ഇന്നത്തെ പ്രമുഖ മാധ്യമങ്ങളുടെ പ്രധാനപ്പെട്ട വാര്‍ത്തയായിരുന്നു. ഷാജ് കിരണിന്റെ ബിജെപി ബന്ധം. ഒപ്പം സന്ദീപ് വാര്യരുടെയും കര്‍ണാടകയിലെ ഊര്‍ജമന്ത്രി വി സുനില്‍കുമാറിന്റെയും ചിത്രം. വാര്‍ത്ത ഇങ്ങനെ. സ്വര്‍ണക്കടത്ത് കേസിലെ പ്രതി സ്വപ്ന സുരേഷിന്റെ സുഹൃത്ത് ഷാജ് കിരണിന് ബി ജെ പി ബന്ധമുള്ളതായി സൂചന. ബി ജെ പി സംസ്ഥാന വക്താവ് സന്ദീപ് വാര്യര്‍ക്കൊപ്പമുള്ള ചിത്രങ്ങള്‍ പുറത്ത്. കര്‍ണാടകയിലെ ഊര്‍ജമന്ത്രി വി സുനില്‍കുമാറുമായി ഷാജ് കിരണും സന്ദീപ് വാര്യരും കൂടിക്കാഴ്ച നടത്തുന്ന ചിത്രമാണ് പുറത്തുവന്നത്. 2021 സെപ്തംബറിലാണ് കൂടിക്കാഴ്ച നടന്നത്. മന്ത്രിയുടെ വസതിയിലെ വിരുന്നിലാണ് ഇരുവരും പങ്കെടുത്തത്. ഷാജ് കിരണുമായുള്ള ബന്ധത്തില്‍ സന്ദീപ് വാര്യര്‍ക്കെതിരെ പാര്‍ട്ടി നേതൃത്വത്തിന് പരാതി ലഭിച്ചിട്ടുണ്ട്. സന്ദീപ് വാര്യര്‍ക്കെതിരെ കര്‍ണാടക മന്ത്രിയും പരാതിപ്പെട്ടതായി റിപ്പോര്‍ട്ടുണ്ട്. പരാതിയെത്തുടര്‍ന്ന് സന്ദീപ് വാര്യര്‍ക്ക് പാര്‍ട്ടി നിയന്ത്രണങ്ങള്‍ ഏര്‍പ്പെടുത്തിഎന്നൊക്കെയായിരുന്നു വാര്‍ത്ത.

മാത്രമല്ല കര്‍ണാടകയിലെ വൈദ്യുതിയുമായി ബന്ധപ്പെട്ട്, 100 കോടി രൂപയുടെ വ്യവസായവുമായി ബന്ധപ്പെട്ടായിരുന്നു മന്ത്രിയുമായി കൂടിക്കാഴ്ച നടന്നത് എന്ന വിവരമാണ് പുറത്തുവരുന്നത്. ഷാജ് കിരണുമായി ബന്ധപ്പെട്ട പ്രശ്‌നം ഉയര്‍ന്നുവന്നപ്പോള്‍ കര്‍ണാടക മന്ത്രി സുനില്‍ കുമാര്‍ തന്നെ സംസ്ഥാന ബിജെപി നേതൃത്വവുമായി ബന്ധപ്പെടുകയായിരുന്നുവെന്നും അതിന് ശേഷമാണ് കൂടിക്കാഴ്ചയുടെ വിവരങ്ങള്‍ സംസ്ഥാന നേതൃത്വത്തിന് വിവരം അറിയുന്നത് എന്നാണ് അടുത്തവൃത്തങ്ങള്‍ വ്യക്തമാക്കിയത് എന്ന രീതിയിലും വാര്‍ത്തകള്‍ പടച്ചുവിടുകയായിരുന്നു ഒരു പ്രമുഖ മാധ്യമം

