ഗവര്ണ്ണറെ സോപ്പിടാന് 75 ലക്ഷത്തിന്റെ ഓഫറുമായി ബാലഗോപാല്! ഇത് ആരുടെ ബുദ്ധി?
ഗവര്ണ്ണര് സര്ക്കാര് പോര് ജനങ്ങള് നേരിടുന്ന യഥാര്ത്ഥ പ്രശ്നങ്ങളില്നിന്ന് ശ്രദ്ധ തിരിക്കാനെന്നു കോണ്ഗ്രസ് നേതാവ് രമേശ് ചെന്നിത്തല ആലപ്പുഴയില്വെച്ച് മാധ്യമങ്ങളോട് പറഞ്ഞു. ഗവര്ണ്ണര് ധനമന്ത്രിയെ വിമര്ശിച്ചത് എന്തിനെന്ന് ഇപ്പോള് മനസ്സിലായി. വിമര്ശനം കേട്ടപാടേ ഗവര്ണ്ണറുടെ ഓഫീസ് നന്നാക്കാന് 75 ലക്ഷം രൂപ ധനമന്ത്രി അനുവദിച്ചുനല്കി. നേരത്തേ സംഘ് പരിവാറിന്റെ സംസ്ഥാനനേതാവിനെ ഗവര്ണ്ണറുടെ പി.എ. ആയി അനുവദിച്ചുകൊടുത്തു. ഇതെല്ലാം ഒത്തുകളിയല്ലാതെ വേറെന്താണ് ?
മാധ്യമങ്ങള് വിവാദ വിഷയങ്ങള് വാര്ത്തയാക്കിയപ്പോള് ജനങ്ങള്ക്ക് ഇരുട്ടടിയായി അരിക്ക് 20 രൂപ കൂടിയതും, കേരളത്തില് വിറ്റഴിക്കുന്ന മരുന്നുകള്ക്ക് ഗുണ നിലവാരമില്ലെന്ന വിജിലന്സ് കണ്ടെത്തലും ചര്ച്ചയായില്ല.കഴിഞ്ഞ കുറെക്കാലമായി പൊലീസ് കുത്തഴിഞ്ഞ അവസ്ഥയിലാണ്. .മുഖ്യമന്ത്രിക്ക് ആഭ്യന്തരവകുപ്പിന്മേല് ഒരു നിയന്ത്രണവുമില്ല. അഴിമതിയും സ്വജനപക്ഷപാതവും കൊടികുത്തിവാഴുന്നു. പൊലീസില് ദിനംപ്രതി വീഴ്ചകള് ആവര്ത്തിക്കുന്നു. മ്യൂസിയത്ത് സ്ത്രീയെ ആക്രമിച്ച കേസിലും പറശ്ശാലയില് പൊലീസ് കസ്റ്റ ഡിയില് പ്രതി വിഷം കഴിച്ച സംഭവത്തിലും പൊലീസിന്റെ ഭാഗത്ത് ഗുരുതരവീഴ്ചയാണ് ഉണ്ടായതെന്ന് പൊലീസ്തന്നെ സമ്മതിച്ചിട്ടും ആര്ക്കെതിരെയും നടപടിയെടുക്കാത്തത് വിചിത്രമെന്നേ പറയാനാകൂ എന്ന് രമേശ് ചെന്നിത്തല പറഞ്ഞു.
