സംസ്ഥാനത്തിന്റെ മുന്നോട്ട് പോക്കിന് അനിവാര്യമായിരുന്നു ഈ യാത്ര... നാടിന്റെ വികസനത്തിലല്ലല്ലോ മാധ്യമങ്ങളുടെ ശ്രദ്ധ; കുടുംബാംഗങ്ങളുടെ വിദേശയാത്രയില് അനൗചിത്യമില്ലെന്നും നോര്വേയിലേക്ക് പോയത് ഉല്ലാസയാത്രയും ധൂര്ത്തുമാണെന്ന പ്രചാരണമുണ്ടായെന്നും മുഖ്യമന്ത്രി
സംസ്ഥാനത്തിന്റെ മുന്നോട്ട് പോക്കിന് അനിവാര്യമായിരുന്നു ഈ യാത്ര... കുടുംബാംഗങ്ങളുടെ വിദേശയാത്രയില് അനൗചിത്യമില്ലെന്നും നോര്വേയിലേക്ക് പോയത് ഉല്ലാസയാത്രയും ധൂര്ത്തുമാണെന്ന പ്രചാരണമുണ്ടായെന്നും മുഖ്യമന്ത്രി പിണറായി വിജയന്. നാടിന്റെ വികസനത്തിലല്ലല്ലോ മാധ്യമങ്ങളുടെ ശ്രദ്ധ. യാത്ര കൊണ്ട് നാടിന്റെ പുരോഗതിക്ക് ഒരു ഗുണവുമില്ല എന്ന് വരുത്താനാണ് മാധ്യമങ്ങള് ശ്രമിച്ചത്. ഉല്ലാസയാത്ര, ധൂര്ത്ത് എന്ന നെഗറ്റീവുകള് വളര്ത്താനുള്ള ശ്രമമാണ് ഉണ്ടായത്. യാത്ര കൊണ്ട് എന്ത് ഗുണം എന്ന പ്രതിപക്ഷ ചോദ്യം അതു മനസിലാക്കാന് കഴിയാത്തതുകൊണ്ടാണെന്നും മുഖ്യമന്ത്രി വ്യക്തമാക്കി.
ലോകസമാധാന സമ്മേളനവുമായി ബന്ധപ്പെട്ട് കേരളത്തിന്റെ ആവശ്യത്തെ ഗൗരവമായി പരിഗണിക്കുമെന്ന് നോബല് പീസ് സെന്റര് അറിയിച്ചിട്ടുണ്ട്. നാല് നോര്വീജിയന് കമ്പനികള് കേരളത്തില് നിക്ഷേപം നടത്താന് താല്പര്യം അറിയിച്ചു. തുരങ്ക പാത നിര്മ്മിക്കുന്ന നോര്വേ മാതൃക കേരളത്തിലും അനുകരിക്കും. പ്രകൃതിദുരന്ത പശ്ചാത്തലത്തില് നോര്വീജിയന് മാതൃക കേരളത്തിന് സഹായകമാണ്. കൊച്ചിയെ മാരിടൈം ഹബ്ബായി മാറ്റാനാണ് സര്ക്കാര് ശ്രമിക്കുന്നത്.
ജനുവരിയില് കേരളത്തില് നോര്വീജിയന് സംരംഭകരുടെ സമ്മേളനം നടത്തും. ബാറ്ററി നിര്മ്മാതാക്കളായ കോര്വസ് എനര്ജി കേരളത്തില് നിക്ഷേപം നടത്തും. വയോജന സഹായം ഉള്പ്പെടെ പലതും നോര്വെയില് നിന്നും നമുക്ക് പഠിക്കാനുണ്ട്. ഫിന്ലന്ഡ് സംഘം ഉടന് കേരളം സന്ദര്ശിക്കും. കേരളത്തില് നിന്നുള്ള ആരോഗ്യ പ്രവര്ത്തകര്ക്ക് ഫിന്ലാന്ഡില് വലിയ സാധ്യതയാണുള്ളത്. കേരളത്തില് നിന്നുള്ള കുടിയേറ്റ നടപടികള് ഫിന്ലാന്ഡ് സുഗമമാക്കും. പരിസ്ഥിതി സൗഹൃദ വികസന മേഖലയില് ഫിന്ലാന്റുമായി സഹകരിക്കും.
വിവിധ സര്വകലാശാല പ്രതിനിധികളുമായി ചര്ച്ച നടത്തിയിട്ടുണ്ട്. കേരള ഡിജിറ്റല് സര്വ്വകലാശാല ധാരണ പത്രം ഒപ്പുവച്ചു. ഭാവി കേരളത്തെ കെട്ടിപ്പടുക്കാനുള്ള കൃത്യമായ ലക്ഷ്യത്തോടെയായിരുന്നു യാത്ര നടത്തിയത്. വരും ദിവസങ്ങളില് യാത്രയുടെ ഭാഗമായ തുടര് നടപടികളുണ്ടാകും. ദീര്ഘകാല വികസനത്തിന് അനുയോജ്യമായ പദ്ധതികളാണ് നടപ്പാക്കുന്നത്.
നോര്വെയുമായുള്ള കേരളത്തിന്റെ ബന്ധം മത്സ്യബന്ധന മേഖലയില് വന് കുതിച്ചുചാട്ടമുട്ടാക്കും. സംസ്ഥാനത്തിന്റെ മുന്നോട്ടു പോക്കിന് അനുയോജ്യമായ ലക്ഷ്യങ്ങളോടെയാണ് യാത്ര നടത്തിയത്. ലക്ഷ്യമിട്ടതിനേക്കാള് കൂടുതല് നേട്ടമാണ് നേര്വെ യാത്രകൊണ്ടുണ്ടായത്. മാരിടൈം ക്ലസ്റ്ററിനായി നോര്വെയുടെ സഹായവാഗ്ദാനം ലഭിച്ചിട്ടുണ്ട്. ഗ്രഫീന് അടിസ്ഥാനമാക്കിയുള്ള പദ്ധതികള് യാഥാര്ത്ഥ്യമാകും.
സംസ്ഥാനത്തിന്റെ മുന്നോട്ട് പോക്കിന് അനിവാര്യമായിരുന്നു ഈ യാത്ര. ലോക കേരളസഭയുടെ മേഖലാ സമ്മേളനത്തില് പത്ത് യൂറോപ്യന് രാജ്യങ്ങളുടെ പ്രാതിനിധ്യമാണുണ്ടായത്. ഉന്നത വിദ്യാഭ്യാസ മേഖലയുടെ ഹബ്ബാക്കി കേരളത്തെ മാറ്റാന് ചര്ച്ചയുണ്ടായി. നിര്ദ്ദേശങ്ങള് ലോക കേരള സഭാ സെക്രട്ടേറിയറ്റ് പരിശോധിച്ച് സര്ക്കാരിന് കൈമാറും. യുകെ എംപ്ലോയ്മെന്റ് നവംബറില് സംഘടിപ്പിക്കും. 3000ല് അധികം ഒഴിവുകളിലേക്ക് തൊഴിലവസരങ്ങള് വരുമെന്നും മുഖ്യമന്ത്രി വ്യക്തമാക്കി.
https://www.facebook.com/Malayalivartha
