ഡ്രൈവറെ കൊണ്ട് ചെരുപ്പിന്റെ വാറഴിപ്പിച്ച സംഭവത്തില്‍ വിശദീകരണവുമായി സ്പീക്കര്‍ എന്‍.ശക്തന്‍ രംഗത്തെത്തി. 19 വര്‍ഷമായി താന്‍ ഗുരുതര രോഗാവസ്ഥയിലാണെന്നും പതിനായിരത്തില്‍ ഒരാള്‍ക്ക് മാത്രം കാണപ്പെടുന്ന ഒരു രോഗമാണ് തനിക്കെന്നും സ്പീക്കര്‍ പറഞ്ഞു. തന്റെ ഒരു കണ്ണിന് ഭാഗികമായ കാഴ്ച്ച മാത്രമേയുള്ളു. കണ്ണിലെ ഞരമ്പ് പൊട്ടുകയും രക്തം വരുകയും ചെയ്യുന്ന അസുഖമാണിത്. രോഗം ഗുരുതരമായി മാറാതിരിക്കാന്‍ കുനിയരുതെന്ന് ഡോക്ടര്‍മാര്‍ നിര്‍ദ്ദേശിച്ചിട്ടുണ്ടെന്നുമാണ് സ്പീക്കറുടെ വിശദീകരണം.

മൂന്നു കാര്യങ്ങള്‍ ചെയ്യരുതെന്നാണ് ഡോക്ടര്‍മാര്‍ തന്നോട് നിര്‍ദേശിച്ചിരിക്കുന്നത്. കുനിയരുത്, കൈ കൊണ്ട് ഭാരമുള്ള വസ്തുക്കള്‍ എടുക്കരുത്, കണ്ണില്‍ വെയില്‍ അടിക്കാന്‍ പാടില്ല എന്നിവയാണ് അത്. ഈ നിര്‍ദ്ദേശങ്ങള്‍ തെറ്റിച്ചാല്‍ അസുഖം കൂടുതലാകുമെന്നും ശക്തന്‍ വിശദീകരിച്ചു. കുനിയാന്‍ സാധിക്കാത്തത് കൊണ്ടാണ് പായയില്‍ കയറാന്‍ വേണ്ടി ഡ്രൈവര്‍ വാറഴിച്ചത്. സഹായിയും ഡ്രൈവറുമായ ബിജു അത് ചെയ്തത് താന്‍ ആവശ്യപ്പെട്ടിട്ടല്ലെന്നും അദ്ദേഹം പറഞ്ഞു. വളരെ നിസാരമായ കാര്യമാണിത്. ബോധപൂര്‍വം ചെയ്തതല്ലെന്നും സ്പീക്കര്‍ പറഞ്ഞു. കറ്റമെതിച്ചത് ചെറുതായി കുനിഞ്ഞ് മാത്രമാണെന്നും അദ്ദേഹം മാധ്യമങ്ങളോട് പറഞ്ഞു.

നിയമസഭാ വളപ്പിലെ നെല്‍ക്കൃഷി വിളവെടുപ്പിനിടെ ഇന്നലെയായിരുന്നു സംഭവം. കറ്റമെതിക്കാനെത്തിയപ്പോളാണ് സ്വന്തം ഡ്രൈവറെ വിളിച്ച് വരുത്തി ശക്തന്‍ ചെരുപ്പിന്റെ വാറഴിപ്പിച്ചത്. കൃഷിമന്ത്രി കെ പി മോഹനനും സ്ഥലത്തുണ്ടായിരുന്നു.

സംഭവം വിവാദമായതോടെ ശക്തനെതിരെ വന്‍വിമര്‍ശനമാണ് ഉയരുന്നത്. സ്പീക്കര്‍ സ്ഥാനത്ത് തുടരാന്‍ ശക്തന്‍ യോഗ്യനല്ലെന്നും അദ്ദേഹം മാപ്പ് പറഞ്ഞ് സ്ഥാനം ഒഴിയണമെന്നും അഡ്വ. ജയശങ്കര്‍ ആവശ്യപ്പെട്ടു. ചിത്രം വിവാദമായതോടെ സംഭവം അന്വേഷിക്കുമെന്ന് മുഖ്യമന്ത്രി ഉമ്മന്‍ചാണ്ടി പറയുമെന്നും എന്നാല്‍ ഒന്നും സംഭവിക്കില്ലെന്നും അദ്ദേഹം പറഞ്ഞു.

എന്നാല്‍ പ്രജാധിപത്യരാജ്യത്തില്‍ പൗരബോധമുള്ളവരുണ്ടെന്നും രാജവാഴ്ചക്കാലത്തേയോ സാമ്രാജ്യവാഴ്ച കാലഘട്ടത്തിലേയോ പോലുള്ള ഇടപെടലുകള്‍ അധികാരസ്ഥാനങ്ങളില്‍ ഉള്ളവരുടെ ഭാഗത്തുനിന്നുണ്ടായാല്‍ ഉത്തരം ബോധിപ്പിക്കേണ്ടി വരുമെന്ന് ഓര്‍മ്മയില്‍ വയ്‌ക്കേണ്ടത് കാലഘട്ടത്തിന്റെ ആവശ്യമാണ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക