കോഴിക്കോട് മെഡിക്കല്‍ കോളജ് ആശുപത്രി മാതൃ ശിശു കേന്ദ്രത്തില്‍ മോഷണം ആരോപിച്ച് ചോദ്യംചെയ്യലിന് ഇരയായ ആദിവാസി യുവാവ് തൂങ്ങിമരിച്ച നിലയില്‍

വയനാട് മേപ്പാടി പാറവയല്‍ സ്വദേശി വിശ്വനാഥനാണ് (46) മരിച്ചത്. മോഷണം ആരോപിച്ച് മെഡിക്കല്‍ കോളജിലെ സെക്യൂരിറ്റി ജീവനക്കാര്‍ ചോദ്യം ചെയ്തിരുന്നുവെന്നും ഇതില്‍ വിശ്വനാഥന് വിഷമമുണ്ടായിരുന്നെന്നും ഭാര്യാമാതാവ് പറഞ്ഞു. ഭാര്യ ബിന്ദുവിന്റെ പ്രസവത്തിനാണ് വയനാട്ടില്‍നിന്ന് വിശ്വനാഥന്‍ എത്തിയത്. വ്യാഴാഴ്ച ബിന്ദു ആണ്‍കുഞ്ഞിന് ജന്‍മം നല്‍കിയിരുന്നു. ഇവരുടെ ആദ്യത്തെ കുഞ്ഞാണിത്.

വെള്ളിയാഴ്ച പുലര്‍ച്ചെ മുതല്‍ വിശ്വനാഥനെ കാണാനില്ലെന്ന് കുടുംബം പരാതി നല്‍കിയിട്ടുണ്ടായിരുന്നു. വെള്ളിയാഴ്ച അഗ്‌നിരക്ഷാസേനയുടെ സഹായത്തോടെ മെഡിക്കല്‍ കോളജ് പരിസരത്ത് തിരച്ചില്‍ നടത്തിയതായി എസ്.എച്ച്.ഒ ബെന്നി ലാലു പറഞ്ഞു.

ശനിയാഴ്ച രാവിലെയാണ് മെഡിക്കല്‍ കോളജിനു സമീപത്തായി ആളൊഴിഞ്ഞ പറമ്പില്‍ മരത്തില്‍ തൂങ്ങിമരിച്ച നിലയില്‍ നാട്ടുകാര്‍ കണ്ടെത്തിയത്. ഐ.എം.സി.എച്ചിന് മുറ്റത്തെ കൂട്ടിരിപ്പുകാരുടെ കേന്ദ്രത്തില്‍ പണവും മൊബൈലും മോഷണം പോയതായി പരാതി ഉണ്ടായിരുന്നത്രെ. ഇതുമായി ബന്ധപ്പെട്ട് സെക്യൂരിറ്റി ജീവനക്കാര്‍ വിശ്വനാഥനെ ചോദ്യം ചെയ്തിരുന്നുവെന്നാണ് ബന്ധുക്കള്‍ പറയുന്നത്. സംഭവത്തില്‍ ഉന്നത പൊലീസ് ഉദ്യോഗസ്ഥരുടെ നേതൃത്വത്തില്‍ അന്വേഷണം തുടങ്ങി.