കഴിഞ്ഞ ദിവസം പ്രധാനമന്ത്രി നരേന്ദ്രമോദിയുടേയും അദാനിയുടേയും ഫോട്ടോ കാണിച്ച് സ്‌കോര്‍ ചെയ്ത രാഹുല്‍ ഗാന്ധിക്ക് അതേ നാണയത്തില്‍ തിരിച്ചടി നല്‍കി മോദി. നെഹ്‌റു എന്ന സര്‍നെയിം കുടുംബാംഗങ്ങള്‍ എന്ത് കൊണ്ട് തുടര്‍ന്ന് ഉപയോഗിക്കുന്നില്ല എന്ന് നരേന്ദ്രമോദി പറഞ്ഞു. നെഹ്‌റുവിനെ എവിടെയങ്കിലും പരാമര്‍ശിക്കാതെ പോയാല്‍ കോണ്‍ഗ്രസ് അസ്വസ്ഥരാകും. എന്നാല്‍ അദ്ദേഹം ഇത്രയും മഹാനാണെങ്കില്‍ എന്ത് കൊണ്ടാണ് കുടുംബാംഗങ്ങള്‍ പോലും സ്വന്തം പേരിനോടൊപ്പം നെഹ്‌റു എന്ന് ചേര്‍ത്തുപയോഗിക്കുന്നില്ല എന്ന് മോദി ചോദ്യമുന്നയിച്ചു.

രാഷ്ട്രപതിയുടെ നയപ്രഖ്യാപനത്തിന്‍മേലുള്ള ചര്‍ച്ചയില്‍ മറുപടി പറയവേ ആയിരുന്നു അദ്ദേഹം ഗാന്ധി കുടുംബത്തിനെതിരെ വിമര്‍ശനമുന്നയിച്ചത്. മോദിയ്ക്ക് ആഗോള വ്യവസായിയായ അദാനിയുമായി ബന്ധമുണ്ടെന്ന് രാഹുല്‍ ഗാന്ധി പര്‍ലമെന്റില്‍ ഉന്നയിച്ചതിന് പിന്നാലെയാണ് ഗാന്ധി കുടുംബത്തെയും കോണ്‍ഗ്രസിനെയും പ്രധാനമന്ത്രി കടന്നാക്രമിച്ചത്. രാജ്യം ഒരു കുടുംബത്തിന്റെയും സ്വത്തല്ലെന്നും മോദി പറഞ്ഞു.

സര്‍ക്കാര്‍ പദ്ധതികളുടെ പേര് സംബന്ധിച്ച് കോണ്‍ഗ്രസ് പരാതികള്‍ ഉന്നയിക്കാറുണ്ട്. ഏതാണ്ട് അറുന്നൂറോളം പദ്ധതികള്‍ നെഹ്‌റുവിന്റെ പേരിലാണ് അറിയപ്പെടുന്നത്. എന്നിട്ടും ചില പദ്ധതികളില്‍ നെഹ്‌റുവിന്റെ പേരില്ലെങ്കില്‍ ചിലര്‍ വിറളിപിടിക്കുന്നു. ഞങ്ങള്‍ ചിലപ്പോള്‍ അദ്ദേഹത്തിന്റെ പേര് വിട്ടുപോയെന്നു വരാം, എന്നാല്‍ എന്നെ ആശ്ചര്യപ്പെടുത്തുന്ന കാര്യമുണ്ട്.

രാജ്യത്തെ പ്രഥമ പ്രധാനമന്ത്രിയായ അദ്ദേഹത്തിന്റെ പേര് കുടുംബാംഗങ്ങളൊന്നും തന്നെ ഉപയോഗിക്കാത്തത് എന്ത് കൊണ്ടാണ്? എന്തിനാണ് നാണിക്കുന്നത് പ്രധാനമന്ത്രി കൂട്ടിച്ചേര്‍ത്തു. അതേസമയം അദാനിയുടെ ഓഹരിത്തട്ടിപ്പില്‍ അന്വേഷണം വേണമെന്ന പ്രതിപക്ഷത്തിന്റെ മുദ്രാവാക്യങ്ങള്‍ക്കിടയിലായിരുന്നു പ്രധാനമന്ത്രി പ്രസംഗം പൂര്‍ത്തിയാക്കിയത്. അദാനി ഗ്രൂപ്പിനെതിരായ ആരോപണങ്ങളില്‍ സംയുക്ത പാര്‍ലമെന്ററി അന്വേഷണ സമിതി വേണമെന്ന ആവശ്യവുമായി പ്രതിപക്ഷ എം പിമാര്‍ ഇന്നും നടുത്തളത്തില്‍ ഇറങ്ങി പ്രതിഷേധമറിയിച്ചു.

ഗാന്ധി കുടുംബവും, കോണ്‍ഗ്രസും ചേര്‍ന്ന് രാജ്യത്തെ തകര്‍ത്തു.ജനങ്ങളെ ഭിന്നിപ്പിക്കാന്‍ ശ്രമിച്ചു. അവസരങ്ങളെ പ്രതിസന്ധികളാക്കി.കോണ്‍ഗ്രസിന് താല്‍പര്യങ്ങള്‍ മറ്റ് പലതിലുമായിരുന്നു.യു പി എ ഭരണകാലത്തേത് പോലെ രാജ്യത്ത് ജനം നരകിച്ചിട്ടില്ല.കോണ്‍ഗ്രസ് തകര്‍ത്ത ഭാരതത്തെ ബിജെപി പടുത്തുയര്‍ത്തി.പ്രശ്‌നങ്ങളില്‍ നിന്ന് ഒളിച്ചോടില്ല.കോണ്‍ഗ്രസിന് താല്‍പര്യം ഫോട്ടോ ഷൂട്ടില്‍ മാത്രമാണ്.

ഖര്‍ഗെയുടെ തട്ടകത്തില്‍ താന്‍ എത്തിയതിലുള്ള പ്രതിഷേധമാണ് അദ്ദേഹം കാട്ടുന്നത്. കലബുര്‍ഗിയില്‍ മാത്രം 8 ലക്ഷം ജന്‍ധന്‍ അക്കൗണ്ടുകളാണ് തുറന്നത്. കണ്ണീരൊഴുക്കിയിട്ട് കാര്യമില്ല. ജനം നിങ്ങളെ തള്ളിക്കഴിഞ്ഞു.കല ബുര്‍ഗിയെ ബിജെപി നവീകരിച്ചു. കല്‍ ബുര്‍ഗി വികസനമെന്തെന്ന് അറിയുന്നത് ഇപ്പോഴാണ്. ദാരിദ്ര്യം മാറ്റുമെന്നത് വെറും മുദ്രാവാക്യം മാത്രമായിരുന്നു കോണ്‍ഗ്രസിന്. തട്ടിപ്പ് കൊണ്ട് കാര്യമില്ല. നന്നായി വിയര്‍പ്പൊഴുക്കണം.ഞങ്ങള്‍ കഠിനാധ്വാനം ചെയ്തു. നിങ്ങള്‍ വെറുതെ ഇരുന്നുവെന്നുംപ്രധാനമന്ത്രി വ്യക്തമാക്കി

കഠിനാധ്വാനത്തിലൂടെ ജനങ്ങളുടെ വിശ്വാസം സര്‍ക്കാര്‍ നേടി. ഈ സര്‍ക്കാരിന്റെ പ്രഥമ പരിഗണന രാജ്യതാല്‍പര്യമാണ്.കോണ്‍ഗ്രസിന്റെ പ്രഥമ പരിപരിഗണന 'ഒരു കുടുംബ 'വും. ജനസേവനമാണ് യഥാര്‍ത്ഥ മതേതരത്വം. രാഷ്ടീയ താല്‍പര്യത്തിനായി ജനങ്ങളെ പറ്റിക്കുന്ന പരിപാടി ബിജെപിക്കില്ല. രാജ്യം കോണ്‍ഗ്രസിനെ വീണ്ടും വീണ്ടും തള്ളിക്കളയുന്നു. കോണ്‍ഗ്രസ് ഭരണ കാലത്ത് ആദിവാസികള്‍ ഭീതിയിലാണ് കഴിഞ്ഞത്. വര്‍ഷങ്ങളായി കോണ്‍ഗ്രസ് അവരെ തഴഞ്ഞിട്ടിരിക്കുകയായിരുന്നു. കര്‍ഷകരെ കോണ്‍ഗ്രസ് ചൂഷണം ചെയ്തു.എന്നാല്‍ ഈ സര്‍ക്കാര്‍ കര്‍ഷകരെ സാമ്പത്തികമായി ശാക്തീകരിച്ചു'വെന്നും മോദി പറഞ്ഞു.

അതേസമയം പ്രധാനമന്ത്രി നരേന്ദ്രമോദി ഇന്ന് മുംബൈയില്‍. മുംബൈ -സോളാപൂര്‍ ,മുംബൈ - സായ്‌നഗര്‍ ശിര്‍ദ്ദി എന്നീ രണ്ട് വന്ദേ ഭാരത് ട്രെയിനുകള്‍ നരേന്ദ്രമോദി ഫ്‌ലാഗ് ഓഫ് ചെയ്യും. രാജ്യത്തെ ഒമ്പതാമത്തെയും പത്താമത്തെയും വന്ദേ ഭാരത ട്രെയിനുകള്‍ ആവും ഇവ.