ഉമ്മന്‍ ചാണ്ടി കേരളത്തിന്റെ മുന്‍ മുഖ്യമന്ത്രി മാത്രമല്ല എല്ലാമെല്ലാമാണ്. ഉമ്മന്‍ചാണ്ടിയുടെ ആ ലാളിത്യം മലയാളികളുടെ പ്രിയപ്പെട്ടവനാക്കി. അതിനാലാണ് ഉമ്മന്‍ ചാണ്ടിക്ക് ചികിത്സ നിഷേധിക്കുന്നു എന്നു പറഞ്ഞപ്പോള്‍ കേരളം ഉണര്‍ന്നത്. അവസാനം ഉറക്കത്തിലായിരുന്ന പല നേതാക്കളുടേയും കണ്ണ് തുറപ്പിച്ചു.

മുന്‍ മുഖ്യമന്ത്രിയും എംഎല്‍എയുമായ ഉമ്മന്‍ചാണ്ടിയെ വിദഗ്ധ ചികിത്സക്കായി ഇന്ന് ബെംഗളൂരുവിലേക്ക് കൊണ്ടുപോകും. നിംസ് ആശുപത്രിയില്‍ കഴിയുന്ന അദ്ദേഹത്തിന്റെ ന്യൂമോണിയ ഭേദമായതിനെ തുടര്‍ന്നാണ് ബെംഗളൂരുവിലേക്ക് മാറ്റുന്നത്. ന്യൂമോണിയ ബാധയെ തുടര്‍ന്ന് കഴിഞ്ഞ തിങ്കളാഴ്ചയാണ് അദ്ദേഹത്തെ ആശുപത്രിയില്‍ പ്രവേശിപ്പിച്ചത്. ന്യൂമോണിയ ഭേദമായാല്‍ അദ്ദേഹത്തെ വിദഗ്ധ ചികിത്സക്കായി മാറ്റന്ന കാര്യം നേരത്തെ തീരുമാനിച്ചികുന്നു.

എഐസിസിയാണ് ഉമ്മന്‍ ചാണ്ടിയെ ബെംഗളൂരുവിലെത്തിക്കുന്നത്. കോണ്‍ഗ്രസ് അധ്യക്ഷന്‍ മല്ലികാര്‍ജുന ഖാര്‍ഗെയുടെ നിര്‍ദ്ദേശാനുസരണം കെ സി വേണുഗോപാല്‍ ഉമ്മന്‍ ചാണ്ടിയെ സന്ദര്‍ശിച്ചിരുന്നു. ഞായറാഴ്ച ചാര്‍ട്ടേഡ് വിമാനത്തില്‍ അദ്ദേഹത്തെ ബെംഗളൂരുവിലേക്ക് കൊണ്ട് പോകും. വിമാനം എഐസിസി ഏര്‍പ്പാടാക്കിയെന്നും അദ്ദേഹം അറിയിച്ചു.

ഉമ്മന്‍ചാണ്ടിയുടെ ആരോഗ്യ നിലയില്‍ മകനെന്ന നിലയ്ക്ക് തനിക്ക് ഉത്തരവാദിത്തവുമുണ്ടെന്ന് മകന്‍ ചാണ്ടി ഉമ്മന്‍ പറഞ്ഞു. ചികിത്സ സംബന്ധിച്ച് ദുഃഖകരമായ പ്രചാരണം നടന്നു. വ്യാജ വാര്‍ത്തകള്‍ പടച്ച് വിടുന്നത് ശരിയല്ല. എല്ലാ മെഡിക്കല്‍ രേഖകളും തന്റെ പക്കലുണ്ടെന്നും ചാണ്ടി ഉമ്മന്‍ പറഞ്ഞു. ഉമ്മന്‍ ചാണ്ടിക്ക് വിദഗ്ധ ചികിത്സ ലഭ്യമാക്കുന്നില്ലെന്ന് ബന്ധുക്കള്‍ ആരോപിച്ചിരുന്നു.

ചികിത്സക്ക് കുടുംബം സഹകരിക്കുന്നില്ലെന്നത് തെറ്റായ പ്രചാരണമാണ്. പിതാവിന്റെ ചികിത്സാ വിവരങ്ങള്‍ സമയമാകുമ്പൊ പുറത്ത് വിടും. ചികിത്സ സംബന്ധിച്ച് വ്യാജ രേഖകള്‍ നിര്‍മ്മിച്ചിരിക്കുന്നു. രോഗവ്യാപനം ഇല്ലെന്നാണ് റിപ്പോര്‍ട്ട്. പിന്നെ എന്തിനാണ് ഈ ക്രൂരയെന്നും വ്യാജ പ്രചരണങ്ങളില്‍ മുഖ്യമന്ത്രി ഇടപെടണമെന്നും ചാണ്ടി ഉമ്മന്‍ പറഞ്ഞു.

ഉമ്മന്‍ചാണ്ടിയുടെ ആരോഗ്യ നില സംബന്ധിച്ച് ചിലര്‍ വ്യാജ രേഖയുണ്ടാക്കിയെന്നാണ് മകന്‍ ചാണ്ടി ഉമ്മന്‍ തുറന്നടിച്ചത്. ഇവിടെ നടക്കുന്നത് വ്യാജ പ്രചാരണമാണ്. ചിലര്‍ വ്യാജ വാര്‍ത്തകള്‍ നല്‍കുന്നു. കുടുംബത്തോട് എന്തിനാണ് ഇങ്ങനെ ക്രൂരത കാണിക്കുന്നതെന്നും ചാണ്ടി ഉമ്മന്‍ ചോദിച്ചു. പലതും പറയാനുണ്ട്. സമയമാകുമ്പോള്‍ പറയും. ഉമ്മന്‍ ചാണ്ടിക്ക് ന്യൂമോണിയ മാറിയിട്ടുണ്ട്. എന്നാലും ക്ഷീണിതനാണെന്നും ചാണ്ടി ഉമ്മന്‍ കൂട്ടിച്ചേര്‍ത്തു.

തുടര്‍ചികിത്സയ്ക്കായി ഇന്ന് ബെംഗളൂരുവിലെ എച്ച്‌സിജി കാന്‍സര്‍ കെയര്‍ സെന്ററിലേക്കു കൊണ്ടു പോകും. എഐസിസി ജനറല്‍ സെക്രട്ടറി കെ.സി.വേണുഗോപാല്‍ ഉമ്മന്‍ചാണ്ടി ചികിത്സയില്‍ കഴിയുന്ന നിംസ് ആശുപത്രിയിലെത്തി അദ്ദേഹവുമായും കുടുംബാംഗങ്ങളുമായും ചര്‍ച്ച നടത്തിയതിന്റെ അടിസ്ഥാനത്തിലാണു തീരുമാനം. എയര്‍ ആംബുലന്‍സിലോ ചാര്‍ട്ടേഡ് വിമാനത്തിലോ ആകും കൊണ്ടുപോവുക.

ഉടന്‍ തന്നെ ബെംഗളൂരുവില്‍ എത്തിച്ചു തുടര്‍ചികിത്സ നടത്തണമെന്ന് സോണിയ ഗാന്ധിയും രാഹുല്‍ ഗാന്ധിയും എഐസിസി പ്രസിഡന്റ് മല്ലികാര്‍ജുന്‍ ഖര്‍ഗെയും നിര്‍ദേശിച്ച കാര്യം വേണുഗോപാല്‍ കുടുംബത്തെ അറിയിച്ചു. ചികിത്സയ്ക്കു വേണ്ട സൗകര്യമെല്ലാം പാര്‍ട്ടി ഏര്‍പ്പാടാക്കുമെന്നും വ്യക്തമാക്കി. സര്‍ക്കാര്‍ രൂപീകരിച്ച മെഡിക്കല്‍ ബോര്‍ഡും ഉമ്മന്‍ചാണ്ടിയെ പരിശോധിച്ച് ബെംഗളൂരുവിലേക്കു കൊണ്ടു പോകുന്നതിന് അനുമതി നല്‍കിയിരുന്നു. കേന്ദ്ര മന്ത്രി വി. മുരളീധരനും ഇന്നലെ ഉമ്മന്‍ചാണ്ടിയെ സന്ദര്‍ശിച്ചു.

ഉമ്മന്‍ചാണ്ടിയുടെ ആരോഗ്യ നിലയും ചികിത്സയും സംബന്ധിച്ച തെറ്റായ വിവരങ്ങളാണ് പലരും പ്രചരിപ്പിക്കുന്നതെന്നും ഇതിനായി വ്യാജരേഖ പോലും ഉണ്ടാക്കിയെന്നും മകന്‍ ചാണ്ടി ഉമ്മന്‍ പറഞ്ഞു. അനുയോജ്യമായ ഏതു ചികിത്സ നല്‍കുന്നതിലും കുടുംബത്തിന് എതിര്‍പ്പില്ലെന്നും ചാണ്ടി ഉമ്മന്‍ പറഞ്ഞു.