കണ്ണൂരില്‍ നിന്ന് ശബരിമലയിലേക്കുപോയ ശബരിമല തീര്‍ഥാടകര്‍ സഞ്ചരിച്ച ബസ് ലോറിയുമായി കൂട്ടിയിടിച്ച് മൂന്നുപേര്‍ക്ക് പരുക്കേറ്റു.

ബുധനാഴ്ച പുലര്‍ച്ച നാലിന് പെരുവാരം വളവിലായിരുന്നു അപകടം. ബസ് ഡ്രൈവര്‍ പ്രദീപ്, യാത്രക്കാരായ ലീല, ജനാര്‍ദനന്‍ എന്നിവര്‍ക്കാണ് പരുക്കേറ്റത്.

ഇവരെ സ്വകാര്യ ആശുപത്രിയില്‍ പ്രവേശിപ്പിച്ച് പ്രാഥമിക ചികിത്സ നല്‍കി. പരുക്ക് സാരമുള്ളതല്ല. അപകടത്തില്‍പെട്ട ബസിന്റെ ഉടമകള്‍ മറ്റൊരു ബസ് സജ്ജമാക്കിയശേഷം തീര്‍ഥാടകര്‍ ശബരിമലയിലേക്ക് യാത്ര തുടര്‍ന്നു.

അതേസമയം ജമ്മു കശ്മീരില്‍ 300 അടി താഴ്ചയിലേക്ക് കാര്‍ മറിഞ്ഞ് മൂന്ന് പേര്‍ മരിച്ചു. രണ്ടുപേരെ ഗുരുതര പരിക്കുകളോടെ ആശുപത്രിയില്‍ പ്രവേശിപ്പിച്ചു. ജമ്മു കശ്മീരിലെ കത്വ ജില്ലയിലാണ് സംഭവം നടന്നത്.

ബുധനാഴ്ച രാത്രി അഞ്ച് പേരടങ്ങുന്ന സംഘം സഞ്ചരിച്ച കാറാണ് അപകടത്തില്‍ പെട്ടത്. റോഡില്‍ നിന്ന് തെന്നിമാറിയ കാര്‍ 300 അടി താഴ്ചയുള്ള തോട്ടിലേക്ക് മറിയുകയായിരുന്നെന്ന് പൊലീസ്.

മൂന്ന് പേര്‍ സംഭവസ്ഥലത്തുവെച്ചു തന്നെ മരിക്കുകയും രണ്ടുപേരെ ഗുരുതര പരുക്കുകളോടെ കത്വയിലെ സര്‍ക്കാര്‍ മെഡിക്കല്‍ കോളജില്‍ പ്രവേശിപ്പിക്കുകയും ചെയ്തു.