ജീവനക്കാര്‍ സമരം ചെയ്യുന്നതില്‍ ഹൈക്കോടതി അതൃപ്തി പ്രകടിപ്പിച്ചു. അഞ്ചാം തീയതിക്കകം ശമ്പളം ഉറപ്പാക്കാന്‍ കോടതി ഇടപെട്ടിട്ടും ജീവനക്കാര്‍ സമരം ചെയ്യുന്നതിലാണ് അതൃപ്തി.

സര്‍വീസ് തടസ്സപ്പെടുത്താന്‍ യൂണിയനുകള്‍ ശ്രമിച്ചാല്‍ കേസ് പരിഗണിക്കുന്നത് നിറുത്തുമെന്നും ജസ്റ്റിസ് ദേവന്‍ രാമചന്ദ്രന്‍ മുന്നറിയിപ്പ് നല്‍കി.

സമരം നിറുത്താന്‍ പറയില്ലെന്നും സമരമാണ് കൂടുതല്‍ ഗുണകരമെന്ന് ജീവനക്കാര്‍ കരുതുന്നുണ്ടെങ്കില്‍ പ്രതിസന്ധി മറികടക്കാനുള്ള ശ്രമത്തില്‍ നിന്ന് പിന്മാറാമെന്നും കോടതി വ്യക്തമാക്കി.

ശമ്പളം വൈകുന്നതിനെതിരായ ജീവനക്കാരുടെ സമരവുമായി ബന്ധപ്പെട്ട ഹര്‍ജി പരിഗണിക്കുകയായിരുന്നു കോടതി. ജീവനക്കാരുടെ ദുരിതം അറിയുന്നത് കൊണ്ടാണ് ഇടപെട്ടത്. ജീവനക്കാരുടെ ഒട്ടേറെ കണ്ണീര്‍ കത്തുകള്‍ കിട്ടുന്നുണ്ട്. ഇത് കാണാന്‍ കോടതി മാത്രമേയുള്ളൂ എന്നതാണ് സ്ഥിതി. ചോര നീരാക്കി പണിയെടുക്കുന്ന ജീവനക്കാരോട് ബഹുമാനമാണുള്ളത്

.ജൂലായിലെ വരുമാനംകൊണ്ട് ജൂണിലെ ശമ്പളം നല്‍കുന്ന സ്ഥിതി പരിഹരിക്കണം. ആദ്യ ആഴ്ച ശമ്പളം നല്‍കണമെന്ന നിലപാടില്‍ നിന്ന് പിന്നോട്ടു പോയിട്ടില്ല. ആഗസ്റ്റ് മുതല്‍ അഞ്ചാം തീയതിക്കകം ശമ്പളം നല്‍കണമെന്ന ഉത്തരവ് പുറപ്പെടുവിക്കും.


സൂപ്പര്‍വൈസറി വിഭാഗം ജീവനക്കാര്‍ക്ക് മുമ്പ് ഡ്രൈവര്‍, കണ്ടക്ടര്‍, മെക്കാനിക് തുടങ്ങിയ സാധാരണ ജീവനക്കാര്‍ക്ക് ശമ്പളം നല്‍കണമെന്ന മുന്‍ ഉത്തരവ് തുടരും. മെക്കാനിക്കുകളെ ഒഴിവാക്കി സൂപ്പര്‍വൈസറി ജീവനക്കാര്‍ക്ക് ശമ്പളം നല്‍കിയെന്ന് സി.ഐ.ടി.യു അനുകൂല യൂണിയന്‍ ആരോപിച്ചപ്പോള്‍, ധര്‍ണ ഇരിക്കുകയാണോ വേണ്ടതെന്ന് കോടതി ചോദിച്ചു. വിശദീകരണത്തിന് സമയം അനുവദിച്ച കോടതി ഹര്‍ജി ജൂലായ് 11ലേക്ക് മാറ്റി.