ഇ.പി ജയരാജനും പി. ജയരാജനുമെതിരെ സിപിഎം അന്വേഷണ കമ്മീഷനെ നിയോഗിച്ചു
ആയുര്വേദ റിസോര്ട്ട് വിവാദത്തില് പരസ്പരം ആരോപണങ്ങള് ഉന്നയിച്ച ഇ പി ജയരാജനും പി ജയരാജനുമെതിരെ സിപിഎം അന്വേഷണ കമ്മീഷനെ നിയോഗിച്ചു. ആയുര്വേദ റിസോര്ട്ട് വഴി അനധികൃതമായി സ്വത്ത് സമ്പാദിച്ചു എന്ന ആരോപണം ഉയര്ന്നതിന് പിന്നാലെ ഇ പി ജയരാജന് പ്രതിരോധത്തിലായിരുന്നു. വിഷയം സംസ്ഥാന സെക്രട്ടറിയേറ്റില് പരിഗണിച്ചപ്പോള് പാടേ നിഷേധിച്ചെങ്കിലും തനിക്കെതിരെ ഗൂഢാലോചന നടന്നതായാണ് ഇ പിയുടെ പരാതി. ഇതിന്പ്രകാരമാണ് പി ജയരാജനെതിരെ അന്വേഷണം പ്രഖ്യാപിച്ചത്.
കണ്ണൂരിലെ മൊറാഴയിലെ ആയുര്വേദ റിസോര്ട്ടുമായി ഇ പി ജയരാജന് അനധികൃത സാമ്പത്തിക ഇടപാട് നടത്തി എന്നായിരുന്നു പി ജയരാജന്റെ ആരോപണം. എന്നാല് ആയുര്വേദ റിസോര്ട്ടുമായി നേരിട്ട് ബന്ധമില്ലെന്നും മകനും ഭാര്യയുമാണ് ബോര്ഡ് അംഗങ്ങളെന്നുമായിരുന്നു വിഷയത്തില് ഇ പി ജയരാജന് സിപിഎം സംസ്ഥാന സെക്രട്ടറിയേറ്റിന് മുന്നില് നല്കിയ വിശദീകരണം. ആരോപണത്തെ ശക്തമായി പിന്താങ്ങുന്നതില് നിന്ന് പിന്നോട്ടു പോകുന്ന സമീപനമായിരുന്നു പി ജയരാജന് പിന്നീട് സ്വീകരിച്ചത്.
രേഖാ മൂലം പരാതി എഴുതി നല്കിയാല് വിഷയം ചര്ച്ചയ്ക്കെടുക്കാമെന്ന് സംസ്ഥാന സെക്രട്ടറിയേറ്റ് ആവശ്യപ്പെട്ടിട്ടും പി ജയരാജന് പരാതി നല്കിയിരുന്നില്ല. മറ്റ് മുതിര്ന്ന നേതാക്കള് ആവശ്യപ്പെട്ടത് പ്രകാരം വിഷയത്തില് പി ജയരാജന് സംയമനം പാലിക്കുന്നതായാണ് വിവരം.
https://www.facebook.com/Malayalivartha
