വ്യാജ വീഡിയോ വിവാദം ഇനി ഉണ്ടാകില്ല, ജോ ജോസഫിന്റെ പേരുദോഷം മാറിക്കിട്ടി! സിപിഎം വീണ്ടും ആവേശത്തില്‍.. തൃക്കാക്കരയിലെ ചിത്രം മാറിമറിയുന്നു..
തൃക്കാക്കര എല്‍ഡിഎഫ് സ്ഥാനാര്‍ത്ഥിയായ ജോജോസഫിന്റെ വ്യാജ വീഡിയോ അപ്ലോഡ് ചെയ്തയാള്‍ അറസ്റ്റില്‍. മലപ്പുറം കോട്ടല്‍ സ്വദേശി അബ്ദുള്‍ ലത്തീഫാണ് അറസ്റ്റിലായത്. കോയമ്പത്തൂരില്‍ നിന്നാണ് ഇയാളെ പിടികൂടിയത് എന്നാണ് ലഭിക്കുന്ന വിവരം. ലീഗ് പ്രവര്‍ത്തകനും സോഷ്യല്‍ മീഡിയയില്‍ ലീഗിന്റെ പ്രചാരകനകുമാണ് ലത്തീഫ് എന്നാണ് പുറത്തുവരുന്ന വിവരം.
കേരളം ഉറ്റു നോക്കുന്ന തൃക്കാക്കര തെരഞ്ഞെടുപ്പിന്റെ വിധിയെഴുത്ത് തകൃതിയായി നടക്കുമ്പോഴാണ് ലത്തീഫ് അറസ്റ്റിലായിരിക്കുന്നത്. ചൊവ്വാഴ്ച രാവിലെ കോയമ്പത്തൂരില്‍ നിന്ന് തൃക്കാക്കര പൊലീസ് ഇയാളെ പിടികൂടിയത്. ഇന്ന് ഉച്ചയോടെ കൊച്ചിയിലെത്തിക്കും. ട്വിറ്ററില്‍ വ്യാജ അക്കൗണ്ട് ഉണ്ടാക്കിയാണ് ഇയാള്‍ വീഡിയോ അപ്ലോഡ് ചെയ്തതെന്ന് പൊലീസ് പറഞ്ഞു..
ജോജോസഫിനെ അപകീര്‍ത്തിപ്പെടുത്തും വിധം സാമൂഹിക മാധ്യമങ്ങളിലൂടെ വ്യാജ അശ്ലീല വീഡിയോ പ്രചരിപ്പിച്ച സംഭവത്തില്‍ നേരത്തെ രണ്ട് പേര്‍ അറസ്റ്റിലായിരുന്നു. പാലക്കാട് സ്വദേശികളായ ശിവദാസന്‍, ഷുക്കൂര്‍ എന്നിവരാണ് അറസ്റ്റിലായത്. രണ്ടുപേരും കോണ്‍ഗ്രസ് ബന്ധമുള്ളവരാണെന്ന് പോലീസ് കണ്ടെത്തിയിരുന്നു. കേണ്‍ഗ്രസ് ആമയൂര്‍ മണ്ഡലം പ്രസിഡന്റാണ് അറസ്റ്റിലായ ഷുക്കൂര്‍.
യൂത്ത് കോണ്‍ഗ്രസ് മുന്‍ മണ്ഡലം ഭാരവാഹിയാണ് ശിവദാസന്‍. അറസ്റ്റിലായ രണ്ടുപേര്‍ക്ക് പുറമേ കേസുമായി ബന്ധപ്പെട്ട് മൂന്നുപേരെ കൂടി പോലീസ് കസ്റ്റഡിയിലെടുത്തിട്ടുണ്ട്. ഇവരുടെ മൊബൈല്‍ ഫോണ്‍ ഉള്‍പ്പെടെ സൈബര്‍ വിദഗ്ധര്‍ വിശദമായി പരിശോധിച്ചു വരുകയായിരുന്നു. അതിനിടയിലാണ് വീഡിയോ അപ്ലോഡ് ചെയ്തയാള്‍ തന്നെ പോലീസിന്റെ പിടിയിലായത്.
അതേസമയം നേരത്തെ അറസറ്റിലായ എറണാകുളം മെഡിക്കല്‍കോളേജ് ജീവനക്കാരനായ കെ ഷിബുവിനെതിരെ ശക്തമായ നടപടി മെഡിക്കല്‍ കോളജ് അധികൃതര്‍ സ്വീകരിച്ചു എന്നാണ് വിവരം. ക്ലീനിങ് വിഭാഗത്തിലെ താത്കാലിക ജീവനക്കാരനായിരുന്ന ഷിബുവിനെ പിരിച്ചുവിട്ടു. കളമശ്ശേരി പോലീസ് അറസ്റ്റ് ചെയ്ത ഷിബുവിനെ തൃക്കാക്കര പൊലീസിന് കൈമാറിയിരുന്നു.
ആര്‍ടി ആക്ട്, ഐടി ആക്ട് സെക്ഷന്‍ 67 (എ) പ്രകാരം കേസ് രജിസ്റ്റര്‍ ചെയ്തതായി തൃക്കാക്കര പൊലീസ് സ്റ്റേഷനില്‍ നിന്നും അറിയിപ്പ് ലഭിച്ചതിനെ തുടര്‍ന്നാണ് നടപടിയെന്ന് മെഡിക്കല്‍ കോളജ് പ്രിന്‍സിപ്പല്‍ വ്യക്തമാക്കി. നിലവില്‍ ഈ സംഭവത്തില്‍ ആറുപേരാണ് അറസ്റ്റിലുള്ളത്.
അതേസമയം ഇടത് സ്ഥാനാര്‍ത്ഥിയുടെ വ്യാജ വീഡിയോ വിവാദം അവസാന ഘട്ടത്തിലും സിപിഎം ആളിക്കത്തിച്ചിരുന്നു. വികസനം പറഞ്ഞ് പ്രചാരണം തുടങ്ങിയ ഇടതുമുന്നണി അവസാന ഘട്ടത്തിലെത്തുമ്പോള്‍ സ്ഥാനാര്‍ഥിയുടെ പേരിലിറങ്ങിയ വീഡിയോയുടെ സഹതാപം വോട്ടാക്കി മാറ്റാനുളള തന്ത്രങ്ങളിലേക്കാണ് കടന്നത്.
നിലവില്‍ വീഡിയോ അപ്ലോഡ് ചെയ്തയാള്‍ അറസ്റ്റിലായതിലൂടെ ജോജോസഫിന്റെ മേലുള്ള കറ നീക്കാന്‍ സിപിഎമ്മിന് സാധിച്ചു. വരും മണിക്കൂറുകളില്‍ ഇത് വിധിയെഴുത്തിലും പ്രതിഫലിക്കുമെന്നാണ് സിപിഎമ്മിന്റെ പ്രതീക്ഷ..
https://www.facebook.com/Malayalivartha
