ദേശീയപാത വികസനം; പാലോളി പാലം മേഖലയിലെ ജനങ്ങളുടെ ആശങ്കകൾക്ക് പരിഹാരം വേണമെന്ന ആവശ്യവുമായി കെ കെ രമ . ഫേസ്ബുക്കിൽ പങ്കു വച്ച കുറിപ്പിൽ പറയുന്നത് ഇങ്ങനെ; ദേശീയപാത വികസനവുമായി ബന്ധപ്പെട്ട് പാലോളി പാലം, പുതുപ്പണം മേഖലയിലെ ജനങ്ങൾ അനുഭവിക്കുന്ന ദുരിതങ്ങൾക്കും ആശങ്കകൾക്കും പരിഹാരമുണ്ടാക്കാൻ അധികൃതർ തയ്യാറാവണം.

നിലവിൽ മൂരാടിനും കരിമ്പനപ്പാലത്തിനുമിടയിൽ ദേശീയപാത മുറിച്ചുകടക്കാൻ വഴികളൊന്നുമില്ല. രണ്ടു കിലോമീറ്ററിനിടയിൽ ഫ്ലൈ ഓവറോ/അണ്ടർ പസ്സോ ഉണ്ടാവുമെന്ന നാഷണൽ ഹൈവേ അതോറിറ്റിയുടെ ഉറപ്പ് ഇവിടെമാത്രം പാലിക്കപ്പെടാതെ പോകുന്നത് എന്തുകൊണ്ടാണെന്നു മനസിലാവുന്നില്ല. ജെ.എൻ.എം സ്കൂൾ, റൂറൽ എസ്.പി ഓഫിസ്, ഇറിഗേഷൻ ഓഫിസ്, നിർദ്ദിഷ്ട സബ്ജയിൽ, ഗവ:ആയൂർവേദ ആശുപത്രി, പ്രീമെട്രിക് ഹോസ്റ്റൽ, ബി-എഡ് കോളേജ് തുടങ്ങി ജനങ്ങൾക്ക് ദൈനം ദിനം ബന്ധപ്പെടേണ്ട നിരവധി സർക്കാർ/ സ്വകാര്യ സ്ഥാപനങ്ങൾ സ്ഥിതി ചെയ്യുന്ന വടകരയിലെ പ്രധാന കേന്ദ്രമാണ് ഇവിടം.

അതുകൊണ്ട് തന്നെ ഇവിടെ ഫ്ലൈ ഓവറോ അടിപ്പാതയോ നിർമിക്കണമെന്ന പ്രദേശവാസികളുടെ ആവശ്യം ഏറ്റവും പ്രധാനമാണ്. മാത്രമല്ല വടകരയെയും മണിയൂർ പഞ്ചായത്തിനെയും ബന്ധിപ്പിക്കുന്ന പലയാട്ട് നട റോഡും സ്ഥിതിചെയ്യുന്നത് ഇവിടെയാണ്. ഈ ആവശ്യം വളരെ നേരത്തെ തന്നെ എല്ലാ അധികാര കേന്ദ്രങ്ങളെയും അറിയിച്ചിരുന്നു. നമ്മുടെ ആവശ്യം അനുഭാവപൂർണ്ണം പരിഗണിക്കാമെന്നായിരുന്നു ആ ഘട്ടത്തിൽ നാഷണൽ ഹൈവേ അതോറിറ്റി അധികൃതർ നൽകിയ ഉറപ്പ്.

എന്നാൽ കാലമിത്രയായിട്ടും പ്രായോഗികമായി അത്തരം നടപടികളിലേക്ക് അധികൃതർ കടക്കുന്നില്ല എന്ന സാഹചര്യത്തിലാണ് പുതുപ്പണം ജനകീയ സമിതിയുടെ നേതൃത്വത്തിൽ അരവിന്ദഘോഷ് റോഡിൽ ഇങ്ങനെയൊരു പ്രതിഷേധ സായാഹ്നം സംഘടിപ്പിക്കപ്പെട്ടത്. ജനങ്ങളുടെ ഏറ്റവും ന്യായമായ ഈ ആവശ്യം അനുഭാവപൂർണ്ണം പരിഗണിച്ചു ആവശ്യമായ നടപടികൾ സ്വീകരിക്കണമെന്ന് അധികൃതരോട് അഭ്യർത്ഥിക്കുന്നു. ഒപ്പം നാടിന്റെ ആവശ്യം മുൻനിർത്തി ഇത്തരമൊരു പോരാട്ടത്തിന് നേതൃത്വമായ ജനകീയ സമരസമിതി പ്രവർത്തകരെ സ്നേഹത്തോടെ അഭിവാദ്യം ചെയ്യുന്നു.
.