തന്റെ സ്ഥാപനത്തിലെ ജോലിക്കാരന്റെ ഗൃഹപ്രവേശനത്തിന് അബുദാബിയില്‍ നിന്ന് പറന്നെത്തി എംഎ യൂസഫലി. ജീവനക്കാരെ സ്വന്തം വീട്ടുകാരെപോലെ കാണുന്ന വ്യക്തിയാണ് യൂസഫലി എന്ന് പല തവണ തെളിയിച്ചിട്ടുള്ളതാണ്. ആ നന്മ മനസാണ് ഇവിടേയും കണ്ടത്.

പുതുപ്പള്ളി വെട്ടത്തുകവല സ്വദേശിയും ലുലു ഗ്രൂപ്പിന്റെ ഫിനാന്‍സ് ഡയറക്ടറുമായ കൂടല്‍മനയില്‍ പരമേശ്വരന്‍ നമ്പൂതിരിയുടെ വീടിന്റെ ഗൃഹപ്രവേശന ചടങ്ങില്‍ പങ്കെടുക്കാനാണ് യൂസഫലി എത്തിയത്. അബുദാബിയിലായിരുന്ന യൂസഫലി നെടുമ്പാശേരിയില്‍ വിമാനമിറങ്ങി ഹെലികോപ്റ്ററിലാണ് പുതുപ്പള്ളിയിലെത്തിയത്. ജോര്‍ജിയന്‍ പബ്ലിക് സ്‌കൂളിന്റെ മൈതാനത്തിലാണ് അദ്ദേഹം ഇറങ്ങിയത്.

ഇന്നലെ ഉച്ചയ്ക്ക് പന്ത്രണ്ടോടെ ഹെലികോപ്റ്റര്‍ ഇറങ്ങിയ യൂസഫലിയെ പരമേശ്വരന്‍ നമ്പൂതിരിയും അദ്ദേഹത്തിന്റെ ഭാര്യ ആശ പി നമ്പൂതിരിയും മക്കളും ചേര്‍ന്നാണ് സ്വീകരിച്ചത്. തുടര്‍ന്ന് പരമേശ്വരന്‍ നമ്പൂതിരിയുടെ വീട്ടിലെത്തിയ യൂസഫലി ഏകദേശം ഒരു മണിക്കൂറോളം അവിടെ ചെലവഴിച്ചു.

അതേസമയം യൂസഫലി എത്തിയ വിവരം അറിഞ്ഞ് ധാരാളം ആളുകളാണ് പരമേശ്വരന്‍ നമ്പൂതിരിയുടെ വീട്ടിലേയ്ക്ക് എത്തിയത്.