പാലക്കാട് ഡെങ്കിപ്പനി ബാധിച്ച് ഒരു മരണം. പാലക്കാട് കരിമ്പുഴ പഞ്ചായത്തിലെ പൊമ്പ്ര അമ്പലംപ്പാടം കന്നിച്ചാലില്‍ മറിയ (62) ആണ് മരിച്ചത്. പനിയെത്തുടര്‍ന്ന് കഴിഞ്ഞ ദിവസം മണ്ണാര്‍ക്കാട് വട്ടമ്പലത്തെ സ്വകാര്യ ആശുപത്രിയില്‍ പ്രവേശിപ്പിക്കുകയായിരുന്നു.

സംസ്ഥാനത്ത് കാലവര്‍ഷം ശക്തി പ്രാപിച്ചതിന് പിന്നാലെ പനിയും, മറ്റു പകര്‍ച്ചവ്യാധിയും വര്‍ദ്ധിക്കുകയാണ്. വ്യാപകമായി പടര്‍ന്ന വൈറല്‍ പനിഭേദമാകാന്‍ രണ്ടാഴ്ചയോളം എടുക്കും. സര്‍ക്കാര്‍ ആശുപത്രികളിലെ ഒ.പിയില്‍ പനി ബാധിതര്‍ക്ക് പ്രത്യേക വാര്‍ഡ് തുറന്നിട്ടുണ്ട്. ഒ.പിയില്‍ നീണ്ട ക്യൂകാരണം പലരും സ്വകാര്യ ആശുപത്രികളിലാണെത്തുന്നത്.

ആന്റീബയോട്ടിക്കിനു പുറമേ കുത്തിവെപ്പും രക്തപരിശോധനയും അടക്കം ചികിത്സക്ക് സ്വകാര്യ ആശുപത്രികളില്‍ നാലക്ക ബില്ലാകുമെന്നത് സ്‌കൂള്‍ തുറന്ന സമയത്ത് സാധാരണക്കാരെ പ്രതിസന്ധിയിലാക്കി. പനി പടരുന്നതിനാല്‍ സ്‌കൂളുകളില്‍ കുട്ടികള്‍ കുറവാണ്.

വൈറല്‍ പനിക്കു പുറമേ, ഡെങ്കിപ്പനി, എലിപ്പനി എന്നിവയും പല ജില്ലകളിലും റിപ്പോര്‍ട്ട് ചെയ്തിട്ടുണ്ട്. പ്രതിദിന പനിബാധിതരുടെ എണ്ണം കഴിഞ്ഞ ദിവസം 12,000 കടന്നു. ഇന്നലെ മാത്രം രോഗം ബാധിച്ച് ചികിത്സ തേടിയത് 12441 പേരാണ്. ഏറ്റവും കൂടുതല്‍ പനി ബാധിതരുള്ളത് മലപ്പുറം ജില്ലയിലാണ്. 2365 പേരാണ് ജില്ലയില്‍ ഇന്നലെ മാത്രം പനി ബാധിച്ച് ചികിത്സ തേടിയത്.