പ്രവാസി സ്വര്‍ണവ്യാപാരിയുടെ വീട്ടില്‍നിന്ന് 2.67 കിലോഗ്രാം സ്വര്‍ണവും രണ്ടു ലക്ഷം രൂപയും കവര്‍ന്ന കേസിലെ പ്രതിയെ പോലീസ് പിടികൂടി. പോലീസ് കസ്റ്റഡിയിലുള്ള പ്രതിയുടെ അറസ്റ്റ് ഇന്ന് ഉച്ചയോടെ രേഖപ്പെടുത്തുമെന്ന് ഉന്നത ഉദ്യോഗസ്ഥര്‍ .

കവര്‍ച്ച നടന്ന് 18 ദിവസത്തിനുള്ളിലാണ് പ്രതി പോലീസ് വലയിലായത്. കവര്‍ച്ച നടന്ന വീട്ടില്‍ വിരലടയാളംപോലും അവശേഷിപ്പിക്കാതെയാണ് പ്രതി കവര്‍ച്ച നടന്ന വീട്ടില്‍നിന്ന് രക്ഷപ്പെട്ടിരുന്നത്. ഗുരുവായൂര്‍ എസിപിയുടെ മേല്‍നോട്ടത്തില്‍ നടത്തിയ പഴുതടച്ച അന്വേഷണത്തിനൊടുവിലാണ് പ്രതിയെ കുടുക്കാന്‍ കഴിഞ്ഞത്.

തമ്പുരാന്‍പടി കുരഞ്ഞിയൂര്‍ വീട്ടില്‍ ബാലന്റെ വീട്ടില്‍ മേയ് 12 ന് ഉച്ചയ്ക്കാണ് മോഷണം നടന്നത്. ബാലനും ഭാര്യ രുഗ്മിണിയും കൊച്ചുമകന്‍ അര്‍ജുനും തൃശൂരില്‍ സിനിമയ്ക്കു പോയ സമയത്തായിരുന്നു കവര്‍ച്ച നടന്നത്. . ഡ്രൈവറെയും കൂട്ടിയാണ് ഇവര്‍ സിനിമയ്ക്കു പോയിരുന്നത്. രാത്രി 9.30ന് തിരിച്ച് വീട്ടിലെത്തിയപ്പോഴാണു മോഷണ വിവരം അറിയുന്നത്.

വീടിനു പിന്‍വശത്തു കൂടി മുകള്‍ നിലയിലെത്തിയ മോഷ്ടാവ് വാതില്‍ കുത്തിപ്പൊളിച്ചാണ് അകത്തു കയറിയത്. താഴത്തെ നിലയിലെ കിടപ്പുമുറിയിലുണ്ടായിരുന്ന അലമാര കുത്തിതുറന്നാണ് മോഷണം നടത്തിയത്. രാത്രി 7.20 നും 8.30 നും ഇടയില്‍ കവര്‍ച്ച നടത്തി ഇരുച്ചക്രവാഹനത്തില്‍ പ്രതി രക്ഷപ്പെട്ടതിന്റെ ദൃശ്യങ്ങള്‍ വീട്ടിലെ സിസിടിവിയില്‍ പതിഞ്ഞിരുന്നെങ്കിലും ഇതില്‍ പ്രതിയുടെ ചിത്രങ്ങള്‍ വ്യക്തമായിട്ടുണ്ടായിരുന്നില്ല.

പ്രതി പോയ വഴികളിലുള്ള സിസിടിവി കാമറകള്‍ മുഴുവന്‍ പോലീസ് പരിശോധിക്കുകയുണ്ടായി. സമാനമായ മോഷണ കേസുകള്‍ പരിശോധിച്ചതില്‍ നിന്ന് ഷൊര്‍ണൂര്‍ കുളപ്പുള്ളിയിലെ ഡോക്ടറുടെ വീട്ടില്‍ ഇയാള്‍ കവര്‍ച്ചയ്ക്കു ശ്രമിക്കുന്ന ദൃശ്യങ്ങള്‍ പോലീസിന് ലഭിക്കുകയും ഇവിടുത്തെ ദൃശ്യങ്ങളില്‍ ആളെ കൂടുതല്‍ വ്യക്തമായി അറിയാനും സാധിച്ചു. ഷാഡോ പോലീസടക്കം മൂന്ന് സംഘങ്ങളായി നടത്തിയ അന്വേഷണത്തിലാണ് പ്രതി പിടിയിലാകുന്നത്.