വീട്ടുവളപ്പില്‍ കഞ്ചാവുചെടി നട്ടുവളര്‍ത്തിയ യുവാവ് അറസ്റ്റില്‍.കഞ്ചാവ് വില്‍പ്പന നടത്താന്‍ വേണ്ടിയാണ് ഫൈസല്‍ വീട്ടില്‍ കഞ്ചാവുചെടികള്‍ നട്ടുവളര്‍ത്തിയതെന്ന് പോലീസ് പറഞ്ഞു. നെടുമങ്ങാട് അരശുപറമ്പ് തോട്ടുമുക്കില്‍ എന്‍.ഫൈസലിനെ(20) ആണ് നെടുമങ്ങാട് പോലീസ് അറസ്റ്റു ചെയ്തത്. പ്രതിയെ നെടുമങ്ങാട് കോടതിയില്‍ ഹാജരാക്കി റിമാന്‍ഡ് ചെയ്തു.


ഈ പ്രദേശത്ത് കഞ്ചാവ് വില്‍ക്കുന്ന യുവാക്കള്‍ പോലീസിന്റെ നിരീക്ഷണത്തിലായിരുന്നു. ബൈക്കുകളില്‍ കറങ്ങി നടന്ന് ചെറിയ പൊതികളാക്കിയാണ് ഇവര്‍ കഞ്ചാവ് വില്‍ക്കുന്നത്.

് ഇവരുടെ ഇര പ്രധാനമായും കോളേജ് വിദ്യാര്‍ഥികളാണ്. കഞ്ചാവ് ഉപയോഗിച്ച് പ്രദേശത്ത് അക്രമങ്ങളില്‍ ഏര്‍പ്പെടുന്നതും പതിവായിരുന്നു.
ഇത് തടയുന്നതിനുവേണ്ടി സമീപദിവസങ്ങളില്‍ നാട്ടുകാര്‍ സംഘടിച്ച് റസിഡന്റ്‌സ് അസോസിയേഷന്‍ രൂപവത്കരിച്ച് എക്‌സൈസിനും പോലീസിനും പരാതികള്‍ നല്‍കിയിരുന്നു. ഇതിന് പിന്നാലെയാണ് പോലീസ് നിരീക്ഷണം ശക്തമാക്കിയിരുന്നത്.