എന്നാല്‍ ഇതിനെല്ലാം കൃത്യമായ മറുപടിയും തെളിവുകളുമായി എത്തി ഈ മാധ്യമങ്ങളെ പറപ്പിച്ചിരിക്കുകയാണ് സന്ദീപ് വാര്യര്‍. കര്‍ണാടക മന്ത്രി വി സുനില്‍കുമാറിന്റെ സുഹൃത്ത് രജിത്ത് വിളിച്ചപ്പോള്‍, യാദൃശ്ചികമായിട്ടാണ് മന്ത്രിയുടെ വീട്ടിലേക്ക് പോയതെന്ന് കുറിപ്പില്‍ പറയുന്നു. രജിത്തിന്റെ കൂടെയാണ് മാദ്ധ്യമപ്രവര്‍ത്തകന്‍ എന്ന് സ്വയം പരിചയപ്പെടുത്തിയ ഷാജ് കിരണ്‍ വന്നത്. നാല് മാസം മുമ്പ് തന്നെ ഷാജ് കിരണ്‍ തട്ടിപ്പുകാരനാണെന്ന് കാണിച്ച് എഡിജിപി വിജിലന്‍സിന് ഇ മെയില്‍ വഴി പരാതി നല്‍കിയിരുന്നെന്നും സന്ദീപ് വാര്യര്‍ കുറിപ്പില്‍ വ്യക്തമാക്കി. മെയിലിന്റെ സ്‌ക്രീന്‍ ഷോട്ടും അദ്ദേഹം പങ്കുവച്ചിട്ടുണ്ട്.

'കര്‍ണാടക മന്ത്രിയെന്നതിലുപരി കേരളത്തിന്റെ സഹപ്രഭാരി ആയിരുന്ന സുനില്‍ കുമാര്‍ജിയുടെ വീട്ടിലെ ആയിരത്തിലധികം പേര് പങ്കെടുത്ത ചടങ്ങില്‍ കൊല്ലത്തുള്ള മന്ത്രിയുടെ സുഹൃത്ത് രജിത്ത് വിളിച്ചപ്പോള്‍ കഴിഞ്ഞ വര്‍ഷം യാദൃശ്ചികമായി പോയതാണ്. രജിത്തിന്റെ കൂടെയാണ് ഷാജ് കിരണ്‍ എന്ന മാദ്ധ്യമ പ്രവര്‍ത്തകന്‍ എന്ന് സ്വയം പരിചയപ്പെടുത്തിയ അവതാരത്തെ കാണുന്നത് . മന്ത്രി ഭക്ഷണം കഴിക്കുന്നവരുടെ ടേബിളിന് അടുത്തു കൂടെ വന്ന് രണ്ടു മിനിറ്റ് സംസാരിച്ച് ഫോട്ടോയെടുത്തു. ആ ഫോട്ടോയില്‍ അക്കാലത്ത് രജിത്തിന്റെ സുഹൃത്തായ ഷാജ് കിരണ്‍ വന്നതിന് എനിക്കെന്ത് ചെയ്യാന്‍ പറ്റും?

എന്റെ സുഹൃത്ത് രജിത്ത് നാല് മാസം മുമ്പ് തന്നെ ഷാജ് കിരണ്‍ തട്ടിപ്പുകാരനാണ് എന്ന് കാണിച്ച് എഡിജിപി വിജിലന്‍സിന് ഇ മെയില്‍ വഴി പരാതി നല്‍കിയത് സ്‌ക്രീന്‍ ഷോട്ട് പുറത്തു വിടുന്നു . അന്ന് ആ പരാതിയില്‍ പൊലീസ് നടപടി എടുത്തിരുന്നെങ്കില്‍ ഷാജ് കിരണ്‍ അന്നേ അകത്തായേനെ . ഷാജ് കിരണ്‍ എന്റെ സുഹൃത്താണെന്ന് ആ ഫോട്ടോ അടിക്കുറുപ്പുകളില്‍ പോലും പറഞ്ഞിട്ടുമില്ല'. അദ്ദേഹം കുറിച്ചു. നിരവധി മുതിര്‍ന്ന രാഷ്ട്രീയ പ്രവര്‍ത്തകര്‍ക്കൊപ്പം അയാളുടെ ഫോട്ടോകള്‍ ഉണ്ടായിട്ടും തന്റെ ഫോട്ടോ മാത്രം എടുത്ത് വ്യാജ വാര്‍ത്ത ചമയ്ക്കുന്നത് തോന്നിവാസമാണെന്നും സന്ദീപ് വാര്യര്‍ കുറ്റപ്പെടുത്തി.