അമിതഭാരം താങ്ങാനാകാതെ ..... ഗുജറാത്തിലെ മോര്‍ബി ജില്ലയില്‍ തൂക്കുപാലം തകര്‍ന്ന് 91 മരണം... മച്ചു നദിക്ക് കുറുകെയുള്ള പാലമാണ് തകര്‍ന്നത്, വിനോദസഞ്ചാരികളടക്കം ഒട്ടേറെപേര്‍ നദിയില്‍ വീണതായി സംശയം, ഛാട്ട് പൂജയോടനുബന്ധിച്ച് ധാരാളം പേര്‍ പാലത്തിനുമുകളിലെത്തി

ഗുജറാത്തിലെ മോര്‍ബി ജില്ലയില്‍ തൂക്കുപാലം തകര്‍ന്ന് 91 പേര്‍ മരിച്ചു. മച്ചു നദിക്ക് കുറുകെയുള്ള പാലം ഞായറാഴ്ച വൈകീട്ട് ആറരയോടെയാണ് പൊട്ടിവീണത്. അമിതഭാരം താങ്ങാനാകാതെ തകരുകയായിരുന്നു. മരിച്ചവരിലേറെയും സ്ത്രീകളും കുട്ടികളുമാണ്. വര്‍ഷങ്ങള്‍ക്കുമുമ്പ് നിര്‍മിച്ച തൂക്കുപാലം അറ്റകുറ്റപ്പണിക്കുശേഷം ഒക്ടോബര്‍ 26-നാണ് തുറന്നുകൊടുത്തത്. ഒട്ടേറേ സ്ത്രീകളും കുട്ടികളും അപകടസമയത്ത് പാലത്തിലുണ്ടായിരുന്നതായി ദൃക്‌സാക്ഷികള്‍ പറഞ്ഞു.

ദേശീയ ദുരന്തനിവാരണസേനയുടെ മൂന്നുസംഘങ്ങളാണ് രക്ഷാപ്രവര്‍ത്തനം നടത്തുന്നത്. പരിക്കേറ്റവരെ ആശുപത്രിയിലെത്തിച്ചു. നദിയില്‍ വീണവരെ കരയ്ക്കെത്തിക്കാനുള്ള ശ്രമങ്ങള്‍ തുടരുന്നു.


ഗുജറാത്ത് സന്ദര്‍ശനത്തിലുള്ള പ്രധാനമന്ത്രി നരേന്ദ്രമോദി സംഭവത്തിനുപിന്നാലെ മുഖ്യമന്ത്രി ഭൂപേന്ദ്ര പട്ടേലുമായി സ്ഥിതിഗതികള്‍ വിലയിരുത്തി. അടിയന്തര രക്ഷാപ്രവര്‍ത്തനത്തിന് നിര്‍ദേശം നല്‍കി.


സ്വകാര്യ കമ്പനിയാണ് നവീകരണം ഏറ്റെടുത്തതെന്നും പാലത്തിന് മുനിസിപ്പാലിറ്റിയുടെ ഫിറ്റ്നസ് സര്‍ട്ടിഫിക്കറ്റ് ലഭിച്ചിരുന്നില്ലെന്നും ഉദ്യാഗസ്ഥര്‍ അറിയിച്ചു. മരിച്ചവരുടെ കുടുംബത്തിന് രണ്ടുലക്ഷം രൂപവീതവും പരിക്കേറ്റവര്‍ക്ക് അമ്പതിനായിരംരൂപയും പ്രധാനമന്ത്രി സഹായധനം പ്രഖ്യാപിച്ചു. മരിച്ചവരുടെ കുടുംബത്തിന് ഗുജറാത്ത് സര്‍ക്കാര്‍ നാലുലക്ഷം രൂപയും പരിക്കേറ്റവര്‍ക്ക് അമ്പതിനായിരം രൂപയും പ്രഖ്യാപിച്ചു. അപകടത്തില്‍ രാഷ്ട്രപതി ദ്രൗപദി മുര്‍മു നടുക്കം രേഖപ്പെടുത്തി.