കേരള പൊതുവില്‍പന നികുതി (ഭേദഗതി) ബില്ലിന്റെ കരടിന് ഇന്ന് ചേര്‍ന്ന പ്രത്യേക മന്ത്രിസഭായോഗം അംഗീകാരം നല്‍കി. 1963 ലെ കെജിഎസ്ടി നിയമം ഭേദഗതി ചെയ്യുന്നതിന് 2022ലെ കേരള പൊതുവില്‍പന നികുതി (ഭേദഗതി) ബില്ലിന്റെ കരടിനാണ് മന്ത്രിസഭായോഗം അംഗീകാരം നല്‍കിയത്.


സംസ്ഥാനത്തിനകത്ത് വിദേശമദ്യം നിര്‍മ്മിക്കുകയും വില്‍ക്കുകയും ചെയ്യുന്ന ഡിസ്റ്റലറികള്‍ക്ക് ഈടാക്കുന്ന 5 ശതമാനം ടേണ്‍ ഓവര്‍ ടാക്സ് ഒഴിവാക്കുമ്പോള്‍ ഉണ്ടാകുന്ന വരുമാന നഷ്ടം പരിഹരിക്കാനായി വിദേശമദ്യത്തിന്റെ കെജിഎസ്ടി നിരക്ക് 4 ശതമാനം വര്‍ദ്ധിപ്പിക്കുവാന്‍ തീരുമാനിച്ചിരുന്നു. ഇതിന്റെ അടിസ്ഥാനത്തിലാണ് നിയമഭേദഗതി.


അതേസമയം വടകര ആയഞ്ചേരിയിലെ സജീവന്റെ കുടുംബത്തിന് മുഖ്യമന്ത്രിയുടെ ദുരിതാശ്വാസ നിധിയില്‍ നിന്നും ധനസഹായം നല്‍കും.വടകര പൊലീസ് കസ്റ്റഡിയില്‍ എടുത്തതിനു ശേഷം പൊലീസ് സ്റ്റേഷന്‍ പരിസരത്ത് ഇദ്ദേഹം കുഴഞ്ഞ് വീണ് മരണപ്പെടുകയായിരുന്നു.

സജീവന്റെ മാതാവ് ജാനു, ജാനുവിന്റെ സഹോദരി നാരായണി എന്നിവര്‍ക്ക് അവരുടെ ജീവിതകാലം വരെ പ്രതിമാസം 3,000 രൂപ വീതം നല്‍കാനാണ് തീരുമാനമായത്.