ലോട്ടറി ക്കച്ചവടം നടത്തിയിരുന്ന അയിരൂര്‍ ഇലകമണ്‍ ദേശത്ത് പാണില്‍ കോളനി ഒലിപ്പുവിള വീട്ടില്‍ ബാബുവിനെ(58) തലയ്ക്കടിച്ചു കൊന്ന കേസിലെ പ്രതിയെ 'മനപ്പൂര്‍വ്വമല്ലാത്ത നരഹത്യക്ക്' അഞ്ച് വര്‍ഷം കഠിന തടവിനും 50000 രൂപ പിഴയും ശിക്ഷ വിധിച്ച് കോടതി ഉത്തരവിട്ടു.


പിഴ ഒടുക്കിയില്ലങ്കില്‍ 6 മാസം കൂടി അധിക തടവ് അനുഭവിക്കണം.പിഴ ഒടുക്കിയാല്‍ തുക മരണപ്പെട്ട ബാബുവിന്റെ ആശ്രിതര്‍ക്ക് നല്‍കാനും കോടതി ഉത്തരവിട്ടു.

നെയ്യാറ്റിന്‍കര, പെരുമ്പഴുതൂര്‍ മൊട്ടക്കാട് കോളനിയില്‍ അനില്‍ മകന്‍ വിജയ് എന്ന് വിളിക്കുന്ന ബിജോയ് (25)നെയാണ് തിരുവനന്തപുരം അഡീഷണല്‍ സെഷന്‍സ് ജഡ്ജ് കെ.വിഷ്ണു ശിക്ഷിച്ചത്.

കേസിലെ രണ്ടും,മൂന്നും പ്രതികളായ ഇലകമണ്‍ പാണില്‍ ലക്ഷം വീട് കോളനിയില്‍ താമസക്കാരായ മാധവന്‍ മകന്‍ ഉണ്ണി എന്ന് വിളിക്കുന്ന സൈജു (32) രാജേന്ദ്രന്‍ മകന്‍ കണ്ണന്‍ എന്ന് വിളിക്കുന്ന സജീവ് (22) എന്നിവരെ മതിയായ തെളിവില്ലാത്തത് കാരണം കോടതി വെറുതെ വിട്ടു.


23-1-2015 ലായിരുന്നു കൃത്യത്തിനാസ്പദമായ സംഭവം. കേസിലെ രണ്ടാം പ്രതി , പാണില്‍ കോളനിയിയിലെ പൊതു ടാപ്പില്‍ നിന്നും ഉടുതുണിയില്ലാതെ കുളിച്ചത് പറഞ്ഞ് വിലക്കിയതാണ് കൊലക്കുള്ള വിരോധ കാരണം.

കൃത്യദിവസം രാത്രി 9 മണിക്ക് പ്രതികള്‍ പൊതു ടാപ്പ് പരിസരത്ത് വരുകയും രണ്ടാം പ്രതി ഉണ്ണി ഉടുതുണിയില്ലാതെ കുളിക്കുന്നത് കേസിലെ പ്രധാന സാക്ഷിയായ മോഹനനും,കൊല്ലപ്പെട്ട ബാബുവും ഉള്‍പ്പെടെയുള്ള കോളനി നിവാസികള്‍ ചോദ്യം ചെയ്തു.കോളനി നിവാസികളും പ്രതികളും തമ്മിലുള്ള വാക്കേറ്റത്തിനിടെ ചെണ്ട മുറുക്കാന്‍ ഉപയോഗിക്കുന്ന ഇരുമ്പ് കമ്പി കൊണ്ട് ഒന്നാം പ്രതി ബിജോയ്, സാക്ഷി മോഹനന്റെ തലക്കടിച്ചത് പിടിച്ച് മാറ്റാന്‍ ശ്രമിച്ച ബാബുവിന്റെ തലയില്‍ കൊള്ളുകയായിരുന്നു.

സ്ഥലത്ത് കുഴഞ്ഞ് വീണ ബാബുവിനെ തിരുവനന്തപുരം മെഡിക്കല്‍ കോളേജില്‍ എത്തിച്ചങ്കിലും ചികിത്സയിരിക്കേ മരണപ്പെട്ടു.ബാബുവിന്റെ മകള്‍ മിനിമോള്‍, മോഹനന്‍ എന്നിവരായിരുന്നു ദൃക്‌സാക്ഷികള്‍.