പ്രമുഖ ചലച്ചിത്ര നടി ഷംന കാസിമിനെ ബ്ലാക്ക് മെയില്‍ ചെയ്ത് മോചനദ്രവ്യത്തിനായി തട്ടിക്കൊണ്ടു പോയി തടങ്കലിലാക്കാന്‍ ശ്രമിച്ച കേസില്‍ ഹെയര്‍ സ്‌റ്റൈലിസ്റ്റ് ഹാരിസും ഷംനയുടെ വിവാഹാലോചനയുമായി എത്തിയ റഫീഖും അടക്കം 10 പ്രതികള്‍ ഹാജരാകാന്‍ എറണാകുളം പ്രിന്‍സിപ്പല്‍ ജില്ലാ സെഷന്‍സ് കോടതി ഉത്തരവിട്ടു.

ഒന്നാം പ്രതി റഫീഖ് എന്നും റാഫി എന്നുമറിയപ്പെടുന്ന അന്‍വര്‍, , രണ്ടാം പ്രതി മുഹമ്മദ് ഷെരീഫ് , മൂന്നാം പ്രതി രമേശ് , നാലാം പ്രതി അഷ്‌റഫ് , 5. അബ്ദുള്‍ സലാം , 6. മുഹമ്മദ് ഹാരീസ് , 7. റഹീം , 8. കെ.കെ.അബൂബക്കര്‍ , 9. നജീബ് രാജ , 10. ജാഫര്‍ സാദിഖ് എന്നിവരാണ് ഹാജരാകേണ്ടത്. പ്രതികള്‍ ഡിസംബര്‍ 12 ന് ഹാജരാകാന്‍ ജില്ലാ ജഡ്ജി ഹണി. എം.വര്‍ഗീസ് ഉത്തരവിട്ടു.


പ്രണയം നടിച്ച് രാത്രി കാലങ്ങളില്‍ ദീര്‍ഘ നേരം ചാറ്റു ചെയ്ത് വിവാഹ ആലോചനയുടെ മറവിലാണ് കൊച്ചി മരട് വീട്ടിലെത്തി തട്ടിക്കൊണ്ടു പോകാന്‍ ശ്രമിച്ചത്. ഇതിനിടെ പണം ആവശ്യപ്പെട്ടെങ്കിലും നല്‍കിയില്ലെന്നാണ് നടിയുടെ മൊഴി. നടിയെ കാറില്‍ കറങ്ങി വരാമെന്ന് വിശ്വസിപ്പിച്ച് കടത്തിക്കൊണ്ടു പോയി തടവിലാക്കി മോചനദ്രവ്യം ആവശ്യപ്പെടാന്‍ പ്രതികള്‍ പദ്ധതിയിട്ടു.


എന്നാല്‍ ഷംന പൊലീസില്‍ പരാതി നല്‍കിയതോടെ പ്രതികള്‍ പദ്ധതി ഉപേക്ഷിക്കുകയായിരുന്നു. എല്ലാത്തിന്റെയും ആസൂത്രണം അറസ്റ്റിലായ ഹെയര്‍ സ്‌റ്റൈലിസ്റ്റ് ഹാരിസും ഷംനയുടെ വിവാഹാലോചനയുമായി എത്തിയ റഫീഖും ചേര്‍ന്നാണ് എന്നാണ് കളമശ്ശേരി പൊലീസ് എഫ് ഐ ആര്‍ രജിസ്റ്റര്‍ ചെയ്ത് പ്രത്യേക അന്വേഷണ സംഘം സമര്‍പ്പിച്ച കുറ്റപത്രത്തില്‍ പറയുന്നത്.

സിനിമാ പ്രവര്‍ത്തകനായ ഷാജി പട്ടിക്കരയാണ് നടിയുടെ നമ്പര്‍ പ്രതികള്‍ക്ക് കൈമാറിയത്. ഇത്തരത്തില്‍ സിനിമാ മേഖലയിലെ പല പ്രമുഖരുടെയും നമ്പര്‍ പ്രതികള്‍ സംഘടിപ്പിച്ചു.

അതേ സമയം അറസ്റ്റ് ചെയ്ത് 60 ദിവസത്തിനകം പോലീസ് കുറ്റപത്രം സമര്‍പ്പിക്കാത്തതിനാല്‍ ഷംന കേസില്‍ ഒന്നാം പ്രതി ഉള്‍പ്പെടെ 4 പ്രതികളെ കൂടി കോടതി 2020 ആഗസ്റ്റ് 27 ന് ജാമ്യത്തില്‍ വിട്ടയച്ചു. എറണാകുളം കളമശ്ശേരി ജുഡീഷ്യല്‍ ഒന്നാം ക്ലാസ് മജിസ്‌ട്രേറ്റ് കോടതിയാണ് ജാമ്യം അനുവദിച്ചത്. ഉപാധികളോടെയാണ് ജാമ്യം.
തട്ടിപ്പിന്റെ ആസൂത്രണം ഹാരിസും റഫീഖും ചേര്‍ന്നാണ്. സ്വര്‍ണക്കടത്ത് കെട്ടുകഥ മാത്രമാണെന്നാണ് പോലീസ് ഭാഷ്യം. കേസന്വേഷണ ഘട്ടത്തില്‍ ഹൈദരബാദില്‍ നിന്നും എത്തി കൊച്ചി മരടിലെ വീട്ടില്‍ ഹോം ക്വാറന്റീനില്‍ പ്രവേശിച്ചതിനാല്‍ ഷംന കാസിമിന്റെ മൊഴിയെടുപ്പ് വിഡിയോ കോണ്‍ഫറന്‍സിങ് വഴിയായിരുന്നു.

ഷംനയെ ഭീഷണിപ്പെടുത്തി പണം തട്ടാന്‍ ശ്രമിച്ച കേസിലും പെണ്‍കുട്ടികളെ ചതിയില്‍ വീഴ്ത്തിയ കേസിലും 8 പ്രതികളാണ് 2020 ആഗസ്റ്റ് വരെ അറസ്റ്റിലായത്. എല്ലാത്തിന്റെയും ആസൂത്രണം ആഗസ്റ്റില്‍ അറസ്റ്റിലായ ഹെയര്‍ സ്‌റ്റൈലിസ്റ്റ് ഹാരിസും ഷംനയുടെ വിവാഹാലോചനയുമായി എത്തിയ റഫീഖും ചേര്‍ന്നാണ്.

നടി പോലീസില്‍ പരാതി നല്‍കിയതോടെ പ്രതികള്‍ക്കെതിരേ മറ്റു ചില യുവതികളും സമാന പരാതിയുമായി രംഗത്തെത്തിയിരുന്നു. 2021 ലാണ് പോലീസ് കുറ്റപത്രം സമര്‍പ്പിച്ചത്. 2022 ജനുവരി 10 നാണ് കേസ് വിചാരണക്കായി എറണാകുളം ജില്ലാ കോടതിയിലേക്ക് കളമശേരി ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേട്ട് കോടതി കമ്മിറ്റ് ചെയ്തയച്ചത്.