നടൻ ഹരീഷ് പേരടിയുടെ പുതിയ ചിത്രത്തിന്റെ പോസ്റ്റർ പങ്കുവെച്ച പോളിറ്റ് ബ്യൂറോ അംഗം എം.എ. ബേബിക്കെതിരേ വിമർശനം. പാർട്ടിയേയും നേതാക്കളേയും വിമർശിക്കുന്ന ഹരീഷ് പേരടിയുടെ പോസ്റ്റർ പങ്കുവെക്കുന്നത് ശരിയല്ലെന്നാണ് ഇടതുപക്ഷക്കാരായ സോഷ്യല്‍ മീഡിയ ഉപയോക്താക്കളുടെ വിമർശനം. എന്നാൽ ഹരീഷ് പേരടിയുമായുള്ള സൗഹൃദമാണ് പോസ്റ്റർ റിലീസിന് കാരണമായതെന്ന വിശദീകരണവുമായി എം.എ. ബേബി രംഗത്തെത്തി.

പോസ്റ്റർ പങ്കുവെക്കുന്നതിലൂടെ അവരുടെ നിലപാടുകൾക്ക് അംഗീകാരം കൊടുത്തു എന്ന് വ്യാഖ്യാനിക്കേണ്ടതില്ലെന്നും സങ്കുചിതമായ കക്ഷിരാഷ്ട്രീയ പരിഗണനകൾക്കതീതമായി കലാ, സാഹിത്യപരമായ സഹകരണം വിശാലാടിസ്ഥാനത്തിൽ സാധ്യമാകണമെന്നാണ് കാലഘട്ടം ആവശ്യപ്പെടുന്ന നിലപാടെന്നും അദ്ദേഹം ഫേസ്ബുക്കിൽ കുറിച്ചു.സംസ്ഥാന സർക്കാരിനേയും ഇടതുപക്ഷത്തേയും മുഖ്യമന്ത്രിയേയും സമൂഹ മാധ്യമങ്ങളിൽ നിരന്തരം വിമർശിക്കുന്നയാളാണ് ഹരീഷ് പേരടി. പല വിമർശനങ്ങളും സമീപകാലത്ത് വിവാദമാകുകയും ചെയ്തിരുന്നു.

ഈ സാഹചര്യത്തില്‍ ഹരീഷ് പേരടിയുടെ പുതിയ ചിത്രത്തിന്റെ പോസ്റ്റർ പങ്കുവെച്ചതാണ് ഒരുവിഭാഗത്തെ ചൊടിപ്പിച്ചിരിക്കുന്നത്. പോസ്റ്റിന് താഴെ കടുത്ത ഭാഷയിലാണ് കമന്റുകൾ വരുന്നത്. സാധാരണ പാർട്ടി പ്രവർത്തകർക്ക് മാത്രമല്ല, പോളിറ്റ് ബ്യൂറോ അംഗങ്ങൾക്കുകൂടി പാർട്ടി ക്ലാസ് കൊടുക്കേണ്ട അവസ്ഥയാണ് എന്നടക്കമുള്ള കമന്റുകളാണ് പോസ്റ്റിന് താഴെ വരുന്നത്.