക്കാന് മാറ്റി.
നടി പൊലീസില് പരാതിപ്പെട്ടതടക്കമുള്ള വിവരങ്ങള് വിജയ് ബാബുവിന് അറിയാമായിരുന്നു. കേസെടുക്കുമെന്ന് അറിഞ്ഞു കൊണ്ടാണു വിദേശത്തേക്കു കടന്നത്. ഏപ്രില് 19നാണു ഫോണില് വിളിച്ചു ഭീഷണിപ്പെടുത്തിയത്. പ്രതി അതിജീവിതയുടെ പേര് വെളിപ്പെടുത്തി. വിദേശത്തുള്ളയാളുടെ മുന്കൂര് ജാമ്യാപേക്ഷ നിയമപരമായി നിലനില്ക്കില്ലെന്നും സര്ക്കാരിനുവേണ്ടി ഹാജരായ അഡീഷനല് പ്രോസിക്യൂഷന് ഡയറക്ടര് ജനറല് ഗ്രേഷ്യസ് കുര്യാക്കോസ് ഹൈക്കോടതിയില് പറഞ്ഞു.
എന്നാല് ഉപഹര്ജിയില് താന് വിദേശത്താണെന്നതടക്കമുള്ള വിവരങ്ങള് ഉള്പ്പെടുത്തിയിട്ടുണ്ടെന്നും അതിനാല് ഹര്ജി നിലനില്ക്കുമെന്നും വിജയ് ബാബുവിനു വേണ്ടി ഹാജരായ അഡ്വ.എസ്.രാജീവ് വാദിച്ചു. ഏപ്രില് 22നാണ് കേസ് റജിസ്റ്റര് ചെയ്തത്. അതിനു മുന്പ് കേരളത്തില്നിന്നു പോയിരുന്നു.
"
https://www.facebook.com/Malayalivartha
