ഇത്രയേറെ വിട്ടുവീഴ്ച നടത്തിയിട്ടും പിന്‍വലിയ്ക്കാത്ത സമരമായി വിഴിഞ്ഞം മാറുന്നു. സര്‍ക്കാര്‍ പലവട്ടം ചര്‍ച്ച നടത്തിയിട്ടും സമരത്തില്‍ നിന്നും പിന്‍മാറാന്‍ ലത്തീന്‍ സഭ തയ്യാറായിട്ടില്ല. അതിനിടെ അച്ചന്‍മാര്‍ക്കെതിരെ വരെ നിരവധി ആരോപണങ്ങളുയര്‍ന്നു. അവസാനം വിഴിഞ്ഞം സമരം അവസാനിപ്പിക്കാനായി സമവായ ചര്‍ച്ചകളില്‍ അദാനി ഗ്രൂപ്പും രംഗത്തിറങ്ങി. തീരശോഷണം മൂലം വീട് നഷ്ടപ്പെട്ടവരുടെ പുനരധിവാസത്തിനായി സിഎസ്ആര്‍ ഫണ്ടും ഉപയോഗിക്കാമെന്ന നിര്‍ദ്ദേശം, സര്‍ക്കാര്‍ നിയോഗിച്ച മധ്യസ്ഥരുമായുള്ള ചര്‍ച്ചയില്‍ അദാനി ഗ്രൂപ്പ് മുന്നോട്ട് വച്ചു.

എന്നാല്‍ ഈ നിര്‍ദ്ദേശത്തോട് അനുകൂലമായല്ല ലത്തീന്‍ അതിരൂപതയുടെ പ്രതികരണം. സമരക്കാരുമായുള്ള സര്‍ക്കാരിന്റെ ഔദ്യോഗിക ചര്‍ച്ചകള്‍ വഴിമുട്ടിയതോടെയാണ് അനൗദ്യോഗിക പ്രശ്‌ന പരിഹാര ശ്രമങ്ങള്‍ സജീവമാകുന്നത്. സമരക്കാരുമായി ചര്‍ച്ച നടത്താനായി സര്‍ക്കാര്‍ നിയോഗിച്ച മധ്യസ്ഥരുമായാണ് അദാനി ഗ്രൂപ്പും ചര്‍ച്ച നടത്തിയത്.കെ.വി.തോമസ് അടക്കം സഭയുമായി അടുപ്പമുള്ള ചില പൊതുപ്രവര്‍ത്തകരുമായാണ് ചര്‍ച്ച നടത്തിയത്. സമരം എത്രയും വേഗം അവസാനിപ്പിക്കുന്നതിനുള്ള ശ്രമം ഉണ്ടാകണമെന്നാണ് അദാനി ഗ്രൂപ്പ് ആവശ്യപ്പെടുന്നത്.

വിഴിഞ്ഞം തുറമുഖത്തിന്റെ അഞ്ച് കിലോമീറ്റര്‍ ചുറ്റളവില്‍ വീട് നഷ്ടപ്പെട്ടവരുടെ പുനരധിവാസത്തിന് സിഎസ്ആര്‍ ഫണ്ട് ഉപയോഗിക്കാമെന്ന നിര്‍ദ്ദേശമാണ് പ്രധാനമായും പരിഗണനയിലുള്ളത്. അദാനി ഗ്രൂപ്പ് മുന്നോട്ട് വച്ച നിര്‍ദ്ദേശങ്ങള്‍ അനൗദ്യോഗിക ചര്‍ച്ചകളിലൂടെ സര്‍ക്കാര്‍ ലത്തീന്‍ അതിരൂപതയെ അറിയിക്കുന്നുണ്ട്. എന്നാല്‍ തുറമുഖ നിര്‍മാണം നിര്‍ത്തിവയ്ക്കുന്നത് ഉള്‍പ്പടെയുള്ള ഏഴ് ആവശ്യങ്ങളിലും വിട്ട് വീഴ്ചയില്ലെന്നാണ് രൂപതയുടെ നിലപാട്.

മണ്‍സൂണ്‍ കഴിഞ്ഞതോടെ എത്രയും വേഗം തുറമുഖ നിര്‍മാണം പുനരാംഭിക്കണമെന്നാണ് അദാനി ഗ്രൂപ്പ് ചര്‍ച്ചയില്‍ ആവശ്യപ്പെട്ടത്.കഴിഞ്ഞ സെപ്റ്റംബര്‍ മുതല്‍ മെയ് വരെയുള്ള കാലയളവിലാണ് ഏറ്റവും അധികം പണി പൂര്‍ത്തിയായതെന്നും, അതിനാല്‍ ഈ സീസണാണ് നിര്‍മാണത്തിന് ഏറ്റവും യോജ്യമെന്നുമാണ് അദാനി ഗ്രൂപ്പും നിര്‍മാണ കമ്പനി അറിയിക്കുന്നത്. സമരം മൂലം ഇതുവരെ 160 കോടിയിലേറെ നഷ്ടമുണ്ടായിട്ടുണ്ടെന്നാണ് അദാനി ഗ്രൂപ്പിന്റെ കണക്ക്.

അതേസമയം വിഴിഞ്ഞം സമരം രാജ്യവിരുദ്ധമെന്ന് മന്ത്രി അബ്ദുറഹിമാന്‍. തുറമുഖ നിര്‍മ്മാണം നിര്‍ത്തിവെക്കുകയെന്നത് രാജ്യത്തെ ബാധിക്കുന്ന പ്രശ്‌നമാണ്. ഒരു സര്‍ക്കാരിനും അത്തരമൊരു കാര്യം ആവശ്യപ്പെടാനാകില്ല. രാജ്യ താത്പര്യത്തെ എതിര്‍ക്കുന്ന സമരം പാടില്ല. വിഴിഞ്ഞം തുറമുഖത്തിന് അനന്ത സാധ്യതകളാണ് ഉള്ളതെന്നും മന്ത്രി പറഞ്ഞു.വിഴിഞ്ഞം സമരവുമായി ബന്ധപ്പെട്ട് തുറമുഖ നിര്‍മ്മാണം നിര്‍ത്തിവെച്ചുകൊണ്ടുള്ള പഠനം എന്ന ആവശ്യത്തെയാണ് സര്‍ക്കാര്‍ എതിര്‍ക്കുന്നതെന്ന് മന്ത്രി പറഞ്ഞു. 2015ല്‍ കാരാറില്‍ ഏര്‍പ്പെടുന്നതിന് മുമ്പ് തന്നെ എല്ലാ പഠനങ്ങളും നടത്തിയിരുന്നു. ഇപ്പോഴത്തെ സമരസമിതില്‍ ഉള്ളവരുടെ തന്നെ അറിവോടെയാണ് കരാറില്‍ ഏര്‍പെട്ടതെന്നും മന്ത്രി പറഞ്ഞു.

വിഴിഞ്ഞം തുറമുഖ നിര്‍മ്മാണത്തിനായി ഇതിനോടകം കോടിക്കണക്കിന് രൂപ മുടക്കിക്കഴിഞ്ഞു. ഇതിന് ആര് സമാധാനം പറയും? സമരക്കാര്‍ സമരത്തില്‍ നിന്ന് പിന്മാറണമെന്നാണ് അഭ്യര്‍ത്ഥിക്കാനുള്ളത്. കോടതിയില്‍ നിന്ന് അന്തിമ വിധി വന്നാല്‍ അതിനനുസരിച്ച് നടപടിയെടുക്കാമെന്നും അദ്ദേഹം പറഞ്ഞു. തുറമുഖ നിര്‍മ്മാണം നിര്‍ത്തിവച്ചുള്ള പഠനം എന്ന ആവശ്യം മാത്രമാണ് സര്‍ക്കാര്‍ എതിര്‍ക്കുന്നത്.

പഠനം എന്ന ആവശ്യം സര്‍ക്കാര്‍ അംഗീകരിച്ചു ഉത്തരവിറക്കി. മത്സ്യത്തൊഴിലാളികള്‍ക്ക് 25 രൂപ മണ്ണെണ്ണ സബ്സിഡി ഇപ്പോള്‍ തന്നെ നല്‍കുന്നുണ്ട്. മണ്ണെണ്ണ എഞ്ചിന് പകരം മറ്റ് എഞ്ചിനുകളിലേക്ക് മാറുകയാണ് നല്ലത്. പെട്രോള്‍ എഞ്ചിന്‍ ആക്കുന്നതിന് സബ്‌സിഡി നല്‍കാം എന്ന് ഏറ്റിട്ടുണ്ട്.മത്സ്യത്തൊഴിലാളികളുടെ പുനരധിവാസത്തിനുള്ള കാര്യങ്ങള്‍ സര്‍ക്കാര്‍ ചെയ്യുന്നുണ്ടെന്ന് മന്ത്രി പറഞ്ഞു. തിരുവനന്തപുരം മുട്ടത്തറയില്‍ മാത്രം 300 വീടുകള്‍ ഇതിന്റെ ഭാഗമായി നിര്‍മ്മിക്കും. ആകെ 500 വീടുകള്‍ പണിയും. വിഴിഞ്ഞത്തെ 180 കുടുംബങ്ങള്‍ സര്‍ക്കാര്‍ സഹായം സ്വീകരിച്ച് വാടക വീടുകളിലേക്ക് മാറിയെന്നും മന്ത്രി പറഞ്ഞു.