മലപ്പുറത്ത് പ്രചാരണം കഴിഞ്ഞ് മുഖ്യമന്ത്രിയെത്തിയ ട്രെയിന്‍ 40 മിനിട്ട് പിടിച്ചിട്ടു, അദ്ദേഹം വഴിയില്‍ ഇറങ്ങി നടന്നുപോയി. മലപ്പുറത്ത് നിന്നും മാവേലി എക്‌സ്പ്രസില്‍ വന്ന ഉമ്മന്‍ ചാണ്ടിക്കാണ് ഈ ഗതിയുണ്ടായത്. പേട്ട സ്‌റ്റേഷനില്‍ 6.40-ന് എത്തിയ ട്രെയിന്‍ 7.20 വരെയാണ് പിടിച്ചിട്ടത്.
രാവിലെ മന്ത്രിസഭാ യോഗമുള്ളതില്‍ ഏറെ നേരം കാത്തിരുന്നിട്ടും ട്രെയിന്‍ വിടാത്തത് മൂലം വഴിയില്‍ ഇറങ്ങുകയായിരുന്നു. സമയം പോയതിനാല്‍ അദ്ദേഹത്തിനൊപ്പമുണ്ടായിരുന്ന മന്ത്രി കെ.സി. ജോസഫിനോട് അദ്ദേഹത്തിന്റെ വണ്ടി തയാറാക്കാന്‍ ആവശ്യപ്പെടുകയും ആ വണ്ടിയില്‍ കയറി വീട്ടില്‍ പോകുകയുമായിരുന്നു മുഖ്യമന്ത്രി. ഈ സമയം ഉമ്മന്‍ ചാണ്ടിക്കൊപ്പം പൊലീസുകാരോ സുരക്ഷാ ജീവനക്കാരോ ഉണ്ടായിരുന്നില്ല.
എന്നാല്‍ മാവേലി എക്‌സ്പ്രസില്‍ മുഖ്യമന്ത്രി വരുന്നതും കാത്ത് സുരക്ഷാ ജീവനക്കാരും ഔദ്യോഗിക വാഹനവും തമ്പാനൂര്‍ റയില്‍വേ സ്‌റ്റേഷനില്‍ കാത്തിരിക്കുന്നുണ്ടായിരുന്നു. മുഖ്യമന്ത്രി പേട്ടയില്‍നിന്ന് കെ.സി. ജോസഫിന്റെ വാഹനത്തില്‍ കയറുമ്പോള്‍ ഗണ്‍മാന്‍ പോലും അദ്ദേഹത്തിനൊപ്പമുണ്ടായിരുന്നില്ല.
അതേസമയം, ഒന്നാം പ്ലാറ്റ്‌ഫോമില്‍ മുഖ്യമന്ത്രിയെ ഇറക്കുന്നതിനായി ആ പ്ലാറ്റ്‌ഫോമില്‍ നില്‍ക്കുന്ന ട്രെയിന്‍ മാറ്റാനാണ് റയില്‍വേ വിചാരിച്ചതെന്നും ഇതാണ് സമയം താമസിക്കാന്‍ കാരണമെന്നും സുരക്ഷ ജീവനക്കാരെ റയില്‍വേ അറിയിച്ചു. എന്തായാലും സിഗ്‌നല്‍ കിട്ടി പേട്ടയില്‍ നിന്ന് ട്രെയിന്‍ വിട്ടപ്പോഴേക്കും മുഖ്യമന്ത്രി വീട്ടിലെത്തിയിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha