തലശ്ശേരിയിൽ കഴിഞ്ഞ ദിവസം ആറ് വയസുകാരനെ യുവാവ് ചവിട്ടി പരിക്കേൽപ്പിച്ച സംഭവത്തിൽ പൊലീസിന് വീഴ്ച പറ്റിയോയെന്ന പരിശോധന തുടങ്ങിയ സാഹചര്യത്തിൽ കേരളം അക്ഷരാർത്ഥത്തിൽ ഞെട്ടിയിരിക്കുകയാണ്. വ്യാഴാഴ്ച രാത്രി സംഭവം നടന്നിട്ടും പ്രതിയെ കസ്റ്റഡിയിലെടുക്കാതെ വീട്ടിലേക്ക് പറഞ്ഞു വിടുകയാണ് ചെയ്തിരിക്കുന്നത്. ഇതിൽ തലശ്ശേരി പൊലീസിന് സംഭവിച്ച വീഴ്ചയാണ് എഎസ്പി നിഥിൻ രാജ് അന്വേഷിക്കുക. എന്നാലിതാ ചവിട്ടേറ്റ ആ കുഞ്ഞിൻ്റെ ശാരീരികമായ ആഘാതത്തേക്കാൾ പതിന്മടങ്ങായിരിക്കും മാനസികമായി ആ കുഞ്ഞിനേറ്റ ആഘാതം. ആ ആഘാതത്തിനാണ് പരിചരണം കൂടുതൽ വേണ്ടത്... എന്ന് പറയുകയാണ് ദീപ നിശാന്ത്.

ഫേസ്ബുക്ക് കുറിപ്പ് ഇങ്ങനെ;

"Rosy lips.....
Curly hair....
Very Fair.....
Eyes are blue......
Lovely too........
Teacher's Pet, Is that You!"

തുടുത്ത കവിൾത്തടങ്ങൾ, ചുവന്ന ചുണ്ടുകൾ, വെളുത്ത നിറം, നീലക്കണ്ണുകൾ, ചുരുളൻ തലമുടി..ഇങ്ങനെയൊക്കെയായ കുട്ടികളാണ് 'ടീച്ചേഴ്സ് പെറ്റ്' എന്ന് പഠിപ്പിക്കുന്ന ഒരു നാട്ടിൽ എത്രയെത്ര കുഞ്ഞുങ്ങളാണ് ഇനിയും ചവിട്ടുകൾ ഏറ്റുവാങ്ങേണ്ടി വരുക!

ചവിട്ടേറ്റ ആ കുഞ്ഞിൻ്റെ ശാരീരികമായ ആഘാതത്തേക്കാൾ പതിന്മടങ്ങായിരിക്കും മാനസികമായി ആ കുഞ്ഞിനേറ്റ ആഘാതം. ആ ആഘാതത്തിനാണ് പരിചരണം കൂടുതൽ വേണ്ടത്... ചിലപ്പോൾ ആഘാതം പോലുമേൽക്കാത്ത വിധമുള്ള നിസ്സംഗത മാനസികമായും ശാരീരികമായുമുള്ള ജീവിതാനുഭവങ്ങളിലൂടെ ആ കുഞ്ഞ് ഇതിനകം കൈവരിച്ചിട്ടുണ്ടാകും..

പക്ഷേ ചവിട്ടേറ്റപ്പോൾ ഒന്നമ്പരന്ന് പിന്നെ തീർത്തും സ്വാഭാവികമായി മുന്നോട്ട് നീങ്ങുന്ന ആ കുഞ്ഞ് നമുക്കേൽപ്പിക്കുന്ന ആഘാതം ചെറുതല്ല.. മനുഷ്യാന്തസ്സിനെ മാനിക്കാത്ത ഏതു പെരുമാറ്റവും വിചാരണ ചെയ്യപ്പെടുക തന്നെ വേണം. ആ കുഞ്ഞിൻ്റെയും പ്രിയപ്പെട്ടവരുടേയും കണ്ണുകളിലെ ഭയം മാറട്ടെ.... അന്തസ്സോടെ ഇന്നാട്ടിൽത്തന്നെ ജീവിക്കാനാകട്ടെ.