കെഎസ്ആര്‍ടിസി ശമ്പളത്തിന് ഏപ്രില്‍ മുതല്‍ സര്‍ക്കാര്‍ സഹായമില്ലെന്ന് ഹൈക്കോടതിയില്‍ വ്യക്തമാക്കിയിരിക്കുകയാണ്. 5421 ബസുകള്‍ ഉണ്ടെങ്കിലും തെറ്റായ ഡ്യൂട്ടി പാറ്റേണ്‍ നിമിത്തം 4400 ബസുകള്‍ മാത്രമാണു സര്‍വീസ് നടത്തുന്നത്. 25,000 ജീവനക്കാരില്‍ അനുമതിയില്ലാതെ ജോലിക്കു ഹാജരാകാത്ത 1200 പേരുണ്ട്. പരിഷ്‌കരണ നടപടികളില്‍ പലതിനോടും യൂണിയനുകള്‍ മുഖം തിരിഞ്ഞു നില്‍ക്കുന്ന സാഹചര്യമുണ്ടെന്നും അറിയിച്ചു.

അതേസമയം ജീവനക്കാരുടെ ശമ്പളത്തിനുള്ള ധനസഹായം അടുത്ത ഏപ്രില്‍ മുതല്‍ നിര്‍ത്തലാക്കുമെന്നു യൂണിയന്‍ നേതാക്കളെയും കോര്‍പറേഷനെയും സര്‍ക്കാര്‍ അറിയിച്ചതായി കെഎസ്ആര്‍ടിസി ഹൈക്കോടതിയെ അറിയിച്ചു. ഓണക്കാലത്തെ ശമ്പളത്തിന് സഹായം നല്‍കുമ്പോഴാണ് സര്‍ക്കാര്‍ ഇക്കാര്യം അറിയിച്ചത്. ചീഫ് സെക്രട്ടറിയും ധനകാര്യ സെക്രട്ടറിയും ഡിസംബറില്‍ ഇതാവര്‍ത്തിച്ചു.

സ്വന്തം ചെലവിനുള്ള വരുമാന സ്രോതസ്സ് കോര്‍പറേഷന്‍ കണ്ടെത്തണമെന്നും അറിയിച്ചിട്ടുണ്ട്. 2022 ജൂലൈ മുതല്‍ സര്‍ക്കാര്‍ 50 കോടി രൂപ സഹായം നല്‍കുന്നുണ്ട്. ശമ്പള വിതരണത്തിനു പദ്ധതി വേണമെന്ന് ആവശ്യപ്പെട്ട് ജീവനക്കാര്‍ നല്‍കിയ ഹര്‍ജിയിലാണു ഡപ്യൂട്ടി ലോ ഓഫിസര്‍ പി.എന്‍.ഹേനയുടെ സത്യവാങ്മൂലം. വസ്തുതകള്‍ അറിയാതെയാണു ഹര്‍ജിക്കാര്‍ ഈയാവശ്യം ഉന്നയിക്കുന്നതെന്നു കോര്‍പറേഷന്‍ വിശദീകരിച്ചു. ദിവസവരുമാനം 8 കോടിയായി വര്‍ധിപ്പിക്കാന്‍ ശ്രമിക്കുന്നുണ്ട്. ഇതു സാധ്യമായാല്‍ മാസത്തിന്റെ ആദ്യവാരം തന്നെ ശമ്പളം നല്‍കാനാവും.

ബാങ്കുകളും ധനകാര്യസ്ഥാപനങ്ങളും കോര്‍പറേഷനു വായ്പ നല്‍കുന്നില്ല. വരുമാനം കണ്ടെത്തുക എന്നതു ജീവനക്കാരുടെയും കോര്‍പറേഷന്റെയും ഉത്തരവാദിത്തമാണ്. സിംഗിള്‍ ഡ്യൂട്ടി പാറ്റേണ്‍ നടപ്പാക്കിയാല്‍ പ്രതിമാസം 20-25 കോടി രൂപ അധികവരുമാനമുണ്ടാകും. ഡ്യൂട്ടി പാറ്റേണ്‍ സംസ്ഥാനമെങ്ങും നടപ്പാക്കാന്‍ 6 മാസം വേണ്ടി വരും. ഇതിനു ജീവനക്കാരുടെ സഹകരണം ആവശ്യമാണ്. ഡ്യൂട്ടി പാറ്റേണ്‍ നടപ്പാക്കാന്‍ യൂണിയനുകള്‍ സര്‍ക്കാരിനു മുന്നില്‍ സമ്മതിച്ചെങ്കിലും അതു കോടതിയില്‍ ചോദ്യം ചെയ്യുന്ന സാഹചര്യമുണ്ടായി. കോടതി സ്റ്റേ നിരാകരിച്ചതോടെയാണു നടപ്പാക്കി തുടങ്ങിയത്.

അതേസമയം കെഎസ്ആര്‍ടിസി ബസില്‍ പ്രധാന നഗരങ്ങളിലെ സ്റ്റാന്‍ഡില്‍ എത്തിയാല്‍ അവിടെ നിന്നു പോകേണ്ട സ്ഥലത്തേക്ക് ഓട്ടോറിക്ഷ അടക്കമുള്ള ചെറുവാഹന സൗകര്യം ഏര്‍പ്പെടുത്താന്‍ ഗതാഗതവകുപ്പ്. 'ലാസ്റ്റ് മൈല്‍ കണക്ടിവിറ്റി ' എന്ന പേരിലുള്ള ഈ പദ്ധതി നടപ്പാക്കുമ്പോള്‍, കെഎസ്ആര്‍ടിസി ബസില്‍ കയറുമ്പോള്‍ത്തന്നെ കൃത്യമായി യാത്രക്കാരന് എത്തേണ്ട സ്ഥലത്തേക്ക് ടിക്കറ്റെടുക്കാം.

തിരുവനന്തപുരത്ത് നിന്ന് എറണാകുളം സ്റ്റാന്‍ഡില്‍ ഇറങ്ങി ഹൈക്കോടതിയിലേക്കാണ് പോകേണ്ടതെങ്കില്‍ തിരുവനന്തപുരത്തുനിന്നു കയറുമ്പോള്‍ ഹൈക്കോടതിയെന്ന് ടിക്കറ്റെടുത്ത് എറണാകുളത്ത് സ്റ്റാന്‍ഡില്‍ സജ്ജീകരിച്ചിട്ടുള്ള ഓട്ടോറിക്ഷ ഉപയോഗിക്കാനാകും. ഇതിനായി ഇലക്ട്രിക് ഓട്ടോ വാങ്ങി നല്‍കാന്‍ കെടിഡിഎഫ്‌സിയുമായി ചര്‍ച്ച നടക്കുകയാണ്. ഓട്ടോകള്‍ക്ക് ഇതിനായി പ്രത്യേക പെര്‍മിറ്റ് നല്‍കും.

നഗരങ്ങളിലെ പ്രധാന സ്റ്റോപ്പുകളിലേക്ക് യാത്രക്കാരനെ എത്തിക്കാനുള്ള ഫീഡര്‍ സര്‍വീസുകള്‍ക്കായി 8 മുതല്‍ 24 വരെ സീറ്റുള്ള വാഹനങ്ങള്‍ക്ക് പെര്‍മിറ്റ് നല്‍കുന്ന പദ്ധതിയും ഇതിന്റെ ഭാഗമായി തുടങ്ങി. അടുത്ത ഘട്ടത്തില്‍ ഫീഡര്‍ സര്‍വീസുകളില്‍ ഓട്ടോറിക്ഷയ്ക്ക് പെര്‍മിറ്റ് അനുവദിക്കുന്നതും പരിഗണിക്കും. ഫീഡര്‍ സര്‍വീസുകള്‍ക്ക് പ്രത്യേക നിറം നല്‍കും. കെഎസ്ആര്‍ടിസിയുടെ ടിക്കറ്റ് മെഷീനും ഇവര്‍ക്ക് ലഭ്യമാക്കും.

ഫീഡര്‍ സര്‍വീസിലെ ടിക്കറ്റുമായി കയറുന്നവര്‍ക്ക് കെഎസ്ആര്‍ടിസിയില്‍ ചെറിയ ഇളവു നല്‍കും. ഫീഡര്‍ സര്‍വീസില്‍ 10 രൂപ ടിക്കറ്റാണെങ്കില്‍ ഇതില്‍ 9 രൂപ വാഹന ഉടമയ്ക്കും 1 രൂപ കെഎസ്ആര്‍ടിസിക്കുമാണ്. ഫീഡര്‍ സര്‍വീസില്‍ നിന്നു കെഎസ്ആര്‍ടിസി ബസില്‍ കയറി സ്റ്റാന്‍ഡിലെത്തിയാല്‍ ഈ ടിക്കറ്റ് കാണിച്ച് 1 രൂപ തിരികെ വാങ്ങാം. ഈ പദ്ധതി ഇരുചക്രവാഹന ഉപയോഗവും അതുവഴിയുള്ള അപകടങ്ങളും കുറയ്ക്കാന്‍ സഹായിക്കും.