നിയമസഭാ കയ്യാങ്കളി കേസില് വിചാരണ ആരംഭിക്കുന്നതിന്റെ ഭാഗമായി കുറ്റപത്രം വായിച്ചു കേള്പ്പിക്കാന് പ്രതികളെല്ലാം ഹാജരാകണമെന്ന് തിരുവനന്തപുരം സിജെഎം കോടതി നേരത്തെ ഉത്തരവിട്ടതിനു പിന്നാലെ മന്ത്രി വി ശിവന്കുട്ടിയും എല്ഡിഎഫ് കണ്വീനര് ഇ പി ജയരാജനും ഉള്പ്പെടുന്ന ആറ് എല്ഡിഎഫ് നേതാക്കളും ഇന്ന് കോടതിയില് ഹാജരാകും
നിയമസഭാ കയ്യാങ്കളി കേസില് വിചാരണ ആരംഭിക്കുന്നതിന്റെ ഭാഗമായി കുറ്റപത്രം വായിച്ചു കേള്പ്പിക്കാന് പ്രതികളെല്ലാം ഹാജരാകണമെന്ന് തിരുവനന്തപുരം സിജെഎം കോടതി നേരത്തെ ഉത്തരവിട്ടതിനു പിന്നാലെ മന്ത്രി വി ശിവന്കുട്ടിയും എല്ഡിഎഫ് കണ്വീനര് ഇ പി ജയരാജനും ഉള്പ്പെടുന്ന ആറ് എല്ഡിഎഫ് നേതാക്കളും ഇന്ന് കോടതിയില് ഹാജരാകും .
വി ശിവന്കുട്ടി, ഇ പി ജയരാജന്, കെ ടി ജലീല് എംഎല്എ, കെ അജിത്, സി കെ സദാശിവന്, കെ കുഞ്ഞുമുഹമ്മദ് എന്നിവരാണ് പ്രതികളായുള്ളത്. അഞ്ച് വര്ഷം വരെ തടവുശിക്ഷ ലഭിക്കാവുന്ന പൊതുമുതല് നശിപ്പിക്കല്, അതിക്രമിച്ച് കയറല്, നാശനഷ്ടങ്ങള് വരുത്തല് എന്നീ വകുപ്പുകളും പ്രതികള്ക്കെതിരെ ചുമത്തിയിട്ടുണ്ട്.
വിചാരണ നടപടികളുടെ തീയതി കോടതിയും ഇന്ന് തീരുമാനിക്കും. 2015 മാര്ച്ച് 13ന് ബാര് കോഴക്കേസില് പ്രതിയായ കെ എം മാണിയുടെ ബജറ്റ് അവതരണം പ്രതിപക്ഷം തടസപ്പെടുത്തുന്നതിനിടെയാണ് സംഘര്ഷം നേരിട്ടത്.
സംഘര്ഷത്തിനിടെ 2.20 ലക്ഷം രൂപയുടെ പൊതുമുതല് നശിപ്പിച്ചുവെന്നാണ് ക്രൈം ബ്രാഞ്ചിന്റെ കുറ്റപത്രത്തിലുള്ളത്. വിചാരണ നടപടി സ്റ്റേ ചെയ്യണമെന്ന വി ശിവന്കുട്ടിയുടെ ഹര്ജി ഹൈക്കോടതി തള്ളിയിരുന്നു. കേസ് പിന്വലിക്കുന്നതിനായി സംസ്ഥാന സര്ക്കാര് സുപ്രീംകോടതിയെ വരെ സമീപിച്ചിരുന്നുവെങ്കിലും തിരിച്ചടിയാണ് നേരിട്ടത്.
വിചാരണ നടപടികള് സ്റ്റേ ചെയ്യണമെന്ന് പ്രതികളുടെ ആവശ്യം കഴിഞ്ഞ ദിവസമാണ് ഹൈക്കോടതി തള്ളിയത്. വിചാരണ കോടതിയില് നേരിട്ട് ഹാജരാകുന്നത് ഒഴിവാക്കണമെന്ന വാദവും കോടതി അംഗീകരിക്കുകയുണ്ടായില്ല. ഹൈക്കോടതിയിലെ വിടുതല് ഹര്ജിയില് വിധി വരുന്നത് വരെ വിചാരണ നടപടികള് സ്റ്റേ ചെയ്യണമെന്നാണ് ശിവന്കുട്ടി അടക്കമുള്ളവര് വാദിച്ചത്. സാങ്കേതിക വാദങ്ങളുയര്ത്തി വിചാരണ നടപടികളില് നിന്ന് ഒഴിഞ്ഞുമാറരുതെന്ന് കുറ്റപത്രം വായിച്ച് കേള്ക്കുന്നതടക്കമുള്ള നടപടികള്ക്കായി ഹാജരാകണമെന്നുമായിരുന്നു കോടതിയുടെ നിലപാട്.
കഴിഞ്ഞ വര്ഷം നവംബറിലാണ് വിടുതല് ഹര്ജിയുമായി കേസിലെ പ്രതികളായ വി ശരിവന്കുട്ടി, ഇപി ജയരാജന്, കെ അജിത്, അടക്കം ആറ് പ്രതികള് ഹൈക്കോടതിയെ സമീപിച്ചത്. വിടുതല് ഹര്ജിയില് ഹൈക്കോടതി ഈ മാസം 26 ന് വിശദമായ വാദം കേള്ക്കുന്നതാണ്.
" f
https://www.facebook.com/Malayalivartha
