കരിപ്പൂരില് 45 ലക്ഷം വിലവരുന്ന സ്വര്ണം പിടികൂടി... മലദ്വാരത്തില് ഒളിപ്പിച്ച് കടത്താന് ശ്രമിച്ച 995 ഗ്രാം സ്വര്ണം പോലീസ് പിടികൂടിയത്
കരിപ്പൂര് വിമാനത്താവളത്തില് മലദ്വാരത്തില് ഒളിപ്പിച്ച് കടത്താന് ശ്രമിച്ച 995 ഗ്രാം സ്വര്ണം പോലീസ് പിടികൂടി. ജിദ്ദയില് നിന്ന് കരിപ്പൂര് വിമാനത്താവളത്തിലെത്തിയ കോഴിക്കോട് മുക്കം സ്വദേശി അബ്ദുള് ഗഫൂര് (32) ആണ് പിടിയിലായത്. ക്യാപ്സൂള് രൂപത്തില് 995 ഗ്രാം സ്വര്ണ്ണം മിശ്രിതരൂപത്തില് ഒളിപ്പിച്ച് കടത്താനാണ് ഇയാള് ശ്രമിച്ചത്.
നാല് ക്യാപ്സൂളുകളായാണ് ഇയാള് സ്വര്ണം മലദ്വാരത്തില് ഒളിപ്പിച്ച് വച്ചത്. ആഭ്യന്തര വീപണിയില് 45 ലക്ഷം രൂപയിലേറെ വില വരും പിടിച്ചെടുത്ത സ്വര്ണ്ണ മിശ്രിതത്തിന്. ഏകദേശം 118 പവനില് അധികം തൂക്കം വരും ഈ സ്വര്ണത്തിന്.
ചൊവ്വാഴ്ച രാവിലെ 11.15 ന് ജിദ്ദയില് നിന്ന് ഇന്ഡിഗോ വിമാനത്തിലാണ ഗഫൂര് എത്തിയത്. കസ്റ്റംസ് പരിശോധനയ്ക്ക് ശേഷം 12.20 ന് വിമാനത്താവളത്തില് നിന്ന് പുറത്തിറങ്ങിയ അബ്ദുള് ഗഫൂറിനെ വിമാനത്താവളത്തിലെ എയ്ഡ് പോസ്റ്റിലെ പൊലീസുകാര് കസ്റ്റഡിയില് എടുത്തു. മുന്കൂട്ടി ലഭിച്ച രഹസ്യ വിവരത്തിന്റെ അടിസ്ഥാനത്തിലാണ് പൊലീസ് അബ്ദുല് ഗഫൂറിനെ തടഞ്ഞ് എയ്ഡ് പോസ്റ്റിലേക്ക് കൂട്ടികൊണ്ട് പോയി ചോദ്യം ചെയ്തത്.
ആദ്യഘട്ട ചോദ്യം ചെയ്യലില് അബ്ദുള് ഗഫൂര് ഒന്നും സമ്മതിച്ചില്ല. തുടര്ന്ന് ഇയാളുടെ ശരീരവും ലഗേജും പോലീസ് വിശദമായി പരിശോധിച്ചു. എന്നാല് സ്വര്ണം കണ്ടെടുക്കാനായില്ല. ഇതേത്തുടര്ന്ന് അബ്ദുള് ഗഫൂറിനെ കൊണ്ടോട്ടിയിലെ സ്വകാര്യ ആശുപത്രിയില് എത്തിച്ച് വിശദമായ വൈദ്യപരിശോധനയ്ക്ക് വിധേയനാക്കി. എക്സ്റേയില് ഇയാളുടെ വയറിനുള്ളില് സ്വര്ണം അടങ്ങിയ നാല് കാപ്സ്യൂളുകള് കണ്ടെത്തി. കഴിഞ്ഞ ഏതാനും മാസങ്ങള്ക്കിടെ കരിപ്പൂര് വിമാനത്താവളത്തില് പോലീസ് പിടികൂടുന്ന അന്പത്തി എട്ടാം സ്വര്ണക്കടത്ത് കേസാണിത്.
https://www.facebook.com/Malayalivartha
