കേരളത്തെ പോലും ഞെട്ടിച്ച ഒരു വലിയ സംഭവമാണ് പാറശ്ശാല സ്വദേശി ഷാരോണിന്റെ ദുരൂഹമരണം. തുടക്കത്തിൽ പലവിധ ആരോപണങ്ങളും അതുപോലെ സംശയങ്ങൾ ഉയർന്നതൊക്കെ ശരിവയ്ക്കുന്നതാണ് ഇപ്പോൾ പുറത്ത് വന്നിരിക്കുന്ന റിപ്പോർട്ട്. ഷാരോണിന്റെ മരണം കൊലപാതകമെന്ന് സമ്മതിച്ചിരിക്കുകയാണ് പെണ്‍സുഹൃത്ത്. ഷാരോണിനെ കഷായത്തില്‍ വിഷം കലര്‍ത്തി കൊന്നതാണെന്നാണ് പെണ്‍സുഹൃത്തായ ഗ്രീഷ്മയുടെ മൊഴി. എന്നാൽ സംഭവത്തിൽ ട്രോളുകൾ ഉരുവാക്കി പ്രതിഷേധിക്കുന്നവർക്കെതിരെ രംഗത്ത് എത്തിയിരിക്കുകയാണ് ഡോ.നെൽസൺ ജോസഫ്.

ഫേസ്ബുക്ക് കുറിപ്പ് ഇങ്ങനെ;

"ജ്യൂസ്‌ തരാത്തതിനു നന്ദി"
"കുടിക്കുന്നതിനു മുൻപ്‌ കുപ്പി പൊട്ടിച്ചിട്ടില്ലെന്ന് ഉറപ്പു വരുത്തുക"
" നിനക്കെന്താ കുടിക്കാൻ വേണ്ടത്‌? - ഒന്നും വേണ്ട, ഡയറ്റിങ്ങിലാ "
'തമാശ' ആണെന്ന് കരുതി തള്ളിവിടുന്നതിൽ ചിലതിന്റെ സാമ്പിൾ മാത്രം.
ഇതൊക്കെ പ്രതീക്ഷിച്ചിരുന്നതുകൊണ്ട്‌ വലിയ ഞെട്ടലൊന്നും ഇത്തവണ ഉണ്ടായില്ലെന്ന് മാത്രം. മുൻ കാമുകിക്കും ഭാര്യയ്ക്കുമൊക്കെ നന്ദി പറഞ്ഞ്‌ തമാശിക്കുന്നവർ മറന്നുപോവുന്ന ഒരു ചെറിയ കാര്യമുണ്ട്‌.

നടന്നത്‌ ഒരു ക്രൂരമായ ക്രൈമാണ്. അതിന്റെ പിന്നിലുള്ളത്‌ ഒരു കുറ്റവാളിയും. അതിന്റെ പേരിൽ ഇങ്ങനെ 'തമാശ' അടിച്ചിറക്കി വിടുമ്പൊ ചെയ്യുന്നത്‌ ഇത്രേയുള്ളൂ. മനുഷ്യരാശിയുടെ മറ്റേ പകുതി മൊത്തം എതിർലിംഗത്തിലുള്ളവരെ വകവരുത്താൻ നടക്കുന്നവരാണെന്ന് ദ്യോതിപ്പിക്കുക.

അതല്ലെങ്കിൽ പിന്നെ അങ്ങനെ ചെയ്യാതിരിക്കുന്നതിനു നന്ദി പറയുന്നതിനു മറ്റേതർത്ഥമാണുള്ളത്‌? ഈ അടുത്ത്‌ തന്നെ എത്ര പെൺകുട്ടികൾ ആക്രമിക്കപ്പെട്ടിട്ടുണ്ട്‌, കൊല്ലപ്പെട്ടിട്ടുണ്ട്‌. അന്നൊക്കെ ഇത്തരം ട്രോളുകൾ ഈ രീതിയിൽ ആഘോഷിക്കപ്പെട്ടോ എന്നൊന്ന് ആലോചിച്ചാൽ തീരാനുള്ളതേയുള്ളൂ ആവേശവും സംശയങ്ങളും.