ഇത്തവണ കനക്കും... ലോക്സഭാ തെരഞ്ഞെടുപ്പിന് കഷ്ടിച്ച് ഒരു വര്ഷം മാത്രമുള്ളപ്പോള് വീണ്ടും മണ്ഡലത്തില് സന്ദര്ശനം നടത്തി രാഹുല് ഗാന്ധി; കോണ്ഗ്രസ് തട്ടകമായ അമേഠിയില് പ്രതീക്ഷയില്ലാത്തതിനാല് വയനാട് തന്നെ ശരണം; ഇനി വയനാടിനെ കൂടുതല് നോക്കും
കഴിഞ്ഞ തവണ രാഹുല് ഗാന്ധി പ്രധാനമന്ത്രിയാകുമെന്ന് കരുതിയാണ് കേരളം ഇളകിയത്. കൂടാതെ ശബരിമല വിഷയവുമുണ്ടായിരുന്നു. പക്ഷെ ഇത്തവണ രാഹുല് ഗാന്ധി മര്യാദയ്ക്ക് വയനാട്ടുകാരെ പരിഗണിച്ചില്ലെങ്കില് വയനാട്ടുകാരും തിരിയും. ഇത് കേരളമാണ്.
അങ്ങനെ ഭാരത് ജോഡോ യാത്രയ്ക്ക് ശേഷം രാഹുല് ഗാന്ധി എം.പി വയനാട്ടിലെത്തി. കരിപ്പൂരില് വിമാനമിറങ്ങിയ രാഹുല് ഇന്നലെ രാത്രിയാണ് കല്പ്പറ്റയിലെത്തിയത്. രാഹുല് ഗാന്ധിയെ നേതാക്കളും പ്രവര്ത്തകരും ചേര്ന്ന് സ്വീകരിച്ചു. രാവിലെ കല്പ്പറ്റ മണിയങ്കോട് കൈതാങ്ങ് പദ്ധതിയില് നിര്മ്മിച്ച വീട് സന്ദര്ശിക്കുന്നതോടെയാണ് വയനാട്ടിലെ പരിപാടികള് തുടങ്ങുന്നത്. ശേഷം കളക്ട്രേറ്റില് നടക്കുന്ന വിവിധ യോഗങ്ങളില് പങ്കെടുക്കും.
കടുവയുടെ ആക്രമണത്തില് കൊല്ലപ്പെട്ട കര്ഷകന് പുതുശ്ശേരി തോമസിന്റെ വീടും രാഹുല് ഗാന്ധി സന്ദര്ശിക്കും. വൈകിട്ട് മീനങ്ങാടി സ്റ്റേഡിയത്തില് നടക്കുന്ന പൊതുസമ്മേളനത്തില് പങ്കെടുക്കും. കോണ്ഗ്രസിന്റെ കൈത്താങ്ങ് പദ്ധതി പ്രകാരം നിര്മിച്ച 25 വീടുകളുടെ താക്കോല് ദാനവും ചടങ്ങില് രാഹുല് ഗാന്ധി നിര്വഹിക്കും. മണ്ഡല സന്ദര്ശനം പൂര്ത്തിയാക്കി രാത്രി 8.50 നുളള വിമാനത്തില് കരിപ്പൂരില് നിന്ന് രാഹുല് ഗാന്ധി ദില്ലിയിലേക്ക് തിരിക്കും.
അതേസമയം പാര്ലമെന്റില് പ്രധാനമന്ത്രി നരേന്ദ്ര മോദിയും അദാനിയുമായി ബന്ധപ്പെടുത്തി നടത്തിയ പരാമര്ശത്തില് കോണ്ഗ്രസ് എം.പി. രാഹുല് ഗാന്ധിക്ക് നോട്ടീസ് നല്കി. പാര്ലമെന്ററികാര്യമന്ത്രി പ്രഹ്ലാദ് ജോഷി, ബി.ജെ.പി. എം.പി. നിഷികാന്ത് ദുബെ എന്നിവര് രാഹുലിനെതിരെ അവകാശ ലംഘനത്തിന് പരാതി നല്കിയിരുന്നു. ഇതിന്റെ പശ്ചാത്തലത്തിലാണ് ലോക്സഭാ സെക്രട്ടറിയേറ്റ് രാഹുല് ഗാന്ധിക്ക് നോട്ടീസ് അയച്ചത്. പ്രധാനമന്ത്രിക്കെതിരെ സഭയില് കള്ളം പറഞ്ഞുവെന്നായിരുന്നു പരാതി. ബുധനാഴ്ചക്കകം മറുപടി നല്കാനാണ് നോട്ടീസിലെ നിര്ദേശം.
രാഷ്ട്രപതിയുടെ നന്ദിപ്രമേയ ചര്ച്ചയ്ക്കിടെ പ്രധാനമന്ത്രി നരേന്ദ്ര മോദിയെ രാഹുല് ഗാന്ധി രൂക്ഷമായി വിമര്ശിച്ചിരുന്നു. അദാനിയുമായുള്ള ബന്ധത്തെ സൂചിപ്പിച്ചു കൊണ്ടായിരുന്നു രാഹുല് ഗാന്ധിയുടെ പരാമര്ശം. എന്നാല് ഇത് തെറ്റിദ്ധാരണ പരത്തുന്നതും ആക്ഷേപകരവുമാണ് എന്നാരോപിച്ച് ബി.ജെ.പി. രംഗത്തെത്തുകയും പരാതി നല്കുകയുമായിരുന്നു. തെളിവുകളില്ലാതെ പ്രധാനമന്ത്രി നരേന്ദ്ര മോദിക്കെതിരെ രാഹുല് ഗാന്ധി ആരോപണം ഉന്നയിച്ചു എന്നായിരുന്നു ബിജെപിയുടെ പരാതി.
തുടര്ന്ന് മോദിക്കെതിരായ രാഹുല് ഗാന്ധിയുടേയും കോണ്ഗ്രസ് അധ്യക്ഷന് മല്ലികാര്ജുന് ഖാര്ഗെയുടേയും പരാമര്ശങ്ങള് രേഖകളില് നിന്ന് നീക്കംചെയ്യുകയും ചെയ്തിരുന്നു. ഇതിന് പിന്നാലെയാണ് ഇപ്പോള് രാഹുല് ഗാന്ധിക്ക് നോട്ടീസ് അയച്ചിരിക്കുന്നത്.
ഇതിനിടെയാണ് ഭാരത് ജോഡോ യാത്രയ്ക്ക് ശേഷം ആദ്യമായി രാഹുല് ഗാന്ധി കേരളത്തിലെത്തി. കരിപ്പൂര് വിമാനത്താവളത്തില് ഇറങ്ങിയ രാഹുല് ഗാന്ധിക്ക് വന് വരവേല്പ്പാണ് കോണ്ഗ്രസ് പ്രവര്ത്തകര് ഒരുക്കിയത്. കെ. സുധാകരന്, കെ.സി. വേണുഗോപാല് എന്നിവര് ചേര്ന്ന് രാഹുല് ഗാന്ധിയെ സ്വീകരിച്ചു. ഞായറാഴ്ച രാത്രി വയനാട്ടിലേക്ക് തിരിച്ച രാഹുല് ഗാന്ധി, ഇന്ന് വയനാട്ടില് നടക്കുന്ന വിവിധ പരിപാടികളില് പങ്കെടുക്കും. ശേഷം തിങ്കളാഴ്ച രാത്രിയോടെ ഡല്ഹിയിലേക്ക് തിരിക്കുമെന്നാണ് വിവരം.
അതേസമയം ജനാധിപത്യത്തിന്റെ ശബ്ദം മായ്ച്ച് കളയാനാവില്ലെന്ന ട്വീറ്റുമായി രാഹുല് ഗാന്ധി. ലോക്സഭയില് മോദി - ആദാനി ബന്ധത്തെ കുറിച്ച് ആരോപണം ഉന്നയിച്ച് നടത്തിയ പ്രസംഗം സഭാ രേഖകളില് നിന്ന് നീക്കം ചെയ്തതിന് പിന്നാലെയാണ് രാഹുലിന്റെ ട്വീറ്റ്. താന് ഉന്നയിച്ച ചോദ്യങ്ങള്ക്ക് മറുപടി വേണമെന്നും പ്രധാനമന്ത്രിയോട് രാഹുല് ആവശ്യപ്പെട്ടു. ആരോപണങ്ങള്ക്ക് രാഹുല് തെളിവ് ഹാജരാക്കാത്തതോടെയാണ് പരാമര്ശങ്ങള് നീക്കാന് സ്പീക്കര് നിര്ദ്ദേശം നല്കിയതെന്നാണ് ലോക്സഭ വൃത്തങ്ങള് സ്ഥിരീകരിച്ചത്.
https://www.facebook.com/Malayalivartha
