സ്ത്രീ പ്രസവിക്കുന്നതപ്പോള്... ട്രാന്സ് ദമ്പതികളായ സിയ, സഹദ് എന്നിവര്ക്ക് കുഞ്ഞുപിറന്നത് സമൂഹമാധ്യമങ്ങള് ആഘോഷിക്കുമ്പോള് അഭിനന്ദന പ്രവാഹം; അതിനിടെ ആദ്യമായി പരസ്യമായി എതിര്സ്വരവുമായി എം.കെ. മുനീര്; പുരുഷന് പ്രസവിച്ചെന്ന് വിശ്വസിക്കുന്നവര് മൂഢരുടെ സ്വര്ഗത്തില്
ട്രാന്സ് ദമ്പതികളായ സിയസഹദ് എന്നിവര്ക്ക് കുഞ്ഞുപിറന്നത് സമൂഹമാധ്യമങ്ങള് വലിയ ആഘോഷമായിരുന്നു. സിയയ്ക്കു വേണ്ടി പുരുഷനായി മാറിയ പങ്കാളി സഹദാണ് ഗര്ഭം ധരിച്ചത്. ലിംഗമാറ്റ ശസ്ത്രക്രിയയിലൂടെ മാറിടം നീക്കം ചെയ്തിരുന്നു എങ്കിലും ഗര്ഭപാത്രം നീക്കം ചെയ്തിരുന്നില്ല. അങ്ങനെയാണ് വിപ്ലവകരമായ തീരുമാനത്തിലേക്കു ദമ്പതികള് എത്തിയത്.
അബിനന്ദന പ്രവാഹത്തിനിടെ എതിര്സ്വരവുമായി മുസ്ലീംലീഗ് നേതാവ് എം.കെ.മുനീര്. പുരുഷന് പ്രസവിച്ചു എന്ന തരത്തിലുള്ള അദ്ഭുതപ്പെടുത്തുന്ന പ്രചാരണം ജെന്ഡര് ന്യൂട്രാലിറ്റിയുടെ മറവില് ഇവിടെ നടക്കുന്നുണ്ടെന്നും ഇതു വിശ്വസിക്കുന്നവര് മൂഢരുടെ സ്വര്ഗത്തിലാണെന്നും എം.കെ.മുനീര് എംഎല്എ. ഇസ്ലാമിക് കോണ്ഫറന്സില് പ്രസംഗിക്കുകയായിരുന്നു എം.കെ.മുനീര്.
സ്ത്രീ സമ്പൂര്ണമായി നില്ക്കുമ്പോള് മാത്രമാണ് അവള് പ്രസവിക്കുന്നത്. ഇവിടെ പ്രസവിച്ച സ്ത്രീ ജന്മം കൊണ്ട് സ്ത്രീ ആയിരുന്നുവെന്നതിന്റെ നിദര്ശനമാണ് അവരില് ഗര്ഭപാത്രം ഉണ്ടായിരുന്നുവെന്നത്. ഹോമോ സെക്ഷ്വാലിറ്റിയില് ജീവിക്കുന്നവര് ലോകത്തൊരിടത്തും പ്രസവിച്ചിട്ടില്ല. ട്രാന്സ്മെന്, ട്രാന്സ്വുമന് എന്നുള്ളതെല്ലാം പൊള്ളയായ വാദമാണെന്നും എം.കെ.മുനീര് പറഞ്ഞു.
ട്രാന്സ്ജെന്ഡര് പങ്കാളികളായ കോഴിക്കോട് ഉമ്മളത്തൂരിലെ സിയയ്ക്കും സഹദിനും കഴിഞ്ഞ ദിവസമാണ് കുഞ്ഞു പിറന്നത്. കോഴിക്കോട് മെഡിക്കല് കോളജ് ആശുപത്രിയിലായിരുന്നു പ്രസവ ശസ്ത്രക്രിയ. സഹദും കുഞ്ഞും സുഖമായിരിക്കുന്നെന്നും കുഞ്ഞിന്റെ ലിംഗം വെളിപ്പെടുത്താന് താല്പര്യം ഇല്ലെന്നും മാതാവ് സിയ പറഞ്ഞു. ഇതോടെ ഇന്ത്യയിലെ ആദ്യത്തെ ട്രാന്സ്മെന് പിതാവായിരിക്കുകയാണ് സഹദ്.
സ്ത്രീയായി ജനിച്ച് പുരുഷനായി മാറിയ വ്യക്തിയാണ് സഹദ്. സിയ ആകട്ടെ പുരുഷനായി ജനിച്ച് സ്ത്രീയായി മാറിയയാളും. കുഞ്ഞിനെ ദത്തെടുക്കാന് അന്വേഷിച്ചെങ്കിലും ട്രാന്സ്ജെന്ഡര് പങ്കാളികള്ക്കു മുന്നില് നിയമനടപടികള് വെല്ലുവിളിയായി. തുടര്ന്നാണു പുരുഷനായി മാറിയെങ്കിലും സഹദ് ഗര്ഭം ധരിക്കാമെന്ന ആശയത്തിലേക്കെത്തുന്നത്. ആളുകള് എന്തു പറയുമെന്ന ആശങ്കയില് ആദ്യം മടി തോന്നിയെന്ന് സഹദ് മുന്പ് പറഞ്ഞിരുന്നു. ഒപ്പം ഒരിക്കല് ഉപേക്ഷിച്ച സ്ത്രീത്വത്തിലേക്കുള്ള തിരിച്ചുപോക്കും വെല്ലുവിളിയായി. എന്നാല് സിയയുടെ സ്നേഹവും അമ്മയാകാനുള്ള അടങ്ങാത്ത ആഗ്രഹവും സഹദിന്റെ തീരുമാനത്തെ മാറ്റി.
കോഴിക്കോട് മെഡിക്കല് കോളജിലെ ഡോക്ടര്മാരുടെ നേതൃത്വത്തില് വിദഗ്ധ പരിശോധനകള് നടത്തി ആരോഗ്യപ്രശ്നമില്ലെന്ന് ഉറപ്പു വരുത്തിയ ശേഷമാണു ചികിത്സ ആരംഭിച്ചത്. സിയയില് നിന്നാണ് സഹദ് ഗര്ഭം ധരിച്ചത്. സ്ത്രീയില് നിന്ന് പുരുഷനാകാനുള്ള നീക്കത്തിന്റെ ഭാഗമായി മാറിടങ്ങള് ശസ്ത്രക്രിയയിലൂടെ നീക്കം ചെയ്തെങ്കിലും ഗര്ഭപാത്രവും മറ്റും മാറ്റിയിരുന്നില്ല.
അതേസമയം സഹദും സിയയും ജനനസര്ട്ടിഫിക്കറ്റില് അച്ഛനുമമ്മയുമായി തങ്ങളുടെ പേരുചേര്ക്കാനുള്ള തിടുക്കത്തിലാണ്. അച്ഛനായി സഹദും അമ്മയായി സിയയും. ആശുപത്രി വിടുംമുമ്പ് അതുചേര്ക്കണം. ഇവ രേഖകളില് ചേര്ക്കാന് ആരോഗ്യമന്ത്രിക്കും മെഡിക്കല് കോളേജ് മാതൃ-ശിശുസംരക്ഷണകേന്ദ്രം സൂപ്രണ്ടിനും ശനിയാഴ്ച നിവേദനം നല്കുമെന്ന് സിയ പറഞ്ഞു.
അടുത്തമാസം മെഡിക്കല് കോളേജിലെത്തുന്ന ആരോഗ്യമന്ത്രിയെ കാണാനുള്ള ആഗ്രഹത്തിലാണ് ദമ്പതിമാര്. ദമ്പതിമാര്ക്ക് ആധാര്കാര്ഡും ട്രാന്സ്ജെന്ഡര് തിരിച്ചറിയല്കാര്ഡുമുണ്ട്. കുഞ്ഞിനെ പ്രസവിച്ചത് സഹദാണെങ്കിലും അവനാകണം അച്ഛനെന്നാണ് ഞങ്ങളുടെ ആഗ്രഹം.
സമൂഹത്തില് ട്രാന്സ്ജെന്ഡറിന് നല്ലതും ചീത്തയുമായി പ്രതികരണം ലഭിക്കുന്നുണ്ട്. എന്നാല്, ആശുപത്രിയധികൃതരില്നിന്ന് കിട്ടുന്ന എല്ലാവിധസഹായവും മാനസികപിന്തുണയും ഏറെ സന്തോഷം നല്കുന്നു. സഹദിനും കുഞ്ഞിനും എല്ലാവിധ പരിചരണവും മരുന്നും സൗജന്യമായി കിട്ടുന്നുണ്ട്. ഇതുവരെ കൂടെനിന്ന ആശുപത്രിയധികൃതരും ആരോഗ്യമന്ത്രിയും ഇക്കാര്യത്തിലും കൂടെയുണ്ടാകുമെന്ന് കരുതുന്നു എന്ന് സിയ പറഞ്ഞു.
"
https://www.facebook.com/Malayalivartha
