പിണറായി അയോഗ്യന് ഒരു നിമിഷം പോലും ആ പദവിയിലിരിക്കരുത് കോടതി ഇടപെടണം ആവശ്യവുമായി നേതാക്കള്
നയതന്ത്ര പാഴ്സല് സ്വര്ണ്ണക്കടത്തു കേസിലെ പ്രതി സ്വപ്നയുടെ പുതിയ വെളിപ്പെടുത്തലിന്റെ പശ്ചാത്തലത്തില് മുഖ്യമന്ത്രി പിണറായി വിജയന് രാജിവെയ്ക്കണമെന്ന് കെപിസിസി പ്രസിഡന്റ് കെ.സുധാകരന് എംപി. സ്വര്ണ്ണക്കടത്ത് കേസില് സുതാര്യമായ അന്വേഷണം സാധ്യമാകണമെങ്കില് ജുഡീഷ്യറിയുടെ മേല് നോട്ടം ഉണ്ടാകണമെന്നും കേന്ദ്ര ഏജന്സികളുടെ അന്വേഷണത്തില് വിശ്വാസം നഷ്ടമായെന്നും സുധാകരന് കൂട്ടിച്ചേര്ത്തു.
സ്വപ്നയുടെ വെളിപ്പെടുത്തലിന്റെ പശ്ചാത്തലത്തില് മുഖ്യമന്ത്രിക്ക് ആ പദവിയില് ഇരിക്കാന് യോഗ്യതയില്ല. ബിരിയാണി പാത്രത്തില് സ്വര്ണ്ണക്കടത്ത് നടത്തിയെന്ന ആരോപണം നേരിടുന്ന മുഖ്യമന്ത്രി ആ കസേരയില് തുടരുന്നത് ജനാധിപത്യത്തിന് തന്നെ അപമാനമാണ്. ആത്മാഭിമാനം ഉണ്ടെങ്കില് രാജിവെച്ച് അന്വേഷണത്തെ നേരിടാനുള്ള ജനാധിപത്യ വിവേകവും തന്റേടവും ധാര്മ്മികതയും മുഖ്യമന്ത്രി കാണിക്കണം.
ഈ വിഷയത്തില് പ്രതികരിക്കാന് എല്ഡിഎഫ് ഘടകകക്ഷികള് തയ്യാറാകണം. ഇന്ത്യയുടെ ചരിത്രത്തിലാദ്യമായാണ് സ്വര്ണ്ണകള്ളക്കടത്ത് കേസില് ഒരു മുഖ്യമന്ത്രിക്ക് പങ്കുണ്ടാകുന്നത്. മാധ്യമങ്ങള്ക്ക് മുന്നിലൂടെ തലകുനിച്ച് നടന്ന് പോകുന്ന മുഖ്യമന്ത്രി സ്വയം പരിഹാസപാത്രമായി മാറിയെന്നും സത്യം പുറത്ത് വരണമെങ്കില് കോടതിയുടെ മേല് നോട്ടത്തില് സിബിഐ അന്വേഷണമോ, ജുഡീഷ്യല് അന്വേഷണമോ വേണമെന്നും സുധാകരന് പറഞ്ഞു.
സ്വപ്ന സുരേഷിന്റെ വെളിപ്പെടുത്തലുകളുടെ അടിസ്ഥാനത്തില് ഒരു നിമിഷം പോലും മുഖ്യമന്ത്രി പദത്തിലിരിക്കാന് പിണറായി വിജയന് യോഗ്യനല്ലെന്ന് ഭാരതീയജനത യുവമോര്ച്ച. ഇത്രയും ഗുരുതര ആരോപണം ഒരു മുഖ്യമന്ത്രിക്ക് നേരെ ആദ്യമാണ്. അതിനാല് ധാര്മ്മികമായി മുഖ്യമന്ത്രി രാജിവെക്കണമെന്നും യുവമോര്ച്ച സംസ്ഥാന അധ്യക്ഷന് സി ആര് പ്രഫുല് കൃഷ്ണന് ആവശ്യപ്പെട്ടു.
കറന്സി കടത്തും, സ്വര്ണ്ണക്കളളക്കടത്തും നടത്തിയ മുഖ്യമന്ത്രി കേരളത്തെ മുഴുവന് നാണം കെടുത്തിയിരിക്കുന്നു. ഭാര്യയും മകളും ഉള്പ്പെടെ കള്ളക്കടത്തിന്റെ ഭാഗമാണെന്നത് അതീവ ഗൗരവകരമായ സാഹചര്യത്തിലേക്ക് വിരല് ചൂണ്ടുന്നതാണ്. ധാര്മ്മികതയില്ലാത്ത മുഖ്യമന്ത്രിക്കെതിരായി യുവമോര്ച്ച ശക്തമായ പ്രതിഷേധങ്ങള് സംഘടിപ്പിക്കുമെന്നും സി.ആര്. പ്രഫുല് കൃഷ്ണന് വ്യക്തമാക്കി.
https://www.facebook.com/Malayalivartha