ഗവര്ണര് ആരിഫ് മുഹമ്മദ് ഖാനെ പിന്തുണയ്ക്കുന്ന കേരളത്തിലെ കോണ്ഗ്രസ് നേതാക്കളുടെ നടപടിയില് എഐസിസി പ്രസിഡന്റ് മല്ലിഗാര്ജ്ജുന് ഖാര്ഗെയ്ക്ക് അതൃപ്തി.ഗവര്ണറെ പിന്തുണയ്ക്കുന്ന നിലപാട് കോണ്ഗ്രസിനില്ലെന്നും ഖാര്ഗെ വ്യക്തമാക്കി. ഗവര്ണര് വിഷയത്തില് ഖാര്ഗെ സിപിഎം ജനറല് സെക്രട്ടറി സീതാറാം യെച്ചൂരിയുമായും എന്സിപി അധ്യക്ഷന് ശരത് പവാറുമായും ചര്ച്ച നടത്തി.കഴിഞ്ഞ ദിവസങ്ങളില് കെപിസിസി പ്രസിഡന്റ് കെ സുധാകരനും പ്രതിപക്ഷ നേതാവ് വി ഡി സതീശനും ഗവര്ണറെ പിന്തുണച്ചിരുന്നു. ഇതിന് പിന്നാലെയാണ് ഖാര്ഗെയുടെ പ്രതികരണം. സര്ക്കാരിനെ തുടര്ച്ചയായി പ്രതിസന്ധിയിലാക്കുന്ന ഗവര്ണറോട് സമവായത്തിന്റെ പാത വേണ്ടെന്ന് സിപിഎം കേന്ദ്ര കമ്മിറ്റിയില് പൊതു രാഷ്ട്രീയ സാഹചര്യത്തിന്മേലുള്ള ചര്ച്ചയില് പല അംഗങ്ങളും അഭിപ്രായപ്പെട്ടിരുന്നു. ആരിഫ് മുഹമ്മദ് ഖാന്റെ നിലപാട് ഫെഡറല് തത്വങ്ങള്ക്കും ഭരണഘടനയ്ക്കും എതിരാണെന്ന് വിമര്ശനവും ഉയര്ന്നു.
കേരള സര്ക്കാരിന് പൂര്ണ പിന്തുണ നല്കുമെന്ന് വ്യക്തമാക്കിയ കേന്ദ്ര കമ്മിറ്റി, ഗവര്ണറുടെ നടപടികളില് രാഷ്ട്രീയമായി പ്രതിരോധം തീര്ക്കാനും തീരുമാനിച്ചിരുന്നു. വിവിധ സംസ്ഥാനങ്ങളില് ഗവര്ണര്മാര് നടത്തുന്ന ഏറ്റുമുട്ടലിനെതിരെ പ്രതിപക്ഷ പാര്ട്ടികളെ ഒപ്പം നിര്ത്തുന്നതിന്റെ ഭാഗമായാണ് യച്ചൂരി പ്രതിപക്ഷ നേതാക്കളുമായി ചര്ച്ച നടത്തുന്നത്.
കേരളത്തില് ഇടതുപക്ഷ സര്ക്കാരുമായി തുടര്ച്ചയായി ഉരസുന്ന ഗവര്ണര്ക്കു കോണ്ഗ്രസ് നേതൃത്വം ഒളിഞ്ഞുംതെളിഞ്ഞും പിന്തുണ നല്കുന്നുണ്ട്. ഇക്കാര്യത്തില് ഭിന്നാഭിപ്രായങ്ങളുണ്ടെങ്കിലും പ്രതിപക്ഷ നേതാവ് വി.ഡി.സതീശന് ഉള്പ്പെടെയുള്ളവര്ക്കു ഗവര്ണറെ പരസ്യമായി പിന്തുണയ്ക്കുന്ന സമീപനമാണ്. ഏറ്റവുമൊടുവില്, കേരളത്തിലെ 9 സര്വകലാശാലാ വൈസ് ചാന്സലര്മാരോട് (വിസി) രാജിവയ്ക്കണമെന്ന് നിര്ദ്ദേശിച്ച ഗവര്ണറുടെ നടപടിയെ പിന്തുണച്ച് വി.ഡി.സതീശനും രമേശ് ചെന്നിത്തലയും രംഗത്തെത്തി. അതേസമയം, കോണ്ഗ്രസ് സംഘടനാകാര്യ ജനറല് സെക്രട്ടറി കെ.സി.വേണുഗോപാല് ഗവര്ണറുടെ നടപടിയെ വിമര്ശിച്ചിരുന്നു.
https://www.facebook.com/Malayalivartha